1. Yilye ga sitire yinamwenyo nayinye?

“OVE HOMPA, nyove Karunga gosili, ove nyove Karunga gomwenyo,” yimo ga tente muporofete Jeremiya. (Jeremiya 10:10) Kugwederera ko, Jehova Karunga yige Musiti goyinamwenyo nayinye. Yisitwa yemeguru kwa mu tanterere asi: “Nyove wa sita nayinye, ano mpango zoge yizo za pakesa po nayinye, yi pwe kusita.” (Ehororo 4:11) Morusumo rokuhamberera Karunga, hompa Ndafita kwa tente asi: “Ove nyove ntundiliro zomwenyo.” (Episarome 36:9) Yipo nye, mwenyo ndi eparu, uhwi wokutunda kwaKarunga.

2. Yinke a rugana Karunga mokuparura nomwenyo detu?

² Jehova hena kuparura nomwenyo detu. (Yirugana 17:28) Age kugava nondya edi atu li, nomema aga atu nu, nompepo ezi atu hesere, ntani nevhu eli twa kara. (Yirugana 14:15-17) Jehova kwa yi rugana eyi monkedi asi tu hafere eparu. Nye mokuhafera nawa-nawa eparu, twa hepa kulironga noveta daKarunga nokudilimburukwa.—Jesaya 48:17, 18.

3. Ngapi omu ga tere Karunga edipago lyaAbeli?

³ Karunga kuna hara tu fumadeke eparu—lyanyamwetu ntani neli lyava wopeke. Pasihonena, momazuva goAdamu naEva, munwawo Kaini ga handukilire unene mumbyendi Abeli. Jehova ga rondwere Kaini asi ehandu lyendi kuvhura  li mu twaredese konzo zonene. Kaini ga ncenwine erondoro lina. Age ‘kwa mbindumukilire mumbyendi, ta mu dipaga.’ (Genesis 4:3-8) Jehova ga futisire Kaini mokudipaga mumbyendi.—Genesis 4:9-11.

4. MoVeta zaMosesa, ngapi omu ga pamekere Karunga mutaro gokuvyuka geparu?

⁴ Konyima zonomvhura mayovi, Jehova ga pere Vaisraeli noveta dokuvavatera mokumukerera monaruwa. Noveta kwa di geve kupitira momuporofete Mosesa, yeeyi kuditumbura pamwe asi Veta zaMosesa. Veta zaMosesa zimwe kutanta asi: “Walye o dipaga.” (Deuteronomium 5:17) Eyi kwa likidire Vaisraeli asi eparu lyomuntu mulyo kwaKarunga ntani vantu va hepa kutara eparu lyovakwawo asi mulyo.

5. Ngapi omu natu tara kuligusa ezimo?

⁵ Ngapi kuhamena eparu lyomunona ana kara simpe mezimo? Kuliza noVeta zaMosesa, kuretesa po nomfa domukeke mezimo lyozina kwa kere epuko. Yosili, nampili eparu lyangoso mulyo kwaJehova. (Exodus 21:22, 23; Episarome 127:3) Eyi kutanta asi kuligusa ezimo epuko.

6. Morwasinke natu dilira kunyenga vakwetu?

⁶ Kukara nefumadeko keparu kwa kwatera mo kukara nomutaro gomuwa kovakwetu. Bibeli kutanta asi: “Nkenye ogu ga nyenga mukwawo, mudipagi. One mwa diva asi kutupu mudipagi asi, mwenyo gwanarunye gu kare mwendi.” (1 Johanesa 3:15) Nsene twa hara mwenyo gwanarunye, twa hepa kugusa mo monomutjima detu nkenye nyengo kovakwetu, morwa nyengo yizo ntundiliro zonyanya. (1 Johanesa 3:11, 12) Ya kara mulyo kulironga kulihara-hara.

