Ose kutumbura mavango getu goukareli asi Yinyanga yoUhompa morwa yiko atu zogere marongo goBibeli kuhamena Uhompa waKarunga ou nga zuvhisa Jesus.—Rukasa 8:1.

Ayo mavango goukareli wousili. KoYinyanga yoUhompa yiko adi liwapaikilire Nombangi daJehova yirugana yokuzuvhisa. (Mateusa 24:14) Yinyanga yoUhompa ya lisiga mounene wayo ntani pamwe kuyiruganesa nombungakriste dokupitakana pwazimwe. Morwa kuvhuka kovazuvhisi nonombungakriste, monomvhura edi ose kwa tunga Yinyanga yoUhompa yokusika pomayovi murongo (Yinyanga yitano nkenye ezuva). Ngapi ayi tu tompoka eyi?—Mateusa 19:26.

Kuyidikisa noyimaliwa yoyigava. Mwankenye Sinyanga soUhompa mwa kara sikesa sokutura yimaliwa yEtungo lyoYinyanga yoUhompa mouzuni mudima. Yigava eyi kuyituma koBeteli yipo yimaliwa oyo va ka yi gave konombungakriste edi dina hepa kutunga ndi kuwapukurura Sinyanga soUhompa.

Kuyitunga valizambeli wokulisiga-siga. Moyirongo yimwe, va tura mo Nombunga dokutunga Yinyanga yoUhompa. Nombunga dovarugani wokutunga novalizambeli kuza konomukunda dokulisiga-siga mosirongo va ka tunge nokukadeura Nombangi monomukunda odo. Moyirongo yimwe, Komitiye zokutunga kwa zi tura po zi gendese etungo newapukururo lyoYinyanga yoUhompa monomukunda. Vakuronambunga ava va kara noudivi wokutunga kuvatera nombungakriste metungo ntani vamwe ava va kara noudivi kulizambera va vatere. Pwankenye etungo lyoSinyanga soUhompa, womombungakriste kulizambera va rugane. Mpepo zaJehova nelizambero lyovantu vendi kuninka yirugana yi tompoke.—Episarome 127:1; Vakorosi 3:23.

• Morwasinke mavango getu goukareli ava ga tumbwire asi Yinyanga yoUhompa?

• Ngapi ayi tu tompoka tu tunge Yinyanga yoUhompa uzuni mudima?