1, 2. (a) Yisinke ayi ninkisa uhwi u kare nomulyo gomunene koge? (b) Morwasinke nayi vhulira kukara asi sizoweseso yiso uhwi womulyo po no vhura kugwana?

UHWI musinke womulyo po wa gwana rumwe? Uhwi kapi wa hepa kukara ndiro yipo u kare mulyo. Mulyo gwene-gwene gouhwi kapi gwa kara hepero kuguhetakanesa noyimaliva. Nye, nsene uhwi kukuretera ruhafo ndi u sikise mo sihepwa meparu lyoge, awo kwa kara nomulyo unene koge.

² Komauhwi nagenye aga ngo hara kugwana, pwa kara umwe ou wa pitakana makwawo. Awo uhwi wovantu wokutunda kwaKarunga. Jehova ga tu pa yininke yoyinzi, nye uhwi wendi womulyo po kwetu awo nzambo zaMunwendi zosizoweseso, Jesus Kristusa. (Mateusa 20:28) Moomu tupu natu ka yi mona megaununo eli, sizoweseso aso uhwi womulyo po ngano no vhura kugwana, aso kuvhura kukuretera ekuruhafo nokusikisa mo yihepwa yoge yomulyo po. Sizoweseso aso sili silikido sosinene po seharo lyaJehova koge.

3. Yisinke sizoweseso, ntani yinke natu kwata egano yipo u tu zerere uhwi ou womulyo?

³ Pausupi, sizoweseso yizo nkedi zaJehova zokuzowora  ndi zokuparura vantu kononzo nokonomfa. (Vaefeso 1:7) Mokukwata egano ntanto zerongo lyoBibeli eli, twa kona kugazara ko kweyi ya horokere mosipata saEdeni. Nsene tupu tu kwata egano eyi ga zumbanesere Adamu apa ga zonene kuvhura nye yi tu zerere asi morwasinke sizoweseso sa karera uhwi womulyo kwetu.

4. Yisinke lya tente eparu lyokusikilira mo kwaAdamu?

⁴ Apa ga mu sitire Adamu, Jehova kwa mu pere sininke sosiwa sili—eparu lyokusikilira mo. Gazara ko asi yinke ya tente eyi kwaAdamu. Mokumuunga norutu nomagano gokusikilira mo ngano kapi nga vera nokukurupa ndi kufa. Ngomuntu gokusikilira mo, age ga kere nelikwatakano lyokulikerera naJehova. Bibeli kuuyunga asi age kwa kere “Adamu zaKarunga.” (Rukasa 3:38) Kutanta asi Adamu kwa haferere elikwatakano lyewa naJehova Karunga, ngeli lyamunwa noguhwe veharo. Jehova nga uyunga namunwendi gepevhu Adamu mokumupa yirugana yokumuhafesa nokumudivisa eyi ga hepere kwendi.—Genesis 1:28-30; 2:16, 17.

5. Apa azi uyunga Bibeli asi Adamu kwa mu ungire “a fane Karunga,” yinke azi tamba?

⁵ Adamu kwa mu ungire “a fane Karunga.” (Genesis 1:27) Kapi ya kutanta asi Adamu ga fene Karunga momutaro. Moomu twa lirongere mEgaununo 1 mobuke ezi, Jehova age mpepo za ha moneka. (Johanesa 4:24) Yipo nye asi Jehova kapi ga kara norutu ropanyama. Mokumuunga a fane Karunga kutanta asi Adamu kwa mu sitire noyikara ngwendi yaKarunga, kukwatera mo eharo nounongo nouhungami ntani nononkondo. Adamu kwa kere ngwendi oGuhwe monkedi zimwe hena zomulyo: Age ga kere nemanguruko lyokutura po matokoro. Adamu kapi ga kere ngwendi ehina lyokuvhura kurugana tupu eyi va li wapaikira. Nye, age ga vhulire kutura po matokoro gamwene nokuhorowora pokatji kouwa noudona. Ngano ga horowere kulimburukwa  kwaKarunga, age ngano ga parukire narunye pevhu moParadisa.

