1-3. Nkore musinke azi tu taparara ose natuvenye, ntani morwasinke kutarurura eyi azi rongo Bibeli kuturetera mbili?

GAZARA asi ove kuna kuduka nkore zonyanya. Age nonkondo ntani kuduka unene kukupita ove. Wa mu diva asi age kwato nkenda morwa wa mu mona omu ana kudipaga vakaume woge vamwe. Nampili ngapi omu no hetekera kumuduka, age kuna kuhedera pepi. Ngwendi pwato ehuguvaro. Kuliharuka ko, mupopeli ana kara koruha roge. Age munankondo unene kupita nkore zoge, ntani age ta ku tumbwidire mokukuvatera. Ngapi omu no lizuvha mbili koyo!

² Mousili, ove kuna kukutaparara nkore zangoso. Age kututaparara natuvenye. Moomu twa yi lirongere megaununo lya ka pita, Bibeli kutumbura nomfa asi nkore. Kwato gumwe gwetu gokuvhura kuzihenduka ndi kuzirwanesa. Sinzi setu twa mona nkore ezi omu zina kugusa nomwenyo dovantu ava twa hara. Nye Jehova age munankondo unene-nene kupitakana nomfa. Age Mupopeli geharo ogu ga likida nare asi age kuvhura kufunda nkore ezi. Ano age ga tumbwidira mokukazonagura po nkore ezi nomfa nu. Bibeli kuronga asi: “Nkore zokuhulilira ezi ngava zonagura, nomfa.” (1 Vakolinte 15:26) Ozo mbudi zongwa!

 ³ Tu tarurureni asi ngapi omu atu lizuvhu nsene muhali ta fu. Mokuyirugana eyi ngayi tu vatera mokukwata egano etumbwidiro eli ngali tu hafesa. Alyo etumbwidiro lyaJehova asi vafe ngava ka paruka hena. (Jesaya 26:19) Awo ngava ka va tengwidira hena keparu. Alyo ehuguvaro lyevhumbuko.

4. (a) Nkareso zaJesus konomfa domuhali, morwasinke azi tu rongere kuhamena malizuvho gaJehova? (b) Ukaume musinke wokulikerera ga tulisire po Jesus?

⁴ Wa zumbanesa rumwe muhali monomfa ndi? Kukora nokuguva nomalizuvho ga hana sikwafo kuvhura yi kare udigu kuyilididimikira. Poyihorokwa oyo, twa hepa kutara moNonkango daKarunga mokugwana ehengagwido. (2 Vakolinte 1:3, 4) Bibeli kutuvatera tu kwate egano omu ava lizuvhu oJehova naJesus kuhamena nomfa. Jesus, ogu a fanekesa nawa-nawa oGuhwe, ga divire kukora kokuzumbanesa gumwe monomfa. (Johanesa 14:9) Apa nga zi moJerusarema, Jesus nga dingura Rasarusa novakuru vendi, oMariya naMalita, ava va tungire mokadoropa kopopepi kaBetani. Awo va ya kere vakaume wovanene. Bibeli kutanta asi: “Jesus kwa here Malita namukurwendi gomukadi naRasarusa.” (Johanesa 11:5) Nye, moomu twa yi lirongere megaununo lya ka pita, Rasarusa ga fire.

5, 6. (a) Ngapi omu ga lizuvhire Jesus apa ga kere kumwe nekoro novakaume vaRasarusa veguwo? (b) Ruguwo rwaJesus, morwasinke aru tu hengagwidire?

⁵ Ngapi omu ga lizuvhire Jesus apa ga fire kaume kendi? Matjangwa kututantera asi Jesus ga zire kekoro lyaRasarusa novakaume oku va lililire nomfa edi. Mokuvamona, Jesus za mu gwililire nkenda. Age “makura ta handukire momutjima oku guna mu pwaga.” Bibeli tazi tanta hena asi: “Jesus makura ta lili.” (Johanesa 11:33, 35) Kulira kwaJesus ngoso kwa likidire asi age kapi ga kere nehuguvaro ndi? Kapisi yimo. Pausili, Jesus ga divire asi poyili yoyiwa nayi horoka. (Johanesa 11:3, 4) Simpe, age kwa lizuvhire kukora neguwo eli adi reta nomfa.

 ⁶ Ruguwo rwaJesus kutuhengagwida. Aro kuturonga asi Jesus noGuhwe, Jehova, kwa nyenga nomfa. Nye Jehova Karunga age kuvhura kurwanesa nokufunda nkore ozo! Tu zeni tu tare eyi Karunga ga ninkisire Jesus a rugane.

7, 8. Morwasinke sihorokwa saRasarusa sa monekere asi kwato ehuguvaro kovantu ava va kere po, nye yinke ga rugene ko Jesus?

