1. Morwasinke lya hundilire erenga lyomoEtiyopiya ekuho?

“MEMA gaga, yinke hena nayi limba po kukuhwa nge?” Olyo epuro yilyo lya pulire erenga lyomoEtiyopiya mouye  wokuhova. Mukriste gedina Filipusa kwa mu likidire asi Jesus kwa kere Mesiyasa getumbwidiro. Eyi ga lirongere moMatjangwa ya mu gumine komutjima, makura mugara goMuetiyopiya ga rugene ko yuma. Ga hundilire asi va mu kuhwe!—Yirugana 8:26-36.

2. Morwasinke wa kona kugazara unene kuhamena ekuho?

² Nsene wa lironga nawa-nawa magaununo gokuhova gobuke ezi nagumwe goNombangi daJehova, kuvhura o lizuvhe mokupura asi: ‘Yinke hena nayi limba po kukuhwa nge?’ Wa lironga nare kuhamena etumbwidiro lyoBibeli lyomwenyo gwanarunye moParadisa. (Rukasa 23:43; Ehororo 21:3, 4) Wa lironga hena kuhamena ukaro wousili wovafe ntani ehuguvaro lyevhumbuko. (Muudisi 9:5; Johanesa 5:28, 29) Pamwe walye wa lipakerera kumwe noNombangi daJehova komapongo gawo ntani wa yi limonena nyamoge omu ava rugana ukereli wousili. (Johanesa 13:35) Yomulyo po, pamwe wa tameka kutunga po elikwatakano lyanyamoge kumwe naJehova Karunga.

3. (a) Mpangera musinke ga pere Jesus vasikuli vendi? (b) Ngapi omu ava li rugana ekuho lyomomema?

³ Ngapi no vhura kulikida asi ono hara kukerera Karunga? Jesus ga tanterere vasikuli vendi asi: ‘Yipo nye nomu zira konomuhoko nadinye, mu ka di ninke di kare varongwa vange, mu ka di kuhwe.’ (Mateusa 28:19) Jesus mwene ga tulire po sihonena pokumukuhwa momema. Age kapi va mu sansere mema, ntani age kapi va mu tjilire tupu mema pomutwe gwendi. (Mateusa 3:16) Nkango “kukuhwa” kwa tunda konkango zoRugereka ezi azi tanta “kudivida.” Yipo nye ekuho lyoSikriste kutanta asi kukudivida momema.

4. Yinke ali likida ekuho lyomomema?

⁴ Ekuho lyomomema alyo sihepwa sanavenye sava vana hara kukara nelikwatakano kumwe naJehova Karunga. Ekuho kulikida moyitarameho eharo lyoge lyokukerera  Karunga. Alyo kulikida asi ove ono tokomene kurugana mpango zaJehova. (Episarome 40:7, 8) Nye, mokuwapera kekuho wa hepa kugusa nontambo dimwe.

5. (a) Yinke ntambo zokuhova mokuwapera kekuho? (b) Morwasinke ga karera mapongo goSikriste mulyo?

⁵ Ove wa tameka nare kugusa ntambo zokuhova. Ngapi? Mokutambura ediwo lyaJehova Karunga naJesus Kristusa, pamwe kupitira mongendeseso zelirongo lyoBibeli. (Johanesa 17:3) Nye pwa kara yoyinzi simpe yokulironga. Vakrisite kuna hara ‘kuvazwida nediwo lyompango zaKarunga.’ (Vakorosi 1:9) Kombinga zeyi, kukara momapongo goNombangi daJehova tayi ku vatere unene. Ya kara mulyo mokukara momapongo gangoso. (Vahebeli 10:24, 25) Kukara nkenye apa momapongo ngayi ku vatera mokugwederera kediwo lyoge lyaKarunga.