6. Yisinke ga zumbanesere Adamu apa ga dilire kulimburukwa kwaKarunga, ntani ngapi omu ya kundamene vana vendi?

⁶ Ya zere, Adamu ga futire nsonso zonene apa ga dilire kulimburukwa kwaKarunga ntani kwa mu pangwilire konomfa. Nzo zendi za mu ninkisire a zumbanese eparu lyendi lyokusikilira mo kumwe nomatungiko galyo nagenye. (Genesis 3:17-19) Eguwo, Adamu ga zumbanesere eparu eli lyewa kapisi lyamwene tupu, nye neli lyovana vendi wokomeho. Nonkango daKarunga kuuyunga asi: “Nzo, muntu gumwe tupu [Adamu] ga zi reta mouzuni. Ano nzo zendi kwa reta mo nomfa. Nomfa yiyo da lihanena movantu mudima, morwa vantu navenye kwa zona.” (Varoma 5:12) Yosili, natuvenye twa pinga nzo kwaAdamu. Bibeli kuuyunga hena asi age ga ‘lirandesa’ mwene novana vendi koupika wononzo nonomfa. (Varoma 7:14) Kapi pwa kere ehuguvaro kwaAdamu naEva morwa awo va tokwere mowina kudira kulimburukwa kwaKarunga. Nye ngapi kombinga zovana vawo, kukwaterera mo nose?

7, 8. Yininke musinke yivali ya kwatera mo mosizoweseso?

⁷ Jehova ga zowora vantu kupitira mosizoweseso. Yisinke azi tanta nkango sizoweseso? Sizoweseso kuvhura kutanta yininke yivali. Sopomuhowo, sizoweseso yiso mfeto zokufuta mokuzowora ndi mokutengwida eyi va randesere. Kuvhura kuyihetakanesa nomfeto zokufuta mokukazowora munadorongo. Sauvali, sizoweseso yiso mfeto zokufuta mukoso gosininke. Aso kwa fana mfeto zokufuta mazonauko aga asi retesa po siponga. Pasihonena, nsene muntu a retesa po siponga, age ngano ga hepa kufuta mfeto zokuliza ndi zokuhetakana nomulyo gweyi yina zonauka.

⁸ Ngapi ngano va vhulire kufuta ezumbaneso lyenene eli ga tu reterere Adamu nokutuzowora moupika wononzo nonomfa? Tu zeni tu ka tarurure kosizoweseso esi ga tu pa Jehova neyi nayi vhura kutanta koge.

9. Sizoweseso musinke sa hepere po?

⁹ Eparu lyokupira kusikilira mo nokuvhura si kuzowora eparu lyokusikilira mo eli va zumbanesere. (Episarome 49:7, 8) Eyi ya hepere po kwa kere sizoweseso sokuhetakana nomulyo neyi ya zumbanene. Eyi kwa liza negano lyouhunga wokusikilira mo lyomoNonkango daKarunga eli ali tanta asi: “Mfuto zi kare mwenyo nomwenyo.” (Deuteronomium 19:21) Yinke ngano ya futa mulyo gomwenyo ndi geparu lyokusikilira mo eli ga zumbanesere Adamu? Eparu lyokusikilira mo kwa kere sizoweseso sokulifana nesi sa hepere po.—1 Timoteusa 2:5.

10. Ngapi omu ga si geve Jehova sizoweseso?

¹⁰ Ngapi omu ga si geve Jehova sizoweseso? Age kwa tumine munwendi gumwe gopampepo gokusikilira mo pevhu. Nye Jehova kapi ga tumine tupu nkenye sisitwa sopampepo. Age kwa tumine gomuwa po kwendi, Munwendi thi. (1 Johanesa 4:9, 10) Meharo lyendi, ogu Munwa ga sigire embo lyendi lyemeguru. (Vafilipi 2:7) Moomu twa lirongere megaununo lya ka pita mobuke ezi, Jehova ga rugene sitetu apa ga rundwilire eparu lyaMunwendi momukoga gwaMariya. Kupitira mompepo zokupongoka zaKarunga, Jesus kwa mu hampurukire ngomuntu gokusikilira mo ntani kapi ga kere momfeto zononzo.—Rukasa 1:35.

11. Ngapi omu na vhura muntu gumwe a kare sizoweseso sovanzi?

¹¹ Ngapi omu na vhura muntu gumwe a kare sizoweseso sovanzi? Gazara tanko asi, petameko, ngapi omu va ya kere vantu vananzo? Diworoka asi mokuzona, Adamu ga zumbanesere siweka sosiwa separu lyokusikilira mo. Yipo nye kapi ga vhulire kusipa vana vendi. Ga vhulire tupu kuvapa nonzo nonomfa. Jesus, ogu azi tumbura Bibeli asi: “Adamu gomoruhura,” kwa kere neparu lyokusikilira mo, ntani kapi ga zonene. (1 Vakolinte 15:45) Jesus ga ya pinganenene pevega lyaAdamu mokutuparura. Mokulizamba eparu lyendi  lyokusikilira mo moulimburukwi wene-wene kwaKarunga, Jesus ga futire mfeto zonzo zaAdamu. Yipo nye Jesus ga retera vana vaAdamu ehuguvaro.—Varoma 5:19; 1 Vakolinte 15:21, 22.

