1-3. Mapuro musinke ava pura vantu kuhamena nomfa, ntani malimbururo musinke ga gava maukerelikarunga gokulisiga-siga?

AGA yigo mapuro va gazara vantu konomvhura mayovi. Ago mapuro gomulyo. O kare yilye ndi kupi wa kara, malimbururo kwa kundama nkenye gumwe gwetu.

² Megaununo lya ka pita, twa zogerere mo omu nzambo zaJesus Kristusa zosizoweseso za gava mpito zokomwenyo gwanarunye. Twa lirongere hena asi Bibeli za pumba siruwo apa “nomfa kapi hena ngadi kara ko.” (Ehororo 21:4) Mosiruwo esi, natuvenye kufa. Hompa gonondunge Saromo kwa tente asi: “Vanamwenyo va diva asi ngava fa.” (Muudisi 9:5) Ose kuhetekera ko kuparuka paapa twa hulira. Nye simpe, ose kugazadara ko kweyi ngayi tu horokera apa ngatu fa.

³ Vahali vetu apa ava fu, ose kulira. Ose kuvhura kulipura asi: ‘Yinke yina va horokere? Awo kuna kuhepa ndi? Awo kutunomena? Kuvhura tu va vatere? Ngatu va mona hena ndi?’ Maukerelikarunga gomouzuni kugava malimbururo gokulisiga-siga komapuro aga. Gamwe kuronga asi nsene o paruka eparu lyewa, ngo za meguru nye nsene lyedona, ngo ka pya momundiro gwanarunye. Maukerelikarunga gapeke kuronga asi ponomfa, vantu kuza mosirongo sonompepo nokukakara kumwe novadimu. Ano maukerelikarunga gamwe kuronga asi vafe kuza kosirongo sokonhi mokukavapangura nokukavahampurukurura morutu rwapeke.

4. Egano musinke eli ga kara nago maukerelikarunga gomanzi kuhamena nomfa?

 ⁴ Marongo gomaukerelikarunga ngangoso nagenye kwa kara negano limwe tupu—asi posili sininke simwe mwetu esi asi paruka ponomfa dorutu. Konyara maukerelikarunga nagenye, ganare naga gantaantani, kuronga asi ose kuparuka narunye ponkedi zongandi nevhuliko lyokumona nokuzuvha nokugazara. Ngapi omu nayi vhura kukara ngoso? Mukaro gwetu, kumwe nomagano getu, kwa litwikakana merugano lyouruvi wetu. Uruvi kuhageka kurugana ponomfa. Magazaro nomalizuvho noukaro wetu kapi ayi rugana yelike monkedi zehoramo. Kapi ayi paruka ezonaguro lyouruvi wetu.

5, 6. Yisinke azi rongo Bibeli kuhamena mukaro govafe?

⁵ Eyi ayi horoka ponomfa kapi ya horama kwaJehova, Musiti gouruvi. Age ga diva usili, ntani moNonkango dendi, Bibeli, age ga singonona ukaro wovafe. Erongo lyazo lyokuzera lyeli: Apa a fu muntu, age kuhageka kukara po. Nomfa elilimbo lyeparu. Vafe nokuvhura si kumona ndi kuzuvha ndi kugazara. Mwato nampili sininke simwe mwetu esi asi paruka ponomfa dorutu. Kapi twa kara nomwenyo ndi nompepo za ha fu. *

⁶ Saromo konyima zokuyinongonona asi vanamwenyo va diva asi ngava fa, age ga tjenge asi: ‘Nye vafe kutupu eyi va diva.’ Age ga gwederere ko kousili wina mokuuyunga asi vafe nokuvhura si kuhara ndi kunyenga ntani asi mosirongo sovafe “mutupu magazaro ndi unongo ndi ediwo.” (Muudisi 9:5, 6, 10) Mokulifana, Episarome 146:4 kutanta asi apa ava fu vantu, “yigazo yawo nayinye tayi va pu.” Ose kufa ntani kapi atu paruka ponomfa domarutu getu. Eparu eli atu hafere kwa kara ngwendi mutwero gosera. Mutwero apa ava gu  dimisa, kapi agu zi kevega nalyopeke. Kapi agu kara po.