⁷ Rasarusa va mu vhumbikire mekombombo, ano Jesus ta va tantere asi va guse ko emanya kevero. Malita kwa nyokere morwa konyima zomazuva gane, rutu rwaRasarusa rwa tamekere kuwora. (Johanesa 11:39) Ngamoomu ava yi tara vantu, ehuguvaro musinke lya kere po?

⁸ Emanya va li gusire ko, makura Jesus ta zigire nezwi lyenene asi: “Rasarusa, pwaga mo!” Yinke ya horokere? “Nakufa makura ta pwaga mo.” (Johanesa 11:43, 44) Kuvhura o gazare tupu ruhafo rovantu ava va kere po? A kare mumbyawo ndi gekoro ndi kaume ndi musinda gwawo, va yi divire asi Rasarusa ga fire. Nye, googo, mugara gwina geharo, ana sikama mokatji kawo hena. Ayo kwa kere udigu kuyipura. Nampo vanzi va mu lidingilire Rasarusa noruhafo. Efundo musi konomfa!

9, 10. (a) Jesus ngapi omu ga horwere Ntundiliro zononkondo dendi dokuvhumbura Rasarusa? (b) Mauwa musinke atu gwana mokuresa kuhamena mavhumbuko moBibeli?

⁹ Jesus kapi ga tente asi age kwa rugene sitetu esi mononkondo damwene. Mekanderero lyendi komeho tupu zokuzigida Rasarusa a pwage mo, age ga yi likidire nawa-nawa asi Jehova yige ga kere Ntundiliro zevhumbuko. (Johanesa 11:41, 42) Esi kapisi yiso sikando selike Jehova ga ruganesere nonkondo dendi monkedi ezi. Evhumbuko lyaRasarusa alyo limwe lyomavhumbuko ntane aga va tjanga moNonkango daKarunga. * Mokuresa nomokulironga yihorokwa eyi kureta ruhafo.  Ayo kuturonga asi Karunga kwato mpongo, vavhumbuki owo kwa kwatera mo vanona novakondi, vagara novakadi, Vaisraeli novapagani. Ruhafo musi va singonona moyihorokwa eyi! Pasihonena, apa ga pindwire Jesus mukadona konomfa, vakurona vendi “tayi va pe sikumwamurungu.” (Marukusa 5:43) Yimo, Jehova ga va pere ruhafo oru ngano va dira kudivara.

¹⁰ Yimo, ava ga vhumbwire Jesus va fire hena. Ngoso oyo kutanta asi kwa kere tupu mawoko-woko mokuvavhumbura ndi? Kapisi yimo. Yihorokwa eyi yomoBibeli kupameka mausili gomulyo nokutupa ehuguvaro.

11. Sihorokwa sevhumbuko lyaRasarusa, ngapi omu asi vatere mokupameka usili ou va tjanga mwaMuudisi 9:5?

¹¹ Bibeli kuronga asi vafe “kutupu eyi va diva.” Kapi vana kuparuka ntani kapi vana kara po nkenye oku. Sihorokwa saRasarusa kuyipameka eyi. Mokuparuka hena, Rasarusa ga tetukisire vantu nomasingonono gemeguru ndi? Ndi ga va tjilisire nomasimwititi gokutukukisa kuhamena mundiro gwanarunye? Hawe. Bibeli kapi za kara nononkango dangoso dokutunda kwaRasarusa. Momazuva gane gena ga fire, age ‘kutupu eyi ga divire.’ (Muudisi 9:5) Rasarusa age kwa kere monompofu donomfa.—Johanesa 11:11.

12. Morwasinke natu vhulira kukara nousili asi evhumbuko lyaRasarusa sili lya horokere?

¹² Sihorokwa saRasarusa kuturonga hena asi evhumbuko alyo usili, kapisi nongano tupu. Jesus kwa vhumbwire Rasarusa moyitarameho yombunga. Nampili vapitisili womaukerelikarunga, ava va nyengere Jesus, kapi va patanene sitetu esi. Nye, awo kwa tente asi: “Ngapi omu natu rugana, yeeyi mugara ogu [Jesus] ta rugana yitetu yoyinzi?” (Johanesa 11:47) Vanzi va zire va ka tare Rasarusa ogu va vhumbwire. Yitundwamo, sinzi sawo va tulire epuro mwaJesus. Va mwene mwaRasarusa silikido asi Jesus kwa mu tumine Karunga. Silikido esi kwa kere sononkondo yipo nye vapitisili vamwe  womaukerelikarunga goVajuda wonomutjima dononkukutu va tokwere kudipaga oJesus naRasarusa.—Johanesa 11:53; 12:9-11.

