Nkenye Sinyanga soUhompa soNombangi daJehova kwa kara po edina lyokupongoka lyaKarunga. Ose kuyihafera pokuzeresa nokuwapukurura etungo lyetu morwa sirugana sokuzeresa kuna kara ruha romulyo roukareli wetu. Natuvenye kuvhura kulihameka mo.

Vatera kuzeresa konyima zepongo. Konyima zankenye epongo, vanavazinyetu kuyihafera pokuzeresa kanunu Sinyanga soUhompa. Rumwe mosivike, kurugana hena ezereso. Mukuronambunga ndi mukwafimbunga yige gokugendesa sirugana sokuzeresa, pamwe kukara nelikwamo lyeyi va hepa kuzeresa. Kuliza noyirugana, vamwe kuvatera kukomba nokumopa nokuwapaika yipundi nokuzeresa tukasaise nokukuhwa makende nonontarero nokukazuguma yihando ndi kuharaka ponze. Ezereso lyenene kulirugana rumwe momvhura. Pokupa ko vanona yirugana, tatu va rongo va fumadeke evango lyetu lyoukareli.—Muudisi 5:1.

Vatera mokuwapukurura oku kuna kara hepero. Nkenye mvhura kurugana ekonakono lyoSinyanga soUhompa, ponze nomonda. Konyima zoyo, Sinyanga kusiwapukurura yipo si moneke nawa ntani ayo kusesupika yifutwa. (2 Histoli 24:13; 34:10) Sinyanga soUhompa sokuzera kuna kara evango lyewa lyokukarera Karunga gwetu. Pokulihameka mezereso, tatu likida asi twa hara Jehova ntani twa fumadeka evango lyetu lyoukareli. (Episarome 122:1) Ntani ayo hena kutumangeda vantu womomukunda va fumadeke evango lyetu lyoukareli.—2 Vakolinte 6:3.

• Morwasinke natu pakerera mbili evango lyetu lyoukareli?

• Mawapaiko musinke ava tura po gokuzeresa Sinyanga soUhompa?