Nkenye mvhura, mbunga zetu kurugana nokugavera mamiliyona goNobibeli noyimbapiratjangwa pwa hana mfuto. Ose kutunga nokuwapukurura Yinyanga yoUhompa noNobeteli. Ose kupakera mbili mayovi goVabeteli novatumwa ntani kugava evatero apa ayi horoka yimpagwa. Kuvhura o lipure asi: ‘Kupi oku ava gwana yimaliwa yokufutira nayinye oyo?’

Kapi atu hundagere yimaliwa. Nampili ngomu pwa hepa yimaliwa yoyinzi yokugendesa yirugana yetu yokuzuvhisa, kapi atu hundagere yimaliwa. Nomvhura efere da ka pita, sifo soRuhungu kwa tente asi twa yi diva asi Jehova yige a kwatesa ko sirugana setu ntani ose “kapi ngatu hundagera ndi tu likwambere vantu va tu vatere.”—Mateusa 10:8.

Yigava kukwatesa ko yirugana yokuzuvhisa. Vantu wovanzi kugava yigava morwa kuhafera yimbapiratjangwa yetu yoBibeli. Nombangi daJehova kuruganesa siruwo sawo nononkondo dawo noyimaliwa ntani yiweka yawo va sikise mo mpango zaKarunga pevhu. (1 Histoli 29:9) KoSinyanga soUhompa, kwa kara ko yikesa yokutura yigava kowo vana hara kugava. Ndi kuvhura kugava kupitira koIntaneta zetu jw.org. Sinzi soyimaliwa eyi atu gwana kutunda kovantu woruhepo, ngwendi mufisayendi ogu ga tulire tumalivagona tuvali mosikesa sontembeli. (Rukasa 21:1-4) Yipo nye, nkenye ogu kuvhura a ‘pungure ko yuma’ yipo a gave “moomu ana yi gazarere momwenyo gwendi.”—1 Vakolinte 16:2; 2 Vakolinte 9:7.

Twa kara nehuguvaro asi Jehova nga tumangeda nomutjima dowo vana hara ‘kumufumadeka pokumupa nzambo zeyi yoyiwa po’ va kwatese ko yirugana yoUhompa yipo mpango zendi zi sike mo.—Yisewe 3:9.

• Morwasinke mbunga zetu za lisigira nomaukarelikarunga gapeke?

• Yisinke ava yi ruganesa yimaliwa yoyigava?