1, 2. Kupi oku natu vhura kugwana egameno naina?

LIGAZARA tupu nyamoge kuna kugenda mositaura mekundungu. Eguru tali sovagana. Maruvadi taga tameke kuvema nokundunduma, makura mvhura tazi roko unene. To genderere neliturumo mokupapara egameno. Konontere dositaura, to mono uvando. Awo wa pama ntani kwa kukuta. Eh, omu no hara nye evango olyo lyepopero!

² Ose kuna kuparuka ngwendi mekundungu. Maukaro gouzuni kuna kudonapa unene. Nye pwa kara uvando wepopero ou nau vhura kutupopera koudona wokukarerera. Uvando musinke? Koneka eyi azi rongo Bibeli: “Kuvhura a tantere HOMPA asi: ‘Ove mugameni gwange nomupopeli gwange! Ove Karunga gwange, nyove na huguvara.’”—Episarome 91:2.

3. Ngapi omu natu vhura kutura Jehova mugameni gwetu?

³ Gazara tupu! Jehova, Musiti ntani Mupangeli gwanayinye, kuvhura kukara mugameni  gwetu. Age kuvhura kutupopera, morwa age munankondo-nkondo kupitakana nkenye ogu ndi nkenye eyi nayi vhura kutukoresa. Nampili vana tu koresa, Jehova kuvhura kugusa po yiretesopo yankenye udona. Ngapi omu natu vhura kutura Jehova mugameni gwetu? Twa hepa kumuhuguvara. Ntani, Nonkango daKarunga kutukorangeda asi: “Omu kare meharo lyaKarunga.” (Juda 21) Yimo, twa hepa kukara meharo lyaKarunga, kukara nelikwatakano lyeharo kumwe naGuhyetu gemeguru. Makura ose kuvhura kukara nehuguvaro asi age yige mugameni gwetu. Nye ngapi natu vhura kutura po elikwatakano lyangoso?

4, 5. Nonkedi musinke dimwe edi ga likida Jehova eharo kwetu?

⁴ Mokukara meharo lyaKarunga, twa hepa kunongonona omu ga tu likidire Jehova eharo. Gazara ko komarongo gamwe goBibeli wa lironga kumwe nevatero lyobuke ezi. NgoMusiti, Jehova ga tu pa evhu li kare embo lyetu lyewa. Age ga li zwida nomema nonondya dononzi, nougawo wopasintwe noyikorama yokutetura, ntani nomavango gomawa. NgoMutjangi goBibeli, Karunga ga tu horwera edina ntani noyikara yendi. Ntani Nonkango dendi kuhorora asi age ga tumine Munwendi geharo Jesus pevhu, a hepe nokutufira. (Johanesa 3:16) Yinke au tanta uhwi ou kwetu? Awo kutupa ehuguvaro lyomeho zokutetukisa.

⁵ Ehuguvaro lyetu lyokomeho kwa karera po hena sininke simwe esi ga tu ruganena Karunga. Jehova ga tulisa po epangero lyemeguru, Uhompa woUmesiyasa. Ntaantani ngau ka retere uhura koruhepo narunye nokuninka evhu li kare paradisa. Gazara tupu! Ose kuvhura ku ka paruka mo nombili ntani noruhafo narunye. (Episarome 37:29) Posiruwo esi, Karunga ga tu pa mavyukiso asi tu paruke ngesi monaruwa. Age hena ga tu pa uhwi wekanderero, ose kuvhura kuuyunga nendi nemanguruko. Edi nonkedi dimwe tupu dononsesu omu ga likida Jehova eharo kovantu navenye ntani koge.

6. Ngapi omu no limburura keharo eli ga ku likida Jehova?

 ⁶ Epuro lyomulyo no gazadara lyeli asi: Ngapi omu nani limburura keharo lyaJehova? Wovanzi kuuyunga asi: “Na hepa kurugwida mokumuhara Jehova.” Yimo ngoso o lizuvhu ndi? Jesus ga uyungire asi esi yiso sipango sosinene po: “O hare Hompa Karunga goge nomutjima goge nagunye nomwenyo goge nagunye nonondunge doge nadinye.” (Mateusa 22:37) Ove sili wa kara nonokonda dononzi mokuhara Jehova Karunga. Nye kulizuvha asi wa kara neharo lyangoso yilyo lyelike lya hamena mo mokuhara Jehova nomutjima nomwenyo nonondunge doge nadinye ndi?

7. Kulizuvha tupu eharo yiyo ya hepa po koge mokuuyunga asi wa hara Karunga ndi? Faturura.

⁷ Moomu va yi singonona moBibeli, eharo kwaKarunga kwa pitakana tupu elizuvho. Mousili, nampili elizuvho lyeharo kwaJehova mulyo, elizuvho olyo etameko tupu lyeharo lyosili kwendi. Ntanga zosiapere mulyo kekuro lyositji sosiapere sokuyima. Nampili ngoso, nsene ono hara siapere, ngano no yi hafera nsene gumwe a ku pa ntanga tupu zosiapere ndi? Hawe! Mokulifana, elizuvho lyeharo kwaJehova Karunga alyo etameko tupu. Bibeli kuronga asi: “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.” (1 Johanesa 5:3) Mokukara lyosili, eharo kwaKarunga lya hepa kuyima yiyimwa yoyiwa. Lya hepa kulilikida moyirugana.—Mateusa 7:16-20.

8, 9. Ngapi natu vhura kulikida eharo norupandu rwetu kwaKarunga?

⁸ Ose kulikida eharo lyetu kwaKarunga apa atu sikisa mo yipango nomagano gendi. Kapisi udigu unene kuyirugana. Mokupira kudigopa, noveta daJehova kwa di wapaika mokutuvatera tu paruke eparu lyewa lyoruhafo. (Jesaya 48:17, 18) Pokuparuka kuliza nevyukiso lyaJehova, ose kulikida Guhyetu gemeguru asi ose twa pandura sili nayinye eyi ga tu ruganena.  Eguwo, vasesu mouzuni wanaina ava likida rupandu rwangoso. Kapi tuna hara kukara wokudira rupandu, ngwendi vantu vamwe owo va parukire apa ga kere Jesus pevhu. Jesus kwa verwire vanayingondwe murongo, nye gumwe tupu ga ka tengwire nokuyamupandura. (Rukasa 17:12-17) Yosili ose ngano tuna hara kukara ngwendi gwina gorupandu, kapisi vena ntane wokudira rupandu!

⁹ Yipango yaJehova musinke twa hepa kusikisa mo? Twa zogera ko yoyinzi mobuke ezi, nye tu zeni tu rugurure ko yimwe. Mokusikisa mo yipango yaKarunga ngayi tu vatera mokukara meharo lyaKarunga.

10. Faturura asi morwasinke ya karera mulyo mokutwikira kulironga yokuhamena Jehova Karunga.

¹⁰ Kulironga kuhamena Jehova azo ntambo zomulyo mokumuhedera pepi. Azo ngendeseso ezi ngano azi dili kuhaga. Nsene ove ponze wa kere momasiku gomufu unene kuna kuligenyeka nyamoge komundiro, kuvhura ngano o sigilire mundiro gu dime ndi? Hawe. Ove ngano no tura  po yitare yipo mundiro gu hwame nawa ntani gu pyapyare. Eparu lyoge kuna hamene mo! Moomu tupu yitare ayi hwameke mundiro, “mokulironga yokuhamena kwaKarunga” kupameka eharo lyetu kwaJehova.—Yisewe 2:1-5.

11. Erongo lyaJesus, yitundwamo musinke lya reterere vasikuli vendi?

¹¹ Jesus kwa here vasikuli vendi va ninke eharo lyawo kwaJehova nokoNonkango dendi domulyo dousili li kare nomwenyo nononkondo. Konyima zevhumbuko lyendi, Jesus ga rongere varongwa vendi vavali kuhamena mauporofete gamwe moMatjangwa goRuhebeli aga ga sikilire mo mwendi. Noyitundwamo musinke? Awo va uyungire asi: “Ngapi tupu omu kadi hwama nomutjima detu apa ka uyunga nose monzira, a tu fwatwire matjangwa?”—Rukasa 24:32.

12, 13. (a) Movantu wovanzi naina, yinke yina horokere keharo kwaKarunga ntani nokoBibeli? (b) Ngapi omu natu vhura kukondera eharo lyetu mokutenda?

¹² Apa wa lirongere pomuhowo eyi azi rongo Bibeli sili, kapi wa konekere asi mutjima goge gwa tamekere kuhwama noruhafo noupampi ntani neharo kwaKarunga ndi? Yosili. Wovanzi va lizuvhire ngoso. Udigu kuna kara asi o ninke eharo lyoge lyenene li kare ngorooro nomwenyo nokulikulisa. Kapi tuna hara kukwama nkareso zouzuni wanaina. Jesus ga pumbire asi: ‘Eharo lyovantu wovanzi ngali tenda.’ (Mateusa 24:12) Ngapi omu no vhura kukondera eharo lyoge kwaJehova nokomausili goBibeli mokutenda?

¹³ Twikira mokugwana ediwo lyaJehova Karunga ntani lyaJesus Kristusa. (Johanesa 17:3) Teda, ndi gazadara unene, kweyi ono lirongo moNonkango daKarunga, nokulipura nyamoge asi: ‘Yinke yina kuronga nge eyi kuhamena Jehova Karunga? Konda musinke hena yina kupa nge mokumuhara nomutjima nonondunge ntani nomwenyo gwange nagunye?’ (1 Timoteusa 4:15) Etedo lyangoso ngali ninkisa eharo lyoge kwaJehova li hwame unene.

14. Ngapi nali vhura ekanderero kutuvatera mokuninka eharo lyetu kwaJehova li kare ngorooro nomwenyo?

¹⁴ Nkedi zimwe hena mokuninka eharo kwaJehova li hwame  ngorooro mokukanderera nkenye apa. (1 Vatesaronika 5:17) Megaununo 17 mobuke ezi, twa lironga asi ekanderero alyo uhwi wouwa wokutunda kwaKarunga. Moomu tupu malikwatakano govantu kuwapera mokuuyunga nkenye apa memanguruko, yimo nalyo elikwatakano lyetu kumwe naJehova kupyapyara ntani kupama apa atu kanderere kwendi nkenye apa. Ya kara mulyo asi kapisi tu pulisire makanderero getu ga kare gokudira kugazara—nonkango tupu edi atu ruguruka-ruguruka da hana elizuvho ndi ntanto zosili. Twa hepa kuuyunga naJehova ngamoomu munona ngano na uyunga noguhwe veharo. Yimo, ose twa hara kuuyunga nefumadeko, nye simpe nemanguruko nousili yokutunda komutjima. (Episarome 62:8) Elirongo lyoBibeli lyanyamoge ntani ekanderero lyokomutjima ago maruha gomulyo goukereli wetu, ntani ago kutuvatera mokukara meharo lyaKarunga.

15, 16. Morwasinke natu tarera sirugana sokuzuvhisa Uhompa ngwendi situmbukiro ntani ungawo?

¹⁵ Elirongo lyoBibeli lyanyamoge ntani ekanderero ayo yirugana youkereli eyi natu vhura kurugana pwanyoselike. Ngesi tu zeni tu tarurure ruha roukereli oru natu vhura kurugana moyitarameho: kuuyunga nava wopeke kuhamena mapuliro getu. Wa ligavera nare mausili gamwe goBibeli kumwe nava wopeke ndi? Nsene yimo, ove wa hafera situmbukiro sokutetukisa. (Rukasa 1:74) Apa atu ligavere mausili aga twa lironga kuhamena Jehova Karunga, ose kuna kurugana sirugana somulyo unene esi va gava koVakriste navenye wousili—aso sokuzuvhisa mbudi zongwa zoUhompa waKarunga.—Mateusa 24:14; 28:19, 20.

¹⁶ Mupositoli Paurusa kwa tere sirugana sendi ngwendi sininke somulyo, kwa si tumbwire asi ungawo. (2 Vakolinte 4:7) Kuuyunga novantu kuhamena Jehova Karunga ntani nositambo sendi aso sirugana sosiwa po ngano no vhura kurugana. Aso sirugana sokuruganena koMuhona gomuwa po, ntani aso kureta mauwa gomawa po. Mokulihameka  mosirugana esi, ove kuna kuvatera vantu wonomutjima donongwa mokuhedera pepi naGuhyetu gemeguru ntani nokutameka kugenda monzira zokomwenyo gwanarunye! Sirugana musinke sokuvhura kuhafesa kupitakana eyi? Kugwederera ko, kugavera umbangi kuhamena Jehova ntani Nonkango  dendi kuvhukisa epuro lyanyamoge ntani kunkondopeka eharo lyoge kwendi. Ntani Jehova kupandura elituromo lyoge. (Vahebeli 6:10) Mokulitura mo mosirugana sangoso kukuvatera mokukara meharo lyaKarunga.—1 Vakolinte 15:58.

17. Morwasinke sirugana sokuzuvhisa sa karere ngenderera naina?

¹⁷ Ya kara mulyo mokudiworoka asi sirugana zokuzuvhisa Uhompa aso songenderera. Bibeli kuuyunga asi: “O udise nonkango, o kovekede kuuyunga.” (2 Timoteusa 4:2) Morwasinke kukovekeda kuyirugana naina? Nonkango daKarunga kututantera asi: “Ezuva lyaHOMPA lyenene pepi lina kara, pepi-pepi kuna kugenderera kuwiza!” (Sefaniya 1:14) Yimo, siruwo kuna kugenderera kuwiza apa nga ka retera Jehova uhura kouzuni ou. Vantu va hepa kuvarondora! Va hepa kudiva asi ngesi siruwo sokuhorowora Jehova ngoMupangeli gwawo. Uhura kapi ngau ‘liranga.’—Habakuku 2:3.

