Wa diva vamwe woNombangi daJehova ndi? Ose nampo vamusinda woge novarugani ndi vanasure vakweni. Ndi nampo twa zogera kumwe nove Bibeli. Nyose wolye, ntani morwasinke atu zuvhisilire vantu navenye?

Ose vantuuntu tupu. Ose kwa tunda momarudi nomomaraka gokulisiga-siga. Vamwe vetu kwa kere momaukareli gapeke, ano vamwe kapi twa pulire mwaKarunga. Komeho tu ya kare Nombangi, twa litulilire po siruwo sokukonakona marongo gomoBibeli. (Yirugana 17:11) Twa tambwire eyi twa lirongere nokutura po etokoro lyokukarera Jehova Karunga.

Ose kugwanena mo uwa mokulironga Bibeli. Ngwendi vantu navenye, nose kuligwanekera nomaudigu ntani kulipuka. Nye pokukondja kwetu tu sikise mo nompango doBibeli, ose kugwanena mo mauwa gomanzi. (Episarome 128:1, 2) Ozo yizo hena konda zimwe zeyi atu tantererere ko vakwetetu yininke yoyiwa eyi twa lironga moBibeli.

Ose kuparuka kuliza nonompango daKarunga. Nompango odo domoBibeli kutuvatera tu kare noruhafo nokufumadeka vakwetetu nokutunga po yikara yoyiwa ngwendi nkenda nokuhungika. Ado kuvatera vantu va kare nonkareso zongwa ntani kupameka elikwatakano lyemepata. Ose epata limwe, kapi atu litondorora-tondorora morwa “Karunga kapi ga paka mpongo.” Morwa kukwama nompango doBibeli, twa lisiga novantu wopeke.—Yirugana 4:13; 10:34, 35.

• Ngapi Nombangi daJehova da fana ngwendi vantu navenye?

• Nompango musinke domoBibeli da lironga Nombangi?