6. Ediwo lyoBibeli lyokuhura kupi wa hepa kukara nalyo mokuwapera ekuho?

⁶ Nampili ngoso, kapisi hepero o dive nayinye yomoBibeli mokuwapera kekuho. Erenga lyomoEtiyopiya kwa kere nediwo limwe, nye lya hepere evatero mokukwata egano maruha gamwe gomoMatjangwa. (Yirugana 8:30, 31) Mokulifana, nove simpe wa hepa kulironga yoyinzi. Mousili, kapi ngo hageka kulironga kuhamena Karunga. (Muudisi 3:11) Nye komeho zokukukuhwa, wa hepa kudiva nokutambura marongo gopomuhowo goBibeli. (Vahebeli 5:12) Marongo ogo kukwatera mo usili kuhamena ukaro wovafe ntani mulyo gedina lyaKarunga noUhompa wendi.

7. Erongo lyoBibeli, ngapi omu nali ku kundama?

⁷ Nampili ngoso, ediwo lyelike kapi lya gwanena po, morwa “nsene o pira epuro nokuza si Karunga komutjima.” (Vahebeli 11:6) Bibeli kututantera asi apa vantu vamwe mositata saKolinte sanare va zuvhire mbudi zoVakriste “va pulire, makura tava va kuhu.” (Yirugana 18:8) Monkedi zokulifana,  erongo lyoBibeli lya kona kukuzwida nepuro asi ado Nonkango daKarunga. Erongo lyoBibeli lya kona kukuvatera o kare nepuro momatumbwidiro gaKarunga nomononkondo donzambo zaJesus dokuparura.—Josuwa 23:14; Yirugana 4:12; 2 Timoteusa 3:16, 17.

8. Yinke ngayi ku tumangeda mokuligavera nava wopeke eyi wa lironga?

⁸ Moomu lina kukura epuro momutjima goge, ngayi ku digopera kulipungwira nyamoge eyi wa lironga. (Jeremiya 20:9) Ngo kara netumangedo lyenene mokuuyunga nava wopeke kuhamena Karunga nositambo sendi.—2 Vakolinte 4:13.

9, 10. (a) Nalye no vhura kutameka kuligavera usili woBibeli? (b) Yinke wa kona kurugana nsene ono hara kulihameka mewapaiko lyoyirugana yokuzuvhisa yoNombangi daJehova?

⁹ Kuvhura o tameke kuligavera usili woBibeli nava wopeke pokuuyunga nombili kekoro nokovakaume nokovamusinda, ntani kwava o rugana nawo. Ngo ya hara mokulihameka mo mewapaiko lyoyirugana yokuzuvhisa yoNombangi daJehova. Posiruwo oso, manguruka mokuuyunga yininke eyi kumwe noMbangi ogu ana kukuronga Bibeli. Nsene yi moneka asi ono wapere mokuzuvhisa moyitarameho, mawapaiko ngava ga tura po asi ove nomurongi goge mu zogere kumwe novakuronambunga vavali.

¹⁰ Eyi ngayi ku pa mpito mokulidiva nawa novakuronambunga vamwe woVakriste, ava ava takamesa siunda saKarunga. (Yirugana 20:28; 1 Peturusa 5:2, 3) Nsene vakuronambunga ava va dimburura asi wa kwata egano nokupura marongo gopomuhowo goBibeli, nokuparuka kuliza nonompango daKarunga, ntani sili ono hara kukara gumwe goNombangi daJehova, ngava ku divisa asi ono wapere mokulihameka moyirugana yokuzuvhisa moyitarameho ngomuzuvhisi gombudi zongwa gokudira kukuhwa.

11. Marunduruko musinke va hepa kutura po vamwe komeho zokuwapera mokuzuvhisa moyitarameho?

 ¹¹ Pamwe vakuronambunga ava kuvhura va dimburure asi wa hepa kutura po marunduruko gamwe monkareso zoge mokuwapera mokuzuvhisa moyitarameho. Eyi kuvhura kukwatera mo mokuhageka maruganeso gamwe aga wa horekera vapeke. Yimo, komeho zokupura kuhamena kukara muzuvhisi gokudira kukuhwa, wa hepa kutunda kononzo dononene, ngwendi ruhonda nounkorwe ntani nokuruganesa yikwepangwe.—1 Vakolinte 6:9, 10; Vagarata 5:19-21.

