BIBELI kapisi yizo ntundiliro zomapwizumuko gouzuni naga gomaukereli aga vana kudana nakunye naina. Yinke nye ntundiliro zomadano ngangoso? Nsene ove kuvhura kupapara mobibiliyoteka, ngo ka yi hafera mokukoneka eyi adi uyunga nobuke kuhamena mapwizumuko aga ga divikwa oku wa tunga. Tarurura yihonena yimwe.

Mavhumbukiro. The Encyclopædia Britannica kutanta asi: “Mwato mEtestamende lyEpe mwa likida asi ngava dana sipito soMavhumbukiro.” Ngapi omu ga tamekere Mavhumbukiro? Ago kwa ga gusa moukereli woupagani. Epwizumuko eli kulitanta asi kudiworoka evhumbuko lyaJesus, nye nompo edi da likwatakana noMavhumbukiro kapisi doSikriste. Pasihonena, kuhamena “ndimba goMavhumbukiro,” The Catholic Encyclopedia kutanta asi: “Ndimba age sidiviso soupagani ntani aso narunye sinongweneso sokureta ruvharo.”

Sipito soMumvho goMupe. Ezuva nonompo edi da likwatakana kumwe nedano lyoMumvho goMupe kwa lisiga-siga moyirongo. Kuhamena ntundiliro zosipito esi, The World Book Encyclopedia kutanta asi: “Mupangeli goVaroma Julius Caesar kwa tulisire po Murongagona 1 ngezuva lyoMumvho gomupe mo-46 S.N. Varoma kwa li geve ezuva eli kwaJanus, sikarunga sonoheka nonomuvero ntani nomatamekero. Kwedi kwaMurongagona kwa ku rukire Janus, ogo ga kere noyipara yivali—simwe sokutara komeho ntani sikwawo sokutara konyima.” Yipo nye sipito soMumvho gomupe kwa si gwana monompo dovapagani.

Mapwizumuko gapeke. Kapisi ureru kuzogera madano nagenye aga ava rugana mouzuni naunye. Nye mapwizumuko aga aga fumadekesa vantu ndi nombunga dovantu kapi a ga tambura Jehova. (Jeremiya 17:5-7; Yirugana 10:25, 26) Diworoka hena asi, ntundiliro zomadano gomaukereli kulikida asi nsene ago kuhafesa Karunga ndi hawe. (Jesaya 52:11; Ehororo 18:4) Magano gomoBibeli aga va tumbura mEgaununo 16 lyobuke ezi naga ku vatera mokutokora omu Karunga a tara elihamekomo momapwizumuko gouzuni.