1, 2. Ruhepo musinke ava ligwanekere naro vantu naina, nokutwaredesa wovanzi va pure mapuro musinke?

KONYIMA zerwanangano lyedona mosirongo omu ya kara yita, vakadi novanona mayovi ava va dipagere kwa va vhumbikire mekero lyenene eli va kundurukidire yikurusegona. Nkenye sikuruse kwa kere nosidiviso esi asi: “Morwasinke?” Pamwe vantu kupura epuro eli mokulikida kukora kwawo. Awo kulipura neguwo apa yita noyimpagwa nouvera ndi ukorokotji ayi dipaga vahali vawo wokudira nzo, kuzonagura mambo gawo, ndi kuvaretera maruhepo gomanene mononkedi dapeke. Va hara kudiva asi morwasinke ayi va horokere yimpagwa yangoso.

² Morwasinke ga pulisira Karunga ruhepo? Nsene si Jehova Karunga age munankondo-nkondo nomuneharo nomunongo nomuhungami, morwasinke uzuni wa zulira nonyengo nouhahungami? Ove wa ligazadara ko nyamoge kuhamena yininke eyi ndi?

3, 4. (a) Yinke ayi likida asi kapisi epuko kupura asi morwasinke a pulisire Karunga ruhepo? (b) Ngapi omu a lizuvhu Jehova kuhamena udinikarunga noruhepo?

³ Ya kara epuko mokupura asi morwasinke a pulisire Karunga ruhepo ndi? Vamwe kwa kara nosinka asi kupura epuro lyangoso kulikida asi awo kapi va kara nepuro ndi asi awo  kuna kuswaura Karunga. Nye pokuresa moBibeli, ngo ka gwana asi vatjiliKarunga wovalimburukwi nawo va kere nomapuro gokulifana. Pasihonena, muporofete Habakuku kwa pulire Jehova asi: “[Yinke] ono ninkire nge ni mone udigu wokufana ngesi? Ngapi omu no vhura kulididimikira kutara yirugana yoyidona ngeyi? Ezonauko nepiyagano kuna kundurukida nge. Mwarwanambo nonomutangu, kuna kara nakunye.”—Habakuku 1:3.

⁴ Jehova ga handukililire muporofete gomulimburukwi Habakuku mokupura mapuro ngangosina ndi? Hawe. Karunga ga tulire nonkango edi donongwa daHabakuku moBibeli. Ntani Karunga ga mu vaterere mokuyikwata nawa egano nokugwederera kepuro lyendi. Jehova ana hara kurugana yokulifana koge. Diworoka, Bibeli kuronga asi ‘age kukupakera mbili.’ (1 Peturusa 5:7) Karunga ga nyenga udinikarunga noruhepo oru au reta kupitakana omu va yi nyenga vantu. (Jesaya 55:8, 9) Nsene ngoso, morwasinke pwa karera ruhepo rorunzi mouzuni?

5. Nokonda musinke ava gava pamwe mokufaturura ruhepo rovantu, nye yinke azi rongo Bibeli?

⁵ Vantu wokomaukereli gokulisiga-siga kwa hedera  vapitisili novarongi vawo mokupura asi morwasinke pwa karera ruhepo rorunzi. Rorunzi, awo kuvalimburura asi ruhepo aro mpango zaKarunga ntani asi age nare-nare ga tokwere nayinye ngano ngayi horoka, rambangako noyimpagwa. Wovanzi kuvatantera asi nonzira daKarunga kwa horama ndi asi age kuretera nomfa kovantu, nampili kovanona, yipo asi va ka kare nendi meguru. Nye ngamoomu wa lirongere, Jehova Karunga narumwe si a retesa po udona. Bibeli kuuyunga asi: “Karunga Munankondo kapi a rugana yoyidona; age hena kapi a pengesa uhungami komuntu gongandi.”—Joba 34:12.

6. Morwasinke ava lipukire vantu wovanzi mokupa Karunga usima koruhepo romouzuni?

⁶ Wa diva asi morwasinke ava lipukire vantu mokupa Karunga usima koruhepo narunye romouzuni ndi? Rorunzi, awo kupa Karunga Munankondo nadinye usima morwa awo kugazara asi yige sili mupangeli gouzuni ou. Awo kapi va diva usili umwe woureru nye womulyo ou azi rongo Bibeli. Wa lirongere usili ou mEgaununo 3 mobuke ezi. Mupangeli mwene-mwene gouzuni ou yige Satana Muzonaguli.