7. Yiruganeso musinke yimwe eyi ayi dili kulikida efumadeko keparu?

⁷ Ngapi kuhamena kulikida efumadeko keparu lyanyamwetu? Vantu narunye kapi va hara kufa, nye vamwe kutura eparu lyawo mosiponga morwa malihafeso. Pasihonena, vamwe kuruganesa makanya ndi epangwe ndi nkenye yikwepangwe mokulihafesa. Yiruganeso yangoso kuzonagura rutu ntani rorunzi kudipaga ava ava yi ruganesa. Muntu ogo a  litura mo moyininke eyi kapi a tara eparu asi kwa pongoka. Yiruganeso oyo kwa nyata kosipara saKarunga. (Varoma 6:19; 12:1; 2 Vakolinte 7:1) Kukarera Karunga mokuwapera, twa hepa kusiga yiruganeso yangoso. Kuvhura yi kare udigu, nye Jehova kuvhura a tu pe evatero lyohepero. Ntani age kuhafera elituromo lyetu mokutara eparu lyetu ngosigava somulyo sokutunda kwendi.

8. Morwasinke natu karera nosinka sokulikunga?

⁸ Nsene twa kara nefumadeko keparu, ngatu kara nosinka sokulikunga. Kapi ngatu kara noumbondo ntani tu liture mosiponga morwa yilihafeso. Ngatu nyokera kusinga nouhesi ndi maudano gonyanya naga gosiponga. (Episarome 11:5) Veta zaKarunga koVaisraeli vanare kwa tente asi: “Nsene to tungu nzugo zompe, kara nosinka o kundurukide eguru lyozungo nomukindiro gekuma. Yimo nye ngoso ngo pira nzo zogu nga liganda ko, a fe.” (Deuteronomium 22:8) Mokuliza negano lyoveta ozo, yininke yokuvhura kureta siponga ndi nomfa, ngwendi yikaparwa nosera ntani nonomutji, twa hepa kuyipungura nawa. Nsene wa kara netuwa, li kare lyandjewa-ndjewa. Li kare embo ndi etuwa lyoge, lya ha kara siponga koge ndi kwava wopeke.

9. Nsene twa kara nefumadeko keparu, ngapi omu ngatu tekura yikorama?

⁹ Ngapi kuhamena eparu lyoyikorama? Nalyo kwa pongoka koMusiti. Karunga kupulisira edipago lyoyikorama mokugwanena ko nondya noyidwara ndi mokugamena vantu kosiponga. (Genesis 3:21; 9:3; Exodus 21:28) Nampili ngoso, kutekura yikorama nonyanya ndi kuyidipaga mawoko-woko epuko ntani kusensa upongoki weparu.—Yisewe 12:10.

10. Ngapi omu ga likida Karunga asi pwa kara egwanekedeso pokatji keparu nohonde?

¹⁰ Kaini konyima zokudipaga mumbyendi Abeli, Jehova ga tanterere Kaini asi: “Honde zamumbyoge kuna kukuga nge  mevhu.” (Genesis 4:10) Apa ga uyungire Karunga kohonde zaAbeli, age kwa tembe eparu lyaAbeli. Kaini ga gusire eparu lyaAbeli, ntani Kaini va hepere kumufutisa. Kwa fene ngwendi honde ndi eparu lyaAbeli kwa kugire Jehova a rugane ko yuma. Malikwatakano pokatji keparu ntani nohonde kwa ga likidire hena konyima zoRuhanzo momazuva gaNowa. Komeho zoRuhanzo, vantu ngava li tupu enyango noyikwahidi nonombuto ntani nonondongo. Konyima zoRuhanzo, Jehova ga tanterere Nowa novana vendi asi: “Yikorama nayinye noyimeno yoyitarara kulya tupu, tani yi mu pe yi kare nondya deni.” Nampili ngoso, Karunga ga tulire po esiliko eli: “Posili sininke simwe sokudira kulya one: azo nyama zina kara nohonde, ntundiliro zomwenyo.” (Genesis 1:29; 9:3, 4) Ya zera, Jehova kwa gwanekedesa nawa-nawa eparu nohonde.