13. Mausili musinke twa kara nago gokupura asi Jehova sili kuvhura a vhumbure vafe?

¹³ Ugova mokugazara asi evhumbuko ngali kara po ndi? Hawe, Jesus ga rongere asi ezuva limwe “navenye ava va kara monontoko” ngava ka va vhumbura. (Johanesa 5:28) Jehova yige Musiti geparu. Udigu kuyipura asi age kuvhura a ka siturure hena eparu ndi? Yimo, eyi kukwama mevhuliko lyaJehova lyokudiworoka. Kuvhura a diworoke vahali vetu wokufa ndi? Pwa kara nombungururu mamiliyona-nomamiliyona dokupira kuvhura kuvarura, nye Karunga ga di pa madina nkenye zimwe! (Jesaya 40:26) Jehova Karunga kuvhura kudiworoka nayinye kuhamena vahali vetu ava va fa ntani age ana liwapaikire mokuvatengwidire keparu.

14, 15. Mokuyifanekesa neyi ga tente Joba, ngapi omu a lizuvhu Jehova kuhamena ku ka tengwidira vafe keparu?

¹⁴ Ngapi nye a lizuvhu Jehova kuhamena evhumburo lyovafe? Bibeli kuronga asi age ana hara ku ka pindura vafe. Mugara gokulimburukwa Joba ga pulire asi: “Muntu nsene ana fu, kuvhura hena a tengwire komwenyo ndi?” Joba kwa uyungire kuhamena kundindira montoko dogoro siruwo saKarunga ngasi wize sokumudiworoka. Age kwa tanterere Jehova asi: “Ngo zigide nge, ame ngani ku limburure, makura ngo hafere nge ame siungwa soge.”—Joba 14:13-15.

¹⁵ Gazara tupu! Jehova sili ga hara mokukatengwidira vafe keparu. Eyi kapisi kuhafesa mokulironga asi Jehova kulizuvha ngoso ndi? Ngapi nye kuhamena kevhumbuko lyokomeho? Wolye ngava ka vhumbura, ntani kupi ngava ka va vhumbwira?

16. Keparu musinke ngava ka va vhumbwira vafe?

¹⁶ Yihorokwa yomavhumbuko yomoBibeli kuturonga yoyinzi kuhamena evhumbuko lyokomeho. Vantu vena va  tengwidilire keparu apa pevhu va kere kumwe novahali vawo hena. Evhumbuko lyokomeho ngali ka lifana—nye kupitakanena. Moomu twa yi lirongere mEgaununo 3, sitambo saKarunga asi evhu nalinye ngali kare paradisa. Yipo nye vafe kapi ngava va tengwidira keparu mouzuni wokuzura yita noukorokotji ntani nomauvera. Awo ngava ka kara nompito zokukaparuka narunye eparu lyombili noruhafo pevhu eli.

17. Wolye ngava ka vhumbuka?

¹⁷ Wolye ngava ka vhumbura? Jesus kwa tente asi: ‘Ngava zuvha ezwi lyendi [lyaJesus] navenye ava va kara monontoko, makura tava pwaga mo.’ (Johanesa 5:28, 29) Mokulifana, Ehororo 20:13 kutanta asi: “Efuta makura tali gava vafe ava va kere mo. Nomfa nosirongo sovafe nayo tayi gava vafe ava va kere mo.” ‘Sirongo sovafe’ kufanekesa nontoko dovantu navenye. (Tara koMagwedereroko, pomapenuno 212-213.) Nontoko edi danavenye ngadi kara siporongwa. Mayovi gomamiliyona nagenye gava vana kurara mo, ngaga paruka hena. Mupositoli Paurusa ga tente asi: “Va kare vawa ndi vadona, ngava va pindura koufe.” (Yirugana 24:15) Yinke ayi tanta eyi?

18. Wolye va kwatera mo “vawa” ava ngava ka vhumbura, ntani ehuguvaro eli ngapi omu nali vhura kukukundama?

¹⁸ “Vawa” kwa kwatera mo sinzi sovantu ava twa resa moBibeli ava va parukire komeho zokuwiza Jesus pevhu. Kuvhura o gazare kwaNowa naAbirahamu naSara naMosesa naRutu naEsitera ntani navamwe hena wovanzi. Vamwe vagara novakadi ava vepuro kwa va simwitira megaununo 11 lyoVahebeli. Nye “vawa” kwa kwatera mo hena vakareli vaJehova ava va kufa mosiruwo setu. Morwa ehuguvaro lyevhumbuko, ose kuvhura kutumangurura kwankenye utjirwe wokufa.—Vahebeli 2:15.

