Nombangi daJehova kwa va divira kerongo eli ava gava. Pwa kara nosikora edi ava zi owo va ligava vene kosirugana soUhompa sokuzuvhisa siruwo nasinye yipo va ‘sikise mo nawa sirugana sawo.’—2 Timoteusa 4:5.

Sikora zoVazuvhisi wokukarerera. Nsene muzuvhisi gokukarerera ana sikisa mo mvhura zendi zokuhova tava mu zigida kosikora ezi ava ruganene koSinyanga soUhompa. Sitambo zosikora ozo kuvatera vazuvhisi wokukarerera va hedere pepi naJehova nokugwana udivi momaruha nagenye gokuzuvhisa ntani va twikire noulimburukwi mosirugana sawo.

Sikora zovazuvhisi woUhompa. Sikora ezi kugusa makwedi gavali mokudeura vazuvhisi wokukarerera ava va kara noudivi neharo lyokukazuvhisira oku kuna kara hepero. Awo kwa kara nonkareso ezi asi “nyame ogu, tuma nge,” mokuhonena muzuvhisi goMunene po, Jesus Kristusa. (Jesaya 6:8; Johanesa 7:29) Pokudirukira kevango lyapeke awo kuhepa kutura po marunduruko. Pasihonena, awo va hepa kukayika mparukiso nomukarompepo nonondya. Ntani va hepa kulironga eraka. Sikora ezi kuvatera vanavazinyetu wovadike novalikwali wonomvhura kutundilira 23 dogoro 65 va tunge po yikara yopampepo eyi ngayi va vatera mosirugana sawo ntani noudivi ou ngau va ninkisa va vhure kuvaruganesa momunene Jehova nombunga zendi.

Sikora zoBibeli zaGiliyata. MoRuhebeli, “Giliyata” kutanta asi “Mbunga zoNombangi.” Kutundilira mo-1943 apa va totere po sikora ozo, vazuvhisi wokupitakana po-8 000 kwa va tuma koyirongo va ka gave umbangi “dogoro kooku wa ka hura uzuni” ntani kwa reta yitundwamo yoyiwa. (Yirugana 13:47) Apa vazuvhisi va va tumine koPeru, amo kapi mwa kere nombungakriste. Nye ngesi kuna kara mo nombungakriste dokupitakana po-1 000. Ntani apa vatumwa va zire koYapani, amo kwa kere mo tupu Nombangi daJehova dokusika pomurongo. Nye ngesi Nombangi dina pitakana po-200 000. Sikora ezi kugusa makwedi gatano omu ava lirongo momunene Nonkango daKarunga. Vazuvhisi wosiruwo nasinye ndi vatumwa ndi Vabeteli ndi vatareli mbunga novakadi vawo kuvazigida kosikora ezi yipo va ka gwane edeuro lyenene va ya nkondopeke nombungakriste nokutwara komeho sirugana sokuzuvhisa.

• Sitambo musinke za karera po Sikora zoVazuvhisi wokukarerera?

• Wolye va wapaikira Sikora zovazuvhisi woUhompa?