12. Ruhepo rwaJesus, yisinke rwa likidire?

¹² Bibeli za singonona montanto mahepeko aga ga lididimikilire Jesus komeho zonomfa dendi. Age kwa ligwanekerere nesoporo lyokupira nkenda nepamparo lyonyanya ntani nonomfa dokukora dokositji. (Johanesa 19:1, 16-18, 30; Magwedereroko, pomapenuno 204-206) Morwasinke ya kererere hepero asi Jesus a hepe unene? Megaununo lyokomeho mobuke ezi, ngatu ka lironga asi Satana ga homona asi nsene Jehova ga kara novakereli vendi wovantu ava ngano wokuvhura kukara moulimburukwi momaheteko. Mokulididimikira ruhepo rorunene, Jesus ga geve elimbururo lyewa kehomono lyaSatana. Jesus ga likidire asi muntu gokusikilira mo ogu ga kara nemanguruko lyokutura po matokoro kuvhura a kare noulimburukwi wokusikilira mo kwaKarunga, nampili Muzonaguli a rugane ngapi. Jehova ga haferere unene koulimburukwi waMunwendi geharo!—Yisewe 27:11.

13. Ngapi omu va si futire sizoweseso?

¹³ Ngapi omu va si futire sizoweseso? Mezuva 14 mokwedi koVajuda kwaNisani, 33 S.N., Karunga ga pulisilire Munwendi gokusikilira mo gokupira nonzo va mu dipage. Jesus yipo nye ga zamberere eparu lyendi lyokusikilira mo “pwarumwe tupu.” (Vahebeli 10:10) Mezuva lyautatu konyima ga fire Jesus, Jehova ga mu pindwire hena keparu lyopampepo. Meguru, Jesus ga geve kwaKarunga mulyo geparu lyendi lyokusikilira mo eli ga zambere ngosizoweseso sokuzowora vana vaAdamu. (Vahebeli 9:24) Jehova ga tambwire mulyo gonzambo zaJesus ngosizoweseso esi sa hepere po mokumangurura vantu moupika wononzo nonomfa.—Varoma 3:23, 24.

14, 15. Yinke natu vhura kurugana mokugwana ‘edongononopo lyononzo detu’?

¹⁴ Nampili tu kare simpe vananzo, ose kuvhura kuhafera matungiko gomulyo morwa sizoweseso. Tu zeni tu tarurure mauwa gamwe gantaantani naga gokomeho gouhwi ou womulyo po wokutunda kwaKarunga.

¹⁵ Edongononopo lyononzo. Ose twa kara nekondjo lyenene lyokurugana eyi ya hungama morwa kupinga kudira kusikilira mo. Natuvenye kuzona mononkango ndi moyirugana. Nye kupitira monzambo zaJesus zosizoweseso, ose kuvhura kugwana ‘edongononopo lyononzo detu.’ (Vakorosi 1:13, 14) Nye, mokugwana edongononopo olyo, twa hepa kulitezurura sili. Twa kona kulinunupika komeho zaJehova, nokuhundira edongononopo lyendi mokuliza nepuro lyetu monzambo zaMunwendi zosizoweseso.—1 Johanesa 1:8, 9.

16. Yinke ayi tu ninkisa tu karere Karunga nezwi lyewa lyomomutjima, ntani mulyo gwalyo musinke?

¹⁶ Ezwi lyewa lyomomutjima kosipara saKarunga. Ezwi lyedona lyomomutjima kuvhura kutwaredesa kokupira ehuguvaro ntani nokutuninkisa tu lizuvhe kupira mulyo. Nye, kupitira medongwenenopo eli lya retesa po sizoweseso, Jehova monkenda ga tu pulisira tu mu karere nezwi lyewa lyomomutjima nampili kudira kusikilira mo kwetu. (Vahebeli 9:13, 14) Eyi kuturerupira yipo tu kare nemanguruko lyokuuyunga naJehova. Yipo nye, ose kuvhura tu mu hedere mekanderero nemanguruko. (Vahebeli 4:14-16) Mokukara nezwi lyewa lyomomutjima kutupa mbili nokutwaredesa kefumadeko lyanyamwetu nokureta ruhafo.

