RESA nkenye saitunga. Tara kotivi, ndi purakena koradio. Pwa kara masimwititi gomanzi goukorokotji, goyita, ntani gomatjiliso! Gazadara ko kuhamena maudigu ganyamoge. Pamwe walye mauvera ndi nomfa domuhali gumwe kuna kukuretera kukora kokunene. Kuvhura o lizuvhe ngwendi mugara gomuwa Joba, ogu ga uyungire asi age kwa kere “munaruhepo.”—Joba 10:15.

Lipura nyamoge asi:

• Esi yiso sitambo saKarunga kwange ntani nokovantu navenye ndi?

• Kupi oku nani vhura kugwana evatero mokulididimikira maudigu gange?

• Pwa kara po ehuguvaro asi ngatu ka mona rumwe mbili pevhu ndi?

Bibeli kugava malimbururo gokuhafesa komapuro aga.

“Nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena.”—Ehororo 21:4

“Yirema yomondambo ngayi lidinkura tayi dana.”—Jesaya 35:6

“Vatwiku ngava vhura kumona ko.”—Jesaya 35:5

 ‘Navenye ava va kara monontoko ngava pwaga mo.’—Johanesa 5:28, 29

“Nagumwe si gomosirongo esi twa kara nga sivana asi ta vere.”—Jesaya 33:24

“Ewogo lyoyisima ngano tali kara mosirongo.”—Episarome 72:16

Wa ha genderera kunyokera eyi vana likida pomapenuno gana howo asi ngwendi magazaro tupu gomawoko-woko. Karunga ga tumbwidira mokukaretesa po yininke eyi, ntani Bibeli kufaturura omu nga ka yi rugana.

Nye Bibeli kufaturura yoyinzi kupitakana eyi. Azo kugava mpito koge mokuhafera eparu lyerago nampili ngesi. Gazadara ko nakauke kuhamena yinka nomaudigu ganyamoge. Kuvhura kukwatera mo epiro yimaliwa nomaudigu gemepata nomauvera, ndi nomfa domuhali. Bibeli kuvhura zi ku vatere mokulididimikira maudigu naina, ntani azo kuvhura kukupa rufuwo pokulimburura mapuro ngwendi gaga:

• Morwasinke atu hepere?

• Ngapi omu natu vhura kulididimikira yinka yeparu?

• Ngapi omu natu vhura kugwana ruhafo mepata lyetu?

• Yinke ayi tu horokere apa atu fu?

• Ngatu ka mona hena vahali vetu ava va fa ndi?

• Ngapi natu vhura kukara nousili asi Karunga nga ka sikisa mo matumbwidiro gendi gokomeho?

 Mokuresa koge buke ezi kulikida asi ove ngano ono hara kudiva eyi azi rongo Bibeli. Buke ezi ngazi ku vatera. Koneka asi noparagarafu kwa kara nomapuro gado konhi zepenuno. Mamiliyona kwa hafera ngendeseso zokuruganesa mapuro nomalimbururo pokuzogera Bibeli kumwe noNombangi daJehova. Tuna yi huguvara asi nove ngo yi hafera. Ngano Karunga a ku tungike moomu ngesi ono kuhafera sihorokwa sokutetukisa sokuhafesa pokulironga eyi azi rongo Bibeli sili!