Matjangwa goRugereka goSikriste kwa tumbura rorunzi Baranabasa nomupositoli Paurusa. Vagara ava kwa kere vatareli wokudingura nombungakriste. Morwasinke? Awo kwa kere nosinka sovanavazinyawo. Paurusa kwa tente asi kwa here ‘kutengura a ka tare vakwawo’ omu vana kerere. Age ga li wapaikilire kuza sinano sosire a ka va korangede. (Yirugana 15:36) Olyo yilyo eharo va kara nalyo vatareli wokudingura naina.

Awo kuwiza va ya tu korangede. Nkenye mutareli gonombunga kudingura nombungakriste dokusika koyiha 20 ruvali momvhura, age kukara mwankenye mbungakriste sivike simwe. Ose kugwanena mo mauwa moudivi wovadinguli ava kumwe novakadi vawo. Awo kuhetekera ko kudiva vadinkantu novakondi ntani kuza nose moyirugana yokuzuvhisa nokovarongwa vetu woBibeli. Vatareli owo kuza kumwe novakuronambunga va ka dingure nokukakorangeda vamwe womombungakriste ntani awo kugava yiuyungwa yokutukorangeda komapongo nopoyigongi.—Yirugana 15:35.

Awo kulikida elituromo mwanatuvenye. Vatareli wonombunga kwa hara kuvatera mbungakriste zi nkondopeke elikwatakano lyazo naJehova. Awo kuponga kumwe novakuronambunga novakwafimbunga va va korangede ntani va dive eyi yina kuhoroka mombunga. Awo kuvatera vazuvhisi wokukarerera yipo yi va tompoke moyirugana yawo yokuzuvhisa ntani awo kwa hara kudiva wovape mombunga nokuzuvha marunduruko aga vana kutura po. Vatareli wokundigura awo ‘varugani vakwetetu wokutukwafa.’ (2 Vakolinte 8:23) Tu honeneni epuro lyawo noulimburukwi wawo kwaKarunga.—Vahebeli 13:7.

• Morwasinke vatareli wonombunga ava dingwire nombungakriste?

• Uwa musinke no gwanena mo momadinguro gawo?