17. Matungiko musinke ga kara po morwa Jesus ga tu fililire?

¹⁷ Ehuguvaro lyomwenyo gwanarunye moparadisa pevhu. Varoma 6:23 kutanta asi: “Mfeto zononzo nomfa.” Velise zoozo kugwederera ko hena asi: “Nye uhwi wonkenda  waKarunga yiwo mwenyo gwanarunye mwaJesus Kristusa, Hompa gwetu.” Megaununo 3 mobuke ezi, twa zogerere ko komatungiko goParadisa zokomeho pevhu. (Ehororo 21:3, 4) Matungiko nagenye ogo gokomeho, kukwatera mo mwenyo gwanarunye noukanguki wokusikilira mo, kwa karera po morwa Jesus ga tu fililire. Mokukagwana matungiko ogo, twa kona kulikida rupandu rwetu kouhwi wosizoweseso.

18. Morwasinke natu pandwira Jehova kewapaiko lyosizoweseso?

¹⁸ Morwasinke natu karera norupandu rorunene kwaJehova kosizoweseso? Uhwi kwa kara sili nomulyo nsene mugavi ta zambere siruwo ndi nonkondo ndi yimaliva yendi. Ose kuhafa unene nsene tu mona uhwi asi aso silikido seharo lyousili lyomugavi kwetu. Sizoweseso aso yiso somulyo po komauhwi nagenye morwa Karunga ga tulire po elizambero lyenene mokusigava. Johanesa 3:16 kutanta asi: “Karunga kwa here uzuni unene-nene, yiyo ga u pere Munwendi gelike a huru.” Sizoweseso yiso silikido sosinene po seharo lyaJehova kwetu. Aso hena silikido seharo lyaJesus,  morwa age kwa geve eparu lyendi meharo morwetu. (Johanesa 15:13) Uhwi wosizoweseso ngano nye u tu divise asi Jehova naMunwendi kwa tu hara nkenye gumwe gwetu.—Vagarata 2:20.

19, 20. Mononkedi musinke no vhura kulikida asi wa pandura uhwi waKarunga wosizoweseso?

¹⁹ Ngapi omu no vhura kulikida rupandu roge kouhwi waKarunga wosizoweseso? Pomuhowo, litura mo mokudiva ko yoyinzi kuhamena Mugavi ogu goMunene, Jehova. (Johanesa 17:3) Elirongo lyoBibeli kumwe nevatero lyosimbapiratjangwa esi ngayi ku vatera mokuyirugana oyo. Mokukura koge mediwo lyaJehova, eharo lyoge kwendi ngali nenepa. Makura, eharo olyo ngali ku ninkisa o hare kumuhafesa.—1 Johanesa 5:3.

²⁰ Likida epuro monzambo zaJesus zosizoweseso. Jesus mwene ga uyungire asi: “Ogu a pura Muna, kukara nomwenyo gwanarunye.” (Johanesa 3:36) Ngapi omu natu vhura kulikida epuro mwaJesus? Epuro olyo kapi ava li likida tupu mononkango. Jakopo 2:26 kutanta asi: “Nepuro nalyo nsene li pira yirugana lya fa.” Epuro lyousili kulilikida ‘moyirugana’ yetu. Nkedi zimwe omu natu likida asi twa kara nepuro mwaJesus mokurugana paapa twa hulira mokumuhonena kapisi mweyi tupu atu uyunga nye hena neyi atu rugana.—Johanesa 13:15.

21, 22. (a) Morwasinke natu karera nkenye mvhura mediworoko lyoMurarero gwaHompa? (b) Yisinke ngava ka faturura mEgaununo 6 ntani 7?

²¹ Kara mediworoko lyoMurarero gwaHompa nkenye mvhura. Momasiku gaNisani 14, 33 S.N., Jesus ga tulisire po sihorokwa sokulikarera esi azi tumbura Bibeli asi “Murarero gwaHompa.” (1 Vakolinte 11:20; Mateusa 26:26-28) Sihorokwa esi kusitumbura hena asi Ediworoko lyonomfa daKristusa. Jesus kwa li tulire po mokuvatera vapositoli vendi noVakriste wousili navenye wokonyima zawo mokukwata  egano asi kupitira monomfa dendi ngomuntu gokusikilira mo, age ga geve mwenyo ndi eparu lyendi ngosizoweseso. Kuhamena ediworoko eli, Jesus kwa pangerere asi: “Omu yi rugane tomu diworokere nge po.” (Rukasa 22:19) Mokukara mEdiworoko kutudiworokesa eharo lyenene eli va tu likida oJehova naJesus mokugava sizoweseso. Kuvhura tu likide rupandu rwetu kosizoweseso mokukara mwankenye mvhura mEdiworoko lyonomfa daJesus. *

²² Sigava saJehova sosizoweseso aso sili uhwi womulyo. (2 Vakolinte 9:14, 15) Uhwi ou womulyo po kuvhura kuvatera nampili ava va fa. Egaununo 6 ntani 7 ngaga ka yi faturura.