7. Jesus ngapi ga yi fatwilire omu da fana nomfa?

⁷ Jesus Kristusa ga uyungire ko kuhamena mukaro govafe. Age ga yi rugene kombinga zaRasarusa, mugara ogu ga divire nawa ogu ga fire. Jesus ga tanterere varongwa vendi asi: “Rasarusa mukwetetu kuna ponyoka.” Varongwa awo kwa gazarere asi Jesus kwa tembe asi Rasarusa kwa rere monompofu, yipo ngano a vhure kuveruka. Awo mepuko va kere. Jesus ga fatwilire asi: “Rasarusa ana fu.” (Johanesa 11:11-14) Nongonona asi Jesus kwa hetakanesere nomfa kokuponyoka ndi kokurara. Rasarusa kapi ga zire meguru ndi momundiro gwanarunye. Kapi ga gwanekerere novaengeli ndi novadimu. Rasarusa kapi va mu hampurukurwire ngomuntu gwapeke. Age kwa ponyokere monomfa, ngwendi monompofu dononene da hana nonzodi. Matjangwa gamwe nago kuhetakanesa nomfa kokurara. Pasihonena, Jesaya kuuyunga kowo “vana rara monontoko dawo.” (Jesaya 26:19) Mokulifana, Ndafita kwa tjenge kuhamena ‘kurara nompofu donomfa.’—Episarome 13:3.

8. Ngapi omu tuna yi diva asi kapi sa kere sitambo saKarunga asi vantu va fe?

⁸ Aso kwa kere nye sitambo saKarunga asi vantu va fe ndi? Hawe! Jehova kwa ungire vantu va paruke pevhu narunye. Moomu twa yi lirongere nare mobuke ezi, Karunga kwa tulire valikwali wokuhova moparadisa zongwa. Age kwa va tungikire noukanguki wokusikilira mo. Jehova kwa va harerere tupu uwa. Pweli mukurona geharo ga harera vana vendi  va hepe kokukora koukurupe nokonomfa ndi? Hawe! Jehova kwa here vana vendi ntani kwa va harerere va hafere erago lyanarunye pevhu. Bibeli za uyunga kuhamena vantu asi: “Yiruwo yanarunye [Jehova] kwa yi tura monomutjima dawo.” (Muudisi 3:11, NW) Karunga kwa tu sitire neharo lyokuparuka narunye. Ntani age ga gava mpito zokukasikisa mo eharo lina.

9. Esiliko musinke ga geve Jehova kwaAdamu, ntani morwasinke za dilire kukara mpangera ezi udigu kuzilimburukwa?

⁹ Morwasinke nye, ava fire vantu? Mokugwana elimbururo, twa kona kugazadara ko kweyi ya horokere apa va kere mugara nomukadi gumwe tupu pevhu. Bibeli kufaturura asi: “Karunga ta menesa mo yitji yomarudi peke-peke yoyiwa mokutara, eyi ngayi yimi enyango lyewa.” (Genesis 2:9) Nye, pwa kere esiliko limwe. Jehova ga tanterere Adamu asi: “Yiyimwa yokoyitji nayinye yomosikunino kulya tupu, ntudi yokositji esi asi gava ediwo lyeyi yoyiwa neyi yoyidona no. Siyimwa saso nokanunu si asi o si lye. Nsene ngo yi hetekera, ngo fa lyoolyo ezuva.” (Genesis 2:16, 17) Mpangera ezi kapi za kere udigu kuzilimburukwa. Mwa kere yitji yoyinzi oku ngano va vhulire kulya oAdamu naEva. Nye mpangera ezi za va pere mpito zokulikarera zokulikida rupandu rwawo kogu ga va pere nayinye, kukwaterera mo neparu lyokusikilira mo. Ulimburukwi wawo ngano hena wa likidire asi awo va fumadekere upangeli waGuhyawo gemeguru ntani asi va here mavyukiso gendi geharo.

10, 11. (a) Valikwali wokuhova ngapi omu va dilire kuyalimburukwa Karunga? (b) Morwasinke kudira kulimburukwa koAdamu naEva za karerere nzo zondigu?

