1. Ngapi omu natu gwanena mo uwa nsene tu karera Karunga monaruwa?

JEHOVA KARUNGA kutupakera sinka unene ntani ana hara tu gwanene mo uwa momavyukiso gendi geharo. Nsene tu mu karera monaruwa, ngatu hafa ntani ngatu nyokera maudigu gomanzi meparu. Ngatu gwana hena matungiko gendi ntani nevatero lyendi. (Jesaya 48:17) Nampili ngoso, pwa kara maukereli gomafere aga aga tanta asi kuronga usili kuhamena Karunga. Nye, ago ga lisiga unene momarongo gago kuhamena Karunga ntani neyi ana kundindira ko kwetu.

2. Ngapi natu vhura kulironga nkedi zokukerera Jehova monaruwa, ntani sifanekeso musinke nasi tu vatera mokukwata egano eyi?

² Ngapi omu no diva nkedi zokukerera Jehova monaruwa? Kapisi hepero kulironga nokuhetakanesa marongo gomaukereli nagenye. Wa hepa kulironga tupu eyi azi rongo Bibeli sili kuhamena ukereli wousili. Mokuyifanekesa: Moyirongo yoyinzi, mwa kara udigu woyimaliva yoyimpempa. Nsene va ku pa sirugana sokudimburura yimaliva oyo yoyimpempa, ngapi omu ngano no yi dimburura? Mokulironga o dive nkenye yimaliva yoyimpempa ndi? Hawe. Hansa kulironga o dive yimaliva yousili. Konyima zokudimburura omu ya fana yimaliwa yousili, ove kuvhura kudimburura yoyimpempa. Mokulifana, apa atu lirongo mokudimburura ukereli wousili, ose kuvhura kudimburura maukereli ogo goyimpempa.

3. Mokuliza naJesus, yinke natu rugana mokuninka asi Karunga a tu tambure?

 ³ Ya kara mulyo mokukerera Jehova monkedi ezi a tambura. Sinzi sovantu kwa pura asi maukereli nagenye kuhafesa Karunga, nye Bibeli kapi azi rongo oyo. Kapi ya gwanena po tupu mokulitumbura asi ove Mukriste. Jesus ga uyungire asi: ‘Kapisi nkenye ogu a tantere nge asi, “Hompa, Hompa,” yige nga za moUntungi weguru. Ano nye ogu nga za mo, googu a sikisa mo mpango zaTate gemeguru.’ Mokuninka asi Karunga a tu tambure, twa kona kulironga eyi ga hepa ko kwetu nokuyisikisa mo. Jesus ga tente asi ava wokudira kusikisa mo mpango zaKarunga ‘kuvatuka Veta.’ (Mateusa 7:21-23) Ngwendi yimaliva yoyimpempa, ukereli woyimpempa kwato mulyo. Mokugwederera ko, ukereli ou kuzonagura.

4. Yinke adi tanta nonkango daJesus kuhamena nonzira mbali, ntani nkenye nzira kupi azi twara?

⁴ Jehova kugava mpito kwankenye gumwe pevhu mokugwana mwenyo gwanarunye. Nye, mokugwana mwenyo gwanarunye moParadisa, twa hepa kukarera Karunga monaruwa nokuparuka ngesi monkedi ezi a tambura. Eguwo, wovanzi kunyoka kuyirugana. Yiyo nye ga uyungire Jesus asi: “Omu hwililire mevero lyenunu, yeeyi evero kwa nenepa, ano nzira kwa ngwanyunuka, ezi azi twara kokudona. Sinzi sovantu yimo ava gendi. Nye evero ko enunu, ano nzira kwa likokera, ezi azi twara komwenyo, ano ava ava zi gendi vasesu.” (Mateusa 7:13, 14) Ukereli wousili kutwaredera komwenyo gwanarunye. Ukereli woyimpempa kutwaredera koudona ndi kezonauko. Jehova kapi ga hara asi ngapa zonauke nampili gumwe, yiyo nye age kuna kugava mpito kwankenye muntu mokulironga kumuhamena. (2 Peturusa 3:9) Yosili, nkedi ezi atu karere Karunga kuvhura kutanta eparu ndi nomfa kwetu.

5. Ngapi omu natu vhura kudimburura owo ava rugana ukereli wousili?

⁵ Ngapi no vhura kugwana ‘nzira zokomwenyo’? Jesus ga uyungire asi ukereli wousili ngano ngau moneka  momparukiso zovantu ava ava u rugana. Age kwa uyungire asi: ‘Koyiyimwa yawo yiko ngomu va divira. Nkenye sitji sosiwa kuyima yiyimwa yoyiwa.’ (Mateusa 7:16, 17) Monkango zimwe, owo ava rugana ukereli wousili ngano kuvadimbwilira komapuliro gawo ntani nomonkareso zawo. Nampili ngomu va dira kusikilira mo ntani awo kuninka mapuko, vakareli wousili ngombunga kukondja mokurugana mpango zaKarunga. Tu zeni tu tarurure yinema ntazimwe eyi ayi dimbwilisa owo ava rugana ukereli wousili.

6, 7. Ngapi omu ava tara vakereli vaKarunga Bibeli, ntani ngapi omu ga tura po Jesus sihonena kombinga ezi?

⁶ Marongo govakereli vaKarunga kwa tunda moBibeli. Bibeli zene kuuyunga asi: “Nkenye etjangwa, eli za retesa po Mpepo zaKarunga, kwa kara nomulyo gokuronga usili. Alyo kukorangeda nokupukurura nokurongesa uhungami, asi muntu gwaKarunga mokulimburukwa kwalyo, a sikilire mo, age a fire kurugana yirugana nayinye yoyiwa.” (2 Timoteusa 3:16, 17) KoVakriste vakwawo, mupositoli Paurusa kwa tjenge asi: “Apa twa mu reterere nonkango daKarunga, mwa di zuvhire, tomu di tambura, kapisi panonkango-nkango tupu, nye ado nonkango daKarunga.” (1 Vatesaronika 2:13) Yimo, mapuliro nomaruganeso goukereli wousili kapi ga tunda momagano ndi monompo dovantu. Ago kwa tunda moNonkango daKarunga, Bibeli.

⁷ Jesus Kristusa kwa tura po sihonena sosiwa pokugusa marongo gendi moNonkango daKarunga. Mekanderero koGuhwe vemeguru, