MOKUTUVATERA tu dimburure Mesiyasa, Jehova Karunga ga ninkisire vaporofete wovanzi woBibeli mokugava nontanto dokuhamena ehampuruko nosirugana ntani nonomfa doMuparuli getumbwidiro. Mauporofete nagenye aga goBibeli ga ya sikilire  mo mwaJesus Kristusa. Ago gokuvyuka gonontanto dokutetukisa. Mokuyilikida eyi, tu zeni tu tarurure mauporofete gomasesu aga ga pumbire yihorokwa eyi ya lizire nehampuruko ntani nounona waMesiyasa.

Muporofete Jesaya kwa pumbire asi Mesiyasa ngano nga tunda moruvharo rwahompa Ndafita. (Jesaya 9:7) Jesus yosili kwa mu hampurukire mezimo lyaNdafita.—Mateusa 1:1, 6-17.

Muporofete gumwe gwaKarunga, Mika, ga pumbire asi munona  ogu ngano nga kara mupangeli ntani ngano ngava mu hampurukira ‘moBeterehema Efurata.’ (Mika 5:2) Posiruwo sehampuruko lyaJesus, pwa kere nodoropa mbali moIsraeli edi va rukire Beterehema. Zimwe kwa kere pepi naNasareta koMuzogo gosirongo, ntani zimwe pepi naJerusarema moJuda. Beterehema pepi naJerusarema kwa ya zi tumbwire asi Efurata. Jesus kwa mu hampurukire modoropa ozo, moomu tupu wa yi pumbire uporofete.—Mateusa 2:1.

Uporofete umwe woBibeli kwa pumbire asi MunwaKarunga ngano ngava “mu zigida mo moEgipite.” Munona Jesus kwa mu twere koEgipite. Kwa ka mu tengwidire konyima zonomfa daHerodesa, yipo uporofete u sike mo.—Hoseya 11:1; Mateusa 2:15.

 Mekarata pepenuno 200, matjangwa aga va tura konhi zosiparatjangwa “Uporofete” kwa kara nonontanto kuhamena Mesiyasa. Hetakanesa eyi kumwe nomatjangwa gana kara konhi zosiparatjangwa “Esikiliromo.” Mokurugana ngoso ngayi gwederera mokunkondopeka epuro lyoge mousili woNonkango daKarunga.

Pokukona-kona matjangwa aga, tura megano asi mauporofete gontundiliro kwa ga tjenge nomvhura mafere komeho zehampuruko lyaJesus. Jesus kwa tente asi: “Ngayi sika mo nayinye eyi ya hamena nge, eyi va tjanga moVeta zaMosesa nomomatjangwa govaporofete nomoMapisarome.” (Rukasa 24:44) Moomu no vhura kulimonena moBibeli zanyamoge, ago sili va ga sikisilire mo—mwankenye ntanto!