¹⁰ Nye eguwo, valikwali wokuhova kwa horowere kudira kulimburukwa kwaJehova. Mokuuyunga kupitira mezoka, Satana ga pulire Eva asi: “Enye sili Karunga ga mu tantera asi walye omu li yiyimwa yokoyitji eyi ya kara mosikunino ndi?” Eva ta limburura asi: “Ose kuvhura kulya yiyimwa yokoyitji eyi yomosikunino, ntudi yokositji sopokatji no. Karunga kwa tanta asi, nokulya si siyimwa sokositji oso, ndi nampili kuguma kooku nokusiguma si; nsene tu yi hetekera, ngano ngatu fa.”—Genesis 3:1-3.

¹¹ Satana ta tanta asi: “Ndangako asi ngomu fe one. Karunga kwa yi tantera eyi morwa ga diva asi nsene ngomu lya ko, neisi ngomu gwana nondunge, ngomu mu fane  mokudiva yoyiwa neyi yoyidona.” (Genesis 3:4, 5) Satana kwa here Eva a pure asi nga gwanena mo uwa mokulya kenyango lyokusilika. Mokuliza naSatana, age ngano nga tokora mwene yoyiwa neyi yoyidona; ngano ga vhulire kurugana eyi ga here. Satana ga rundilire hena Jehova asi age ga kumbagerere kuhamena yitundwamo yokulya kositji. Eva ga pulire yaSatana. Age yipo ga gusire enyango ta li. Makura ta pe ko yendi, nage ta li. Kapi va yi rugene monkedi zokupira kudivira. Awo va yi divire asi va rugene eyi ga va silikire Karunga asi nokuyirugana si. Mokulya kenyango awo va tezere po mowina mpango zonderu zombili. Awo kwa sensere Guhyawo gemeguru ntani noupangeli wendi. Ediro efumadeko olyo koMusiti gwawo geharo kapi lya kere elipopero!

12. Yinke nayi vhura kutuvatera yipo tu kwate egano omu ga lizuvhire Jehova apa va kweme oAdamu naEva nzira zokumurwanesa?

 ¹² Mokuyifanekesa: Ngapi ngano omu no lizuvha nsenesi ove wa rera nokupakera mbili munoge ogu na ya dira kukulimburukwa monkedi zokulikida asi age kapi ga kara nefumadeko ndi neharo koge? Kuvhura yi ku retere kukora unene komutjima. Gazara tupu nye omu ngano ga lizuvhire Jehova kukora apa oAdamu naEva va kweme nzira zokumurwanesa.

13. Kuliza naJehova, yinke ngano ya horokera Adamu ponomfa, ntani yisinke ayi tanta eyi?

¹³ Jehova kapi ga kere nokonda zokuparukisa narunye oAdamu naEva wokudira kulimburukwa. Awo va fire, ngamoomu ga yi uyungire. Adamu naEva va hagekere kukara po. Awo kapi va rundurukilire kosirongo sonompepo. Eyi twa yi diva morwa yeeyi ga tanterere Jehova Adamu konyima zokumupangura koudili ulimburukwi wendi. Karunga ga uyungire asi: “Ngo tengwira mevhu omu va ku gusa. Yeeyi ove kwa tunda mevhu, makura ngo kara hena evhu.” (Genesis 3:19) Karunga ga ruganesere evhu a unge Adamu. (Genesis 2:7) Komeho zoyo, Adamu kapi ga kere po. Makura apa ga uyungire Jehova asi Adamu nga kara hena evhu, kwa tembe asi Adamu nga tengwira hena koukaro wokupira kukara po. Adamu ngano ga pilire eparu ngombundu zevhu oku va mu gusire.

14. Morwasinke atu fire?

¹⁴ Adamu naEva ngano kuna kuparuka ngesi, nye awo va fa morwa kwa tokwere kudira kulimburukwa kwaKarunga makura yipo va zonene. Konda ezi atu fire zeezi asi ruvharo narunye rwaAdamu kwa pinga nzo zendi nonomfa. (Varoma 5:12) Nzo ozo ngwendi uvera woudona wokupinga ou na pira kuvhura kuhenduka nkenye gumwe. Yitundwamo yazo, nomfa, ado efingiliro. Nomfa ado nkore, kapisi kaume. (1 Vakolinte 15:26) Ngano tu pandure Jehova mokutupa sizoweseso mokutuzowora konkore ezi zonyanya!