11. Eruganeso musinke lyohonde ga silika Karunga kutundilira momazuva gaNowa?

¹¹ Ose kulikida efumadeko kohonde mokupira kuzilya. Moveta ezi ga pere Jehova Vaisraeli, age kwa pangerere asi: “Nsene to li nyama, honde nokuzilya si . . . Ano honde zazo zelike ngomu dira kulya, azo ngomu zi tjisire pevhu ngwendi mema.” (Deuteronomium 12:23, 24) Mpangera zaKarunga zokudira kulya honde zoyikorama, ezi va geve muhowo kwaNowa nomvhura 800 da ka pita, kwa kere simpe mosirugana. Mutaro gwaJehova kwa zerere: Vakareli vendi ngano va vhulire kulya nyama zoyikorama nye kapisi honde. Va hepere kutjisira honde pevhu, ngwendi mokurugwida eparu lyosisitwa kwaKarunga.

12. Mpangera musinke zokuhamena honde za geve mpepo zokupongoka mouye wokuhova ntani kuna kurugana simpe naina?

¹² Mpangera zokulifana kwa zi pa Vakriste. Vapositoli novagara vamwe ava ngava pitisire vasikuli vaJesus mouye wokuhova kwa pongere kumwe mokutokora nompangera edi va hepere kulimburukwa Vakriste navenye mombunga. Awo kwa ya tokwere asi: “Mpepo zoKupongoka nose kuna tokora asi, nokumupa si hena mudigo nagopeke, gwa hana asi gweyi yosikwafo, ngeyi: Walye omu li nondya  dokuzamba kovakarunga woyimpempa nohonde nonyama zokufa sinkumatere [morwa simpe kuna kara nohonde], walye omu hondere.” (Yirugana 15:28, 29; 21:25) Yipo nye ‘walye atu li honde.’ Kosipara saKarunga, mokudira kulya honde kwa kara mulyo ngwendi mokudira kukarera vakarunga woyimpempa nokuhondera.

13. Fanekesa asi morwasinke mpangera zokudira kulya ndi kunwa honde kwa kwatera mo etamburo honde.

¹³ Mpangera zokusilika kulya ndi kunwa honde kwa kwatera mo etamburo honde ndi? Yimo. Mokuyifanekesa: Tu ninke nye asi ndokotora ta ku tantere asi nokunwa si yikorwesa. Ngano oyo ngoso kuvhura yi tante nye asi ove nokunwa si marovhu nye kuvhura va ga ku vendwe mononsipa doge ndi? Kapisi yimo! Mokulifana, kupira kunwa ndi kulya honde kutanta asi nokuzitambura si momarutu getu mwankenye mukaro. Yipo nye mpangera zokudira kulya honde kutanta asi kapi ngano natu pulisira nkenye ogu a ture honde mononsipa detu.

14, 15. Nsene ndokotora a tanta asi Mukriste va kona kumutura honde, ngapi omu na vhura kurugana, ntani morwasinke?

¹⁴ Ngapi nsene Mukriste ana remana unene ndi ana hepa etauro lyenene? Tu ninke nye asi ndokotora ta tanta asi nsene kapi nava mu tura honde nga fa. Yosili, Mukriste ngano kapi na hara kufa. Mekondjo lyokupopera uhwi womulyo waKarunga weparu, ngano na tambura nkenye uhaku ou wa pira kuhamena mo eruganeso lyohonde mepuko. Age ngano na papara uhaku wangoso nsene pouli ntani ngano na tambura uhaku wokupinganena mo honde.

¹⁵ Ngano Mukriste na teze po veta zaKarunga mokuparuka simpe karuwogona mouzuni ou ndi? Jesus ga tente asi: “Ogu ga hara kuparura mwenyo gwendi [ndi eparu], nga gu zumbanesa, ano ogu a zumbanesere mwenyo gwendi mwarwange, yige nye nga gu gwana.” (Mateusa 16:25) Kapi tuna hara kufa. Nye nsene twa heteka kuparura eparu lyetu lyantani pokuteza po veta zaKarunga, ose  ngatu kara mosiponga sokukazumbanesa mwenyo gwanarunye. Kuvhura tu kare vanandunge mokutura ehuguvaro lyetu mouhunga woveta zaKarunga, nokudiva nawa-nawa asi nampili tu fe kwankenye eyi, Mugavi gwetu geparu nga ka tu diworoka mevhumbuko nokukatutengwidira uhwi wouwa weparu.—Johanesa 5:28, 29; Vahebeli 11:6.