19. Wolye “vadona,” ntani mpito musinke nga va pa Jehova monkenda?

¹⁹ Ngapi nye kovantu vena va dilire kukarera nokulimburukwa Jehova morwa kapi va mu divire? Mayovi gomamiliyona gava ‘wovadona’ kapi ngava va divara. Nawo ngava ka va  vhumbura nokukavapa mpito zokukalironga kuhamena Karunga gosili ntani nokumukarera. Mosiruwo sonomumvho eyovi, vafe ngava ka va vhumbura nokukavapa mpito mokukalihameka novantu wovalimburukwi mokukakarera Jehova pevhu. Ngasi ka kara siruwo sosiwa. Esi yiso siruwo esi azi tumbura Bibeli asi Ezuva lyoMpanguro. *

20. Yisinke ayi fanekesa mundiro gwanarunye, ntani wolye ava zi mo?

²⁰ Eyi ngesi kutanta nye asi nkenye muntu ogu ga parukire ngava ka mu vhumbura ndi? Hawe. Bibeli kuuyunga asi vafe vamwe poveli “momundiro gwanarunye.” (Rukasa 12:5) Nkango ezi kwa tunda konkango zoRugereka “gehena” ezi za likidire kevango lyokuzugumina yihando eli lya kere ponze zaJerusarema zanare. Yimpu ntani noyihando ngava yi hwikire kooko. Yimpu eyi ngava zugumine mo Vajuda kwa yi tere asi kwato mulyo kevhumbiko nekevhumbuko. ‘Mundiro gwanarunye’ aso sifanekeso sa wapera kezonauko lyanarunye. Jesus nampili moomu nga ka kara noruha mokukapangura vanamwenyo novafe, Jehova yige Mupanguli gomunene po. (Yirugana 10:42) Narumwe si nga ka vhumbura ava a mono asi awo vadinikarunga ntani kapi va hara kurunduruka.

21, 22. (a) Evhumbuko musinke lyapeke lya kara ko? (b) Yilye muhoverera mokugwana evhumbuko keparu lyopampepo?

²¹ Bibeli za singonona hena evhumbuko lyapeke, evhumbuko lyekeparu lyemeguru ngosisitwa sopampepo. MoBibeli va tumbura sihonena simwe tupu sevhumbuko ngeli, saJesus Kristusa.

²² Konyima zokufa Jesus ngomuntu, Jehova kapi ga sigilire Munwendi gokulimburukwa a kare montoko. (Episarome 16:10; Yirugana 13:34, 35) Karunga ga vhumbwire Jesus, nye  kapisi ngomuntu gopanyama. Mupositoli Peturusa kwa fatwilire asi Kristusa “age kwa mu dipagere parutu, nye . . . kwa mu pindwire koufe pampepo.” (1 Peturusa 3:18) Esi sili sitetu sosinene. Jesus ga parukire hena ngomuntu gononkondo gopampepo! (1 Vakolinte 15:3-6) Jesus yige muhoverera mokugwana evhumbuko eli lyouyerere. (Johanesa 3:13) Nye kapisi yige gokuhulilira.

23, 24. Wolye va hamena mo ‘mombungagona’ zaJesus, ntani awo vangapi ngava kara?

²³ Mokudiva asi age ngano ntaantani a tengure meguru, Jesus ga tanterere vasikuli vendi wokulimburukwa asi age ngano ta ka va ‘wapaikira uturo.’ (Johanesa 14:2) Jesus kwa tumbwire ava ngava za meguru asi “mbungagona.” (Rukasa 12:32) Vangapi ava va hamena mombungagona zoVakriste wokulimburukwa? Kuliza nEhororo 14:1, mupositoli Johanesa kutanta asi: “Na tara ko, tani mono Nzwigona [Jesus Kristusa] zina sikama pondundu zaSiyoni kumwe novantu mayovi efere nonomurongo ne nane, ava va tjangera edina lyendi neli lyoGuhwe poyipara yawo.”

²⁴ Ava Vakriste 144 000, kukwatera mo vapositoli wokulimburukwa vaJesus, kuvavhumbwira keparu lyemeguru. Siruwoke ali horoka evhumbuko lyawo? Mupositoli Paurusa kwa tjenge asi ngano ngayi horoka posiruwo sekaropo lyaKristusa. (1 Vakolinte 15:23) Moomu ngo ka yi lironga mEgaununo 9, ose kuna kuparuka mosiruwo oso. Yipo nye asi yihupwa yoyisesu yowo-144 000 ava wokufa mosiruwo setu kuvavhumbura poopo keparu lyemeguru. (1 Vakolinte 15:51-55) Nye, konyara vantu navenye kwa kara nendindiro lyokukavavhumbwira keparu lyepevhu moParadisa komeho.

25. Yinke ngava ka zogera megaununo lyokukwama ko?

²⁵ Yimo, Jehova sili nga ka funda nkore zetu nomfa, ntani ngazi dogonoka po narunye! (Jesaya 25:8) Kuvhura simpe o lipure: ‘Ava ngava ka vhumbwira meguru yinke ngava ka rugana mo?’ Awo ngava ka hamena mepangero lyoUhompa lyokutetukisa meguru. Ngatu ka lironga ko yoyinzi kuhamena epangero olyo megaununo lyokukwama ko.