7, 8. (a) Ngapi omu au monekesa uzuni nkareso zomupangeli gwawo? (b) Ngapi omu kupira kusikilira mo kovantu ntani “ehudi” lyohararasi ya gwederera koruhepo?

⁷ Bibeli sili za tanta asi: “Uzuni mudima kwa kara mepangero lyoMuzonaguli.” (1 Johanesa 5:19) Nsene o yi gazadara, ureru kuyikwata egano. Uzuni ou kumonekesa nkareso zosisitwa esi sopampepo sokudira kumoneka sina ‘kupukisa uzuni naunye.’ (Ehororo 12:9) Satana age munanyengo nomukumbageli ntani nonyanya. Yipo nye uzuni, mepukiso lyendi, kwa zura nonyengo nekumbagero ntani nonyanya. Ozo yizo konda zimwe eyi pwa karera ruhepo rorunzi.

⁸ Konda zauvali eyi pwa karera ruhepo rorunzi kwa kara asi: Kutundilira merwaneso mosipata saEdeni vantu kapi va sikilira mo awo hena vananzo, ngomu va yi zogera mEgaununo 3. Vantu wononzo kwa kara ngwendi neharo lyokukondja va pangere, ntani eyi kuretesa po yita nomahepeko ntani noruhepo. (Muudisi 4:1; 8:9) Konda zautatu zoruhepo zezi  asi “ehudi kuhorokera nkenye ogu.” (Muudisi 9:11) Mouzuni wa hana Jehova ngoMupangeli gomupopeli, vantu kuvhura va hepe morwa awo kuna kara tupu pevango lyongandi posiruwo sosimpagwa.

9. Morwasinke natu karera nousili asi Jehova ga kara nokonda zongwa zokupulisira ruhepo ru twikire?

⁹ Ayo ehengagwido kwetu mokudiva asi Karunga kapi a retesa po ruhepo. Kapisi yige ga retesa po yita noukorokotji nomaheteko ndi nampili yimpagwa eyi ayi retere vantu ruhepo. Simpe, twa hepa kudiva asi: Morwasinke ga pulisira Jehova ruhepo oru narunye? Nsene si age Munankondo nadinye, ga kara nononkondo dokuruhagekesa po. Nye morwasinke a dilire kudiruganesa? Karunga geharo ogu twa ya diva ga kona kukara nokonda zongwa.—1 Johanesa 4:8.

10. Yisinke ga homwene Satana, ntani nangapi?

¹⁰ Mokudiva eyi a pulisire Karunga ruhepo, twa hepa kugazara kosiruwo esi rwa tamekere ruhepo. Apa ga pitisilire Satana Adamu naEva mokudira kulimburkwa kwaJehova, kwa retesere po epuro lyomulyo. Satana kapi ga homwene nonkondo daJehova. Nampili Satana ga diva asi nonkondo daJehova nokudiyereka si. Nye, Satana kwa homwene uhunga waJehova wokupangera. Mokutumbura Karunga munayimpempa ogu a horeke uwa kovapangerwa vendi, Satana kwa rundilire asi Jehova mupangeli gomudona. (Genesis 3:2-5) Satana kwa homwene asi vantu ngano tava kara hansa pwa hana upangeli waKarunga. Eli kwa kere ehomono koupangeli waJehova, kouhunga wendi wokupangera.

11. Morwasinke ga dilire kuzonagura po Jehova varwanesi moEdeni?

¹¹ Adamu naEva kwa rwanesere Jehova. Awo kwa uyungire ngwendi asi: “Kapi twa hepa Jehova ngoMupangeli gwetu. Ose kuvhura kutokora nyamwetu asi yipi yoyiwa neyi yoyidona.” Ngapi ngano Jehova na hagekesa po nompata odo? Ngano ngapi omu na ronga yisitwa yonondunge nayinye asi varwanesi kwa kere mepuko ntani asi nzira zendi yizo zongwa?  Vamwe kuvhura va uyunge asi Karunga ngano ga zonagwire po varwanesi poopo nokutamekera ko hena. Nye Jehova ga divisire nare sitambo sendi sokuzwida evhu novana va Adamu naEva, ntani age kwa here va paruke moparadisa pevhu. (Genesis 1:28) Jehova narunye kusikisa mo sitambo sendi. (Jesaya 55:10, 11) Kugusa ko oyo, mokuzonagura po varwanesi moEdeni ngano kapi ya limbwilire epuro eli va tulisire po kuhamena uhunga waJehova wokupangera.

12, 13. Fanekesa asi morwasinke ga pulisira Jehova Satana mokukara mupangeli gouzuni ou, ntani morwasinke ga pulisira Karunga vantu va lipangere vene.