18. Morwasinke twa kona kukarera Jehova moyitarameho melikwatakano kumwe noVakriste wousili?

¹⁸ Jehova kuna hara tu mu kerere moyitarameho melikwatakano kumwe noVakriste wousili. Yiyo nye Nonkango dendi adi uyunga asi: “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa tali hedere pepi.” (Vahebeli 10:24, 25) Mokuponga kumwe novapuli vakwetu komapongo goSikriste kutupa mpito zongwa mokuhamberera ntani nokukarera Karunga gwetu geharo. Ose hena kulitunga-tunga ntani kulikorangeda-korangenda.

19. Ngapi omu natu vhura kurugana mokunkondopeka malikwatakano geharo mombungakriste?

¹⁹ Mokulikwatakana kumwe novakareli wopeke vaJehova, ose kunkondopeka malikwatakano geharo noukaume mombungakriste. Mulyo mokupapara yikara yoyiwa mwawo, ngamoomu a yi papara Jehova mwetu. Wa ha ndindira esikiliromo movapuli vakweni. Diworoka asi navenye kwa kara ponontambo dokulisiga mekuro lyopampepo, ntani nkenye gumwe gwetu kuninka mapuko. (Vakorosi 3:13) Litura mo  mokutunga po ukaume kumwe nowo va hara unene Jehova, ntani ngo limona nyamoge kuna kukura pampepo. Yimo, kukarera Jehova novanavanyoko wopampepo ngayi ku vatera mokukara meharo lyaKarunga. Ngapi omu a futu Jehova owo ava mu kerere noulimburukwi yipo va kare meharo lyendi?

20, 21. Yisinke “mwenyo gwanarunye gosili,” ntani morwasinke gwa karera ehuguvaro lyewa?

²⁰ Jehova kufuta vakareli vendi wovalimburukwi pokuvapa mwenyo, nye mwenyo musinke? Ove sili ono kara nomwenyo ngesi ndi? Nhi. Morwa ose kuhesera nokulya ntani nokunwa. Yosili, twa kara nomwenyo. Nampili ngoso, Bibeli kulikida asi, monkareso zene-zene, kwato muntu ana kara sili nomwenyo naina.

²¹ Nonkango daKarunga kutanta asi vantu ‘ngava gwana mwenyo gwanarunye gosili.’ (1 Timoteusa 6:19) Nonkango odo kulikida asi ‘mwenyo gosili’ ago sininke simwe twa huguvara mokukagwana komeho. Yimo, apa ngatu ka sikilira mo, ngatu ka kara nomwenyo gwene-gwene, morwa ose ngatu ka kara nomwenyo moomu ga yi harerere Karunga. Ngatu ka kara nomwenyo gosili—mwenyo gwanarunye—apa ngatu ka kara moukanguki nomombili ntani nomoruhafo rwene-rwene moparadisa pevhu. (1 Timoteusa 6:12) Olyo kapisi ehuguvaro lyewa ndi?

22. Ngapi no vhura ‘kugwana mwenyo gwanarunye gosili’?

²² Ngapi omu natu vhura ‘kugwana mwenyo gwanarunye gosili’? Megaununo lyoolyo, Paurusa kwa tumangedere Vakriste asi “ava rugane yoyiwa” ntani “va gawope moyirugana yoyiwa.” (1 Timoteusa 6:18) Ya zere, eyi kuna kulikida asi mulyo kusikisa mo mausili aga twa lironga moBibeli. Paurusa kwa tembe asi ose kuvhura kuranda “mwenyo gwanarunye gosili” pokurugana yirugana yoyiwa ndi? Hawe, mokugwana kwetu meho zongwa zangoso kwa karera po sili ‘monkenda’ zaKarunga. (Varoma 5:15) Nampili ngoso, Jehova ga hara kufuta owo ava mu kerere moulimburukwi. Age kuna hara o  kare ‘nomwenyo gwanarunye gosili.’ Owo ava kara meharo lyaKarunga kuvhura kundindira mwenyo gwanarunye gwangoso goruhafo nombili.

23. Morwasinke ya karera hepero mokukara meharo lyaKarunga?

²³ Nkenye gumwe gwetu ga kona kulipura mwene asi: ‘Ame kuna kukarera Karunga monkedi ezi ga tura moBibeli ndi?’ Mokukara monzira zouhunga twa hepa kulikona-kona nyamwetu nkenye ezuva, nsene asi ose kuna kukarera Karunga monkedi zangoso. Tu kare nehuguvaro asi Jehova yige mugameni gwetu. Age nga popera vantu vendi wokulimburukwa momazuva goudigu gouhura wonkareso ezi. Jehova hena nga tu twara mouzuni woupe wouwa ou una kara pepi. Ruhafo musi ngaru ka kara mokukamona siruwo oso! Ntani ruhafo musi ngatu ka kara naro asi twa tulire po matokoro gouhunga momazuva aga gopouhura! Nsene o tura po matokoro gangoso ngesi, ngo ka hafera “mwenyo gwanarunye gosili,” moomu ga gu tu harerere Jehova Karunga, narunye-nanarunye!