12. Morwasinke lya karera elitezururo hepero?

¹² Simpe wa hepa kugusa nontambo dimwe komeho zokuwapera kekuho. Mupositoli Peturusa ga uyungire asi: “Litezurureni . . . mu tengure kwaKarunga, nonzo deni ngadi dongonoke po.” (Yirugana 3:19) Kulitezurura kutanta asi kulivera koyininke eyi wa rugana. Elitezururo lya wapera nsene muntu ga parukire eparu lyokunyata, nye alyo hena hepero nampili nsene gumwe nga paruka eparu lyokuzera. Morwasinke? Morwa vantu navenye vananzo ntani va hepa edongwenenopo lyaKarunga. (Varoma 3:23; 5:12) Komeho zokulironga Bibeli, kapi wa divire mpango zaKarunga. Makura kapi wa vhulire kuparuka nawa-nawa kuliza nompango zendi ndi ngapi? Yipo nye, elitezururo hepero.

13. Yisinke epiruko?

¹³ Elitezururo lya hepa kulikwama epiruko. Wa hepa kurugana yoyinzi kupitakana tupu kulivera. Wa hepa kunyokera mparukiso zoge zanare ntani tokomena asi kutundilira ngesi ngo rugana yoyiwa. Elitezururo ntani epiruko yido nontambo wa hepa kugusa komeho zokukukuhwa.

14. Ntambo musinke zomulyo wa hepa kugusa komeho zokugwana ekuho?

¹⁴ Pwa kara ntambo zimwe zomulyo zokugusa komeho zokugwana  ekuho. Wa hepa kuligava nyamoge kwaJehova Karunga.

15, 16. Yinke ayi tanta kuligava nyamoge kwaKarunga, ntani yinke ayi tumangeda muntu a yi rugane?

¹⁵ Apa o ligava nyamoge kwaJehova Karunga mekanderero lyelituromo, ove kutumbwidira mokumukarera gelike narunye. (Deuteronomium 6:15) Morwasinke nye ngano gumwe na harera kuyirugana oyo? Mokulimburura epuro olyo tu ruganeseni sifanekeso esi, tu ninke nye asi mugara kuna kuvandekera mukadi. Moomu ana kumulironga ntani nokumona asi ga kara noyikara yoyiwa, yimo nga lizuvha asi ga mu hara. Makura age ngano nga mu pura mokumukwara. Yosili, kukwara ngayi tanta asi kugusa yitumbukiro yimwe yokugwederera ko. Nye eharo ngali mu ninkisa mokugusa ntambo ozo zomulyo.

¹⁶ Apa ngo diva Jehova nokumuhara, ngayi ku tumangeda mokumukarera nomutjima nagunye wa hana kuyereka ukereli woge kwendi. Nkenye ogu ana hara kukwama MunwaKarunga, Jesus Kristusa, “a lidine mwene.” (Marukusa 8:34) Ose kulidina nyamwetu pokudivilisa asi madowo noyitambo yanyamwetu kapisi yi kondere ulimburukwi wetu wene-wene kwaKarunga. Kutanta asi, komeho zokuvhura kukukuhwa, kurugana mpango zaJehova Karunga ya hepa kukara sitambo soge sosinene po meparu.—1 Peturusa 4:2.

17. Morwasinke vamwe ava singayekere mokuligava kwaKarunga?

¹⁷ Vamwe kusingayeka kuligava kwaJehova morwa woma mokugusa ntambo zonene ngoso. Awo kuvhura kutjira mokukavapangura Karunga ngoVakriste wokuligava. Mokukara noutjirwe asi awo kuvhura yi va yipire ntani va guvise Jehova, awo kugazara asi ya wapa mokupira kuligava kwendi.

18. Yinke nayi vhura kukutumangeda mokuligava kwaJehova?

¹⁸ Moomu no lironga kuhara Jehova, ngayi ku tumangeda mokuligava kwendi ntani nokuparuka kuliza nalyo.  (Muudisi 5:4) Konyima zokuligava, yosili ngo hara ‘kukara moomu ga hara Hompa nokurugana nkenye apa yokumuhafesa.’ (Vakorosi 1:10) Morwa eharo lyoge kwaKarunga, kapi ngo gazara asi udigu unene mokurugana mpango zendi. Yosili ove ngo kwatesa ko mupositoli Johanesa, ogu ga tjenge asi: “Eharo lyetu lyokuhara Karunga lyeli asi, ose atu sikise mo yipango yendi. Ano yipango yendi, kapi ya paka udigu.”—1 Johanesa 5:3.