¹² Tu zeni tu tarurure sifanekeso. Gazadara asi murongi kuna kutantera varongwa vendi omu nava kohonona po udigu wounene. Murongwa gonondunge nye age murwanesi ta tanta asi nkedi zomurongi zokukohonona po udigu azo epuko. Mokulikida asi murongi kapi ga wapera, murwanesi ogu ta tanta asi age ga diva nkedi zongwa zapeke mokukohonona po udigu. Varongwa vamwe tava gazara asi age mouhunga, ntani nawo hena tava kara varwanesi. Ngano yinke na rugana murongi? Nsene a pwagesa mo varwanesi monkondwarongero, ngapi omu nayi kundama varongwa vapeke? Ngano kapi nava yi pura asi murongwa mukwawo ntani nava vana lipakerere  nendi mouhunga vana kara ndi? Varongwa navenye wopeke monkondwarongero kuvhura va dire kufumadeka hena murongi, nokugazara asi age kuna kara nowoma mokumulikida asi age mepuko ana kara. Tu ninke nye asi murongi ta pulisire murwanesi a likide varongwa omu age ngano na kohonona po udigu.

¹³ Jehova ga rugana yokulifana neyi ga rugana murongi. Diworoka asi varwanesi moEdeni kapisi velike va hamenene mo. Mamiliyona govaengeli va yi tere. (Joba 38:7; Ndaniyera 7:10) Nkedi zaJehova zokugusa po erwaneso ngano tayi gumu unene vaengeli navenye vena ntani noyisitwa nayinye yonondunge. Yinke nye ga rugana Jehova? Age ga pulisira Satana mokulikida omu ngano na pangera vantu. Ntani Karunga ga pulisira vantu va lipangere vene mepitisiro lyaSatana.

14. Uwa musinke ngau tunda ketokoro lyaJehova lyokupulisira vantu va lipangere vene?

¹⁴ Murongi mosifanekeso setu ga diva asi murwanesi novarongwa wokulipakerera nendi mepuko vana kara. Nye age ga diva hena asi mokuvapulisira va heteke kulikida egano lyawo ngayi retera varongwa navenye uwa. Apa ayi va yipire varwanesi, varongwa navenye wokuhuguvara ngava mona asi murongi yige gelike ga wapera kupitisira varongwa. Awo ngava yi kwata egano eyi murongi na pwagesera mo nkenye murwanesi monkondwarongero. Mokulifana, Jehova ga diva asi vantu novaengeli navenye wonomutjima donongwa ngava gwanena mo uwa pokumona asi Satana novarwanesi vendi yina va yipire ntani asi vantu nokuvhura si kulipangera vene. Ngwendi Jeremiya, awo ngava lironga usili ou womulyo: “HOMPA, ame na diva asi nzira zovantu kapi za kara mepangero lyamwene; kutupu ogu a pangere kukaramwenyo kwamwene.”—Jeremiya 10:23.

15, 16. (a) Morwasinke ga pulisira Jehova ruhepo ru twikire siruwo sosire? (b) Morwasinke ga dira kukandana po Jehova yininke ngwendi ukorokotji woudona?

¹⁵ Morwasinke nye ga pulisira Jehova ruhepo ru twikire  siruwo sosire? Ntani morwasinke a dili kukandana yininke yoyidona mokuhoroka? Tarurura tanko yininke yivali eyi murongi gomosifanekeso setu ngano na dira kurugana. Somuhowo, age ngano kapi na hagekesa murongwa gomurwanesi mokufaturura ekohonono lyendi. Sauvali, murongi ngano kapi na vatera murwanesi mokulikida egano lyendi. Mokulifana, tarurura yininke yivali eyi Jehova ga tokora mokudira kurugana. Somuhowo, age kapi ga hagekesa Satana nava va lipakerera nendi mokuhetekera kulikida asi awo mouhunga. Mokupulisira siruwo si pite kwa kere nohepero. Mehistoli lyawo lyonomvhura mayovi, vantu va hetekera ko nkenye rupe rwepangero mokulipangera vene. Vantu va tura po ezokomeho moukonentu ntani nomononkedi dimwe dapeke, nye uhahungami noruhepo noukorokotji ntani noyita kwa vhuka unene. Va yi likida nawa-nawa asi vantu nokuvhura si kulipangera vene.