16. Yinke ava tokora nononkondo vakereli vaKarunga kombinga zohonde?

¹⁶ Naina, vakereli wokulimburukwa vaKarunga kutokora nononkondo mokukwama mavyukiso gendi kuhamena honde. Kapi ngava zi lya mwankenye rupe. Kapi ngava tambura honde ngouhaku. * Awo va kara nousili asi Musiti gohonde ga diva yoyiwa ko kwawo. Wa yi pura ndi?

17. MoIsraeli zanare, eruganeso musinke lyohonde limwe ga tambwire Jehova Karunga?

¹⁷ Veta zaMoses kwa nkondopekere eruganeso lyohonde lyouhunga limwe tupu. Kombinga zoukereli ou wa hepere ko koVaisraeli vanare, Jehova kwa pangerere asi: ‘Mwenyo [ndi eparu] lyankenye sinamwenyo kwa kara mohonde, yiyo nye ga pangerere HOMPA asi, honde nazinye va zi tjisire kosizambero, zi guse po nonzo dombunga.’ (Levitikus 17:11) Apa ngava zono Vaisraeli, awo ngano va vhulire  kugwana edongwenenopo pokuzamba sikorama ntani nokutura honde zaso posizambero esi sa kere ponkongoronzugo, ntani konyima pontembeli zaKarunga. Eruganeso lyelike lyohonde lyouhunga kwa kere tupu mononzambo dangoso.

18. Mauwa ntani nomatungiko musinke ngatu gwana metjisango lyohonde zaJesus?

¹⁸ Vakriste wousili kapi vana kara moVeta zaMosesa yipo nye asi kapi ava zamba nonzambo doyikorama nokutura honde zoyikorama posizambero. (Vahebeli 10:1) Nampili ngoso, eruganeso lyohonde posizambero momazuva goVaisraeli vanare kwa fanekesere nzambo zomulyo zaMunwaKarunga, Jesus Kristusa. Ngamoomu twa yi lironga mEgaununo 5 mobuke ezi, Jesus ga geve eparu lyendi mokupulisira honde zendi va zi tjisange ngonzambo. Makura ga rondere meguru ntani parumwe tupu ga geve mulyo gohonde zendi zetjisango kwaKarunga. (Vahebeli 9:11, 12) Kwa  tulire po etateko lyedongwenenopo lyononzo detu nokupaturura mpito kwetu mokukagwana mwenyo gwanarunye. (Mateusa 20:28; Johanesa 3:16) Eruganeso olyo lyohonde kwa kara nomulyo unene! (1 Peturusa 1:18, 19) Kupitira mepuro tupu momulyo gohonde zaJesus zokutjika kuvhura tu gwane eparu.

19. Yinke twa kona kurugana yipo tu pire ‘nzo kovantu’?

¹⁹ Ngano tu pandure Jehova Karunga kouhwi weharo weparu! Oyo ngano kapi tayi tu tumangeda mokutantera ko vapeke kuhamena mpito zokugwana mwenyo gwanarunye kupitira mepuro monzambo zaJesus? Mokukara nosinka keparu lyovantu ngamoomu ga kara naso Jehova ngayi tu tumangeda mokuyirugana noupampi. (Hesekiyeli 3:17-21) Nsene tu sikisa mo nawa-nawa situmbukirwa esi, ngatu vhura kuuyunga, ngamoomu ga uyungire mupositoli Paurusa asi: “Nsene pweli ogu nga ka zumbana, kapisi nzo zange. Ame nayimwe si eyi na mu hupisira ko, nye na mu zuvhisira mpango nazinye zaKarunga zeparu.” (Yirugana 20:26, 27) Kutantera vantu kuhamena Karunga nositambo sendi azo nkedi zongwa mokulikida asi ose kufumadeka eparu nohonde.