19. Morwasinke no dilira kukara nowoma mokuligava kwaKarunga?

¹⁹ Kapi wa hepa kukara gokusikilira mo mokuligava kwaKarunga. Jehova ga diva maukundi goge ntani kapi ana kundindira koge o rugane kupitakana eyi ngano no vhura.  (Episarome 103:14) Age kuna hara yi ku tompoke makura age nga ku gamena nokukuvatera. (Jesaya 41:10) Kuvhura o kare nousili asi nsene o huguvara Jehova nomutjima goge nagunye, age nga “ku likida nzira zouhunga.”—Yisewe 3:5, 6.

20. Morwasinke eligawo kwaJehova nali dilira kukara sininke somokahore-hore?

²⁰ Mokutarurura yininke eyi tuna zogere ngesi kuvhura yi ku vatere mokuligava nyamoge kwaJehova mekanderero.  Nkenye ogu ga hara sili Karunga ga hepa hena “kugava undipo weyi.” (Varoma 10:10) Ngapi omu no gava undipo?

21, 22. Ngapi omu no vhura “kugava undipo” wepuro lyoge?

²¹ Wa kona kudivisa mutareligendesi gombunga zoge asi ove ono hara kugwana ekuho. Age nga wapaika vakuronambunga vamwe mokuruguruka nove mapuro gamwe aga ga kwatakana marongo gopomuhowo goBibeli. Nsene vakuronambunga ava va yi kwatesa ko asi yina ku wapere, awo ngava ku tantera asi ove kuvhura kugwana ekuho posigongi sokukwama ko. * Siuyungwa sokurugurura ntanto zekuho narunye kusigava poyilika yangoso. Muuyungi makura kuzigida vagwani ekuho navenye mokulimburura mapuro gavali goureru ngonkedi zimwe ‘zokugava undipo’ wepuro notuna twawo.

²² Ekuho kudimbwilisa moyitarameho asi ove muntu ogu ono ligava kwaKarunga ntani ngesi gumwe goNombangi daJehova. Vagwani ekuho awo kuvadivida momema mokulikida moyitarameho asi awo va ligava kwaJehova.

23. Yinke ayi tanta kukukuhwira “medina lyaGuhwe neli lyoMuna neli lyoMpepo zokupongoka”?

²³ Jesus ga uyungire asi varongwa vendi ngano ngava va kuhwira “medina lyaGuhwe neli lyoMuna neli lyoMpepo zokupongoka.” (Mateusa 28:19) Eyi kutanta asi mugwani ekuho kudimburura unankondo waJehova Karunga nou waJesus Kristusa. (Episarome 83:18; Mateusa 28:18) Age hena kudimburura sirugana sompepo zokupongoka ndi nonkondorugano daKarunga.—Vagarata 5:22, 23; 2 Peturusa 1:21.

24, 25. (a) Yinke ali fanekesa ekuho? (b) Epuro musinke lya hepa elimbururo?

²⁴ Nampili ngoso, ekuho kapisi edivido tupu. Alyo kufanekesa  sininke somulyo unene. Mokuza konhi zomema kufanekesa asi ove ono fu keparu lyoge lyanare. Mokuzauka mo momema kulikida asi ove ngesi kuna kuparuka mokurugana mpango zaKarunga. Diworoka hena asi ove kuna ligava kwaJehova Karunga mwene, kapisi kosirugana ndi kositambo ndi kovantu vamwe ndi kombunga. Eligawo nekuho lyoge alyo etamekero lyoukaume wounene kumwe naKarunga.—Episarome 25:14.

²⁵ Ekuho kapi ali huguvaresa eparu. Mupositoli Paurusa ga tjenge asi: “Kovekedeni nye mokuruganena eparu lyeni noutjirwe nekankamo.” (Vafilipi 2:12) Ekuho alyo etameko tupu. Epuro lyeli asi: Ngapi omu no vhura kukara meharo lyaKarunga? Egaununo lyetu lyokuhulilira ngali ka gava elimbururo.