¹⁶ Sauvali, Jehova kapi ga vatera Satana mokupangera uzuni ou. Pasihonena, nsene a kandana po Karunga ukorokotji woudona, ngano age kapi ana kukwatesa ko egano lyovarwanesi ndi? Karunga kapi ngano nga ninkisa vantu va gazare asi pamwe kuvhura kulipangera vene pwa hana yitundwamo yomaudona ndi? Nsene si Jehova ga lihameka mo, age ngano ta kara mukwatesiko goyimpempa. Nye ‘Karunga nokuvhura si kutanta yimpempa.’—Titusa 1:2.

17, 18. Yinke nga ka rugana Jehova kuhamena udona naunye ou wa tunda mepangero lyovantu ntani nemepukiso lyaSatana?

¹⁷ Ngapi nye kuhamena udona naunye ou va rugana mosiruwo serwaneso lyaKarunga? Twa hepa kudiworoka asi Jehova yige munankondo nadinye. Yipo nye, age kuvhura ntani nga ka gusa po yitundwamo yoruhepo rovantu. Ngamoomu twa lirongere nare, ezonaguro lyevhu ngava ka li wapukurura nokukalininka li kare Paradisa. Yitundwamo yononzo ngava ka yi gusa po kupitira mepuro lyomonzambo zaJesus zosizoweseso, ntani yitundwamo yonomfa ngava yi gusa po kupitira mevhumbuko. Karunga nga ka ruganesa Jesus ‘mokukaharaganesa  po yirugana yoMuzonaguli.’ (1 Johanesa 3:8) Jehova nga ka yi sikisa mo nayinye eyi posiruwo sokuwapera. Ose kuvhura tu hafe asi age kapi ga yi rugana nare; kulididimikira kwendi kwa tu pa mpito zokulironga usili nokumukarera. (2 Peturusa 3:9, 10) Mosiruwo esi, Karunga kwa litura mo mokupapara vakereli wosili nomokuvavatera mokulididimikira nkenye ruhepo oru ava ligwanekere naro mouzuni ou woudona.—Johanesa 4:23; 1 Vakolinte 10:13.

¹⁸ Vamwe kuvhura va lipure asi: Ngano Karunga kwa sitire Adamu naEva monkedi zokupira kurwanesa, ngano kapi ga kandanene po ruhepo oru narunye ndi? Mokulimburura epuro olyo, wa hepa kudiworoka uhwi wouwa ou ga ku pa Jehova.

19. Uhwi musinke wouwa ga tu pa Jehova, ntani morwasinke natu vhulira kuuhara?

¹⁹ Ngamoomu va yi didilika mEgaununo 5, vantu kwa va sitilire nemanguruko lyokutura po matokoro gavene. Ono nongonona mulyo gouhwi ou ndi? Karunga kwa sitire yikorama yoyinzi, ntani ayo kwa kara nonondunge dokurugana yuma ya hana kugazara. Vantu kwa rugana mahina gamwe gokuvhura kurugana tupu eyi va ga wapaikira. Ose ngano twa hafa ngano Karunga kwa tu unga ngoso ndi? Hawe, ose twa hafa mokukara nemanguruko lyokutura po matokoro kuhamena muntu musinke twa hara tu ka kare, nzira musinke zeparu zokukwama, ntani malikwatakano musinke gokutura po, ntani nangoso. Ose twa hafera mokukara nemanguruko lyokutura po matokoro, ntani oyo yiyo ana hara Karunga tu yi hafere.

20, 21. Ngapi omu natu vhura kuruganesa uhwi wemanguruko monaruwa, ntani morwasinke natu harera kuyirugana ngoso?

 ²⁰ Jehova kapi ga hara tu mu kerere mesinininko. (2 Vakolinte 9:7) Mokuyifanekesa: Yinke ngano nayi hafesa unene mukurona—munona ana kuuyunga asi “mpandu” morwa kwa mu tantera mokuyiuyunga ndi yokutundilira komutjima? Epuro lyeli asi: Ngapi ove omu no ruganesa emanguruko eli ga ku pa Jehova? Satana naAdamu ntani naEva kwa ruganesere emanguruko lyawo momudona. Awo kwa nyokere Jehova Karunga. Ove yinke ngo rugana?

²¹ Ove wa kara nompito mokuruganesa uhwi wouwa wemanguruko lyokutura po matokoro monaruwa. Ove kuvhura kuhamena kwava va kwaterera kwaJehova. Awo kuhafesa Karunga morwa kwa litura mo unene mokulikida asi Satana munayimpempa ntani asi age mupangeli gomudona. (Yisewe 27:11) Nove kuvhura o yi rugane oyo mokuhorowora nzira zouhunga zeparu. Eyi ngava ka yi faturura megaununo lyokukwama ko.