15. Kudiva usili kuhamena nomfa, morwasinke ayo kuhengagwida?

¹⁵ Eyi azi rongo Bibeli kuhamena mukaro govafe  kuhengagwida. Moomu tuna yi mono, vafe kapi ava hepa ndi va zuvhe kukora komutjima. Kwato hepero kuvatjira yeeyi awo nokuvhura si kutuhepeka. Awo kapi va hepa mbatero zetu, ntani nokuvhura si kutuvatera. Ose nokuvhura si kuuyunga nawo, ntani awo nokuvhura si kuuyunga nose. Vapitisili womaukerelikarunga gomanzi kukumbagera mokuuyunga asi awo kuvhura kuvatera ava va fa, ntani vantu ava ava pura vapitisili owo kuvafuta yimaliwa. Mokudiva usili kutuvatera mokudira kutupukisa owo ava rongo yimpempa ngoyo.

16. Yilye ga yipika marongo gomaukerelikarunga gomanzi, ntani monkedi musinke?

¹⁶ Ukereli woge nawo kukwatesa ko kweyi azi rongo Bibeli kuhamena vafe ndi? Sinzi sago kapi aga yi kwatesa ko. Morwasinke? Morwa Satana ga yipika marongo gawo. Age kuruganesa maukerelikarunga goyimpempa mokuninka vantu va pure asi konyima zokufa marutu gawo, awo ngava ka twikira kukaparuka mosirongo sonompepo. Eyi yimpempa eyi ga tura Satana kumwe noyimpempa yikwawo mokugusa vantu kwaJehova Karunga. Ngapi ngoso?

17. Erongo lyehepeko lyanarunye, morwasinke ali swawisisa Jehova?

¹⁷ Moomu tuna yi didilike nare, maukerelikarunga gamwe kuronga asi muntu nsene a paruka eparu lyedona, konyima zonomfa nga za moruhepo romundiro gwanarunye. Erongo eli kuswawisisa Karunga. Jehova age Karunga geharo ntani narumwe si nga hepeka vantu monkedi ezi. (1 Johanesa 4:8) Ngapi ngano omu no lizuvha kuhamena mugara gokufutisa munona gokudira kulimburukwa pokutura kuwoko kwendi momundiro? Kuvhura o fumadeke mugara gwangoso? Ove ngano no hara kutura po ukaume nendi ndi? Hawe! Ove ngano ngo gazara asi age nyanya sili. Nampili ngoso, Satana kuna hara tu pure asi Jehova kuhepeka vantu narunye momundiro.

18. Yimpempa musinke youkerelikarunga ya kara etateko lyokukarera vafe?

¹⁸ Satana kuruganesa hena maukerelikarunga gamwe mokuronga  asi konyima zonomfa vantu kulisintunuka vadimu, ava va hepa kuvafumadeka vanamwenyo. Kukwama erongo eli, nompepo dovafe kuvhura di kare vakaume wononkondo ndi nonkore dokutjilisa. Sinzi sovantu kupura yimpempa eyi. Awo kutjira vafe nokuvafumadeka ntani kuvakarera. Mokulisiga, Bibeli azo kuronga asi vafe awo kwa rara ntani twa kona kukarera Karunga gosili gelike, Jehova, Musiti noMugavi gwetu.—Ehororo 4:11.

19. Kudiva usili kuhamena vafe kutuvatera mokukwata egano erongo musinke lyoBibeli?

¹⁹ Kudiva usili kuhamena vafe kukupopera mokudira kukupukisa yimpempa yomaukerelikarunga. Awo kukuvatera mokukwata egano marongo gapeke goBibeli. Pasihonena, apa ono dimburura asi ponomfa vantu kapi ava zi mosirongo sonompepo, etumbwidiro lyomwenyo gwanarunye pevhu moparadisa tali kara nontanto zosili koge.

20. Epuro musinke ngatu ka zogera megaununo lyokukwama ko?

²⁰ Nare-nare, mugara gomuhungami Joba ga retesere po epuro eli: “Muntu nsene ana fu, kuvhura hena a tengwire komwenyo ndi?” (Joba 14:14) Muntu gokupira eparu ogu ana rara monompofu donomfa kuvhura a paruke hena ndi? Eyi azi rongo Bibeli kuhamena eyi alyo ehengagwido lyenene, moomu ngali ka yi likida egaununo lyokukwama ko.