Vantu wovanzi kugazara asi Nombangi daJehova kuna kara ukareli woupe. Nye nomvhura 2 700 da ka pita, vakareli vaKarunga gosili ngava va tumbura asi “nondipo” ndi nombangi dendi. (Jesaya 43:10-12) Pomuhowo ngatu litumbura asi Valirongi woBibeli, nye momvhura 1931 yipo twa gusire edina Nombangi daJehova. Morwasinke?

Alyo kusingonona Karunga gwetu. Kuliza nomatjango ganare goBibeli, edina lyaKarunga, Jehova, kwa moneka mo yikando mayovi. Nobibeli dononzi kwa li pinganesera po noyitumbwiso ngwendi Hompa ndi Karunga. Nye Karunga gosili kwa lihorwere mwene kwaMosesa pokutumbura edina lyendi, Jehova, nokutanta asi: “Eli yilyo edina lyange lyanarunye.” (Exodus 3:15) Monkedi zangesi age kwa lihangwire ko mwene koyikarunga yoyimpempa. Ose kulizuvha mfumwa pokutuzigida kedina lyaKarunga lyokupongoka.

Alyo kusingonona yirugana yetu. Kutundilira komugara gomuhungami Abeli, vantu wovanzi kwa geve umbangi wepuro lyawo mwaJehova. Mwa za nomvhura, Nowa naAbirahamu naSara naMosesa naNdafita ntani navamwe kwa hamenene ‘kombunga zonene zonondipo’ ndi zonombangi. (Vahebeli 11:4–12:1) Ose twa hara kudivisa usili kuhamena Karunga gwetu, ngamoomu muntu na gava umbangi mompanguro mokupopera muntu ga hana nzo.

Ose kutemwinina Jesus. Bibeli kumutumbura asi Mbangi ndi “Ndipo za limburukwa.” (Ehororo 3:14) Jesus kwa tente asi age kwa ‘divisire edina lyaKarunga’ kovantu ntani kwa geve “undipo wokuhamena kousili” waKarunga. (Johanesa 17:26; 18:37) Yipo nye, vasikuli vaKristusa wousili nawo va hepa kugava umbangi wedina lyaJehova. Eyi yiyo dina kurugana Nombangi daJehova.

• Morwasinke Valirongi woBibeli va ya litumbwire asi Nombangi daJehova?

• Siruwo sokuhura kupi ga kara Jehova nonombangi dendi pevhu?

• Yilye Mbangi zonene po zaJehova?