MoRuhebeli, Beteli kutanta asi “Nzugo zaKarunga.” (Genesis 28:17, 19) Alyo edina lya wapera matungo goNombangi daJehova uzuni mudima oku ava gendesere yirugana yokuzuvhisa. Mbungagendesi kwa kara komberewa zetu zonene moAmerika mositata saNew York, oko yiko ava gendesere yirugana yokonomberewa doBeteli moyirongo yoyinzi. Ava va kara konomberewa odo kuvatumbura asi epata lyoVabeteli. Awo kwa tunga kumwe ngwendi epata, kulya kumwe, kurugana kumwe ntani kulironga kumwe Bibeli.—Episarome 133:1.

Evango oku vantu ava lizambere vene moyirugana. Mwankenye epata lyoVabeteli, kwa kara mo vagara novakadi ava va ligava va rugane mpango zaKarunga siruwo nasinye. (Mateusa 6:33) Kapi ava tambura yimaliwa nye kuvapa mararo nonondya nokansonso kokulivateresa. Nkenye ogu ga kara koBeteli kwa kara nosirugana, vamwe kurugana monomberewa ndi kutereka. Vamwe kurugana nonomahina edi adi rugana yimbapiratjangwa ndi kuzeresa nonzugo nokukuhwa yidwara ndi kupangerera nokuwapaika yininke ntani nayimwe ngoso.

Evango eli ali kwatesa ko yirugana yokuzuvhisa. Sitambo sankenye Beteli kuna kara sokugavera usili woBibeli kovantu navenye. Sifo esi kuna kara simwe seyi ava rugana koBeteli. Aso kwa si tjenge megendeso lyoMbungagendesi, makura tava si tumu kupitira mokompiuta kovatoroki wovanzi mouzuni mudima tava ka si tura momahina aga aga rugana yimbapiratjangwa moruhura tava si tumu konombungakriste dokupitakana po-100 000. Nayinye eyi ali rugana epata lyoVabeteli, kukwatesa sa ko sirugana somulyo po unene, ezuvhiso lyombudi zongwa.—Marukusa 13:10.

• Wolye ava rugana koBeteli, ntani ngapi omu ava va pakere mbili?

• KoNobeteli, sirugana musinke somulyo po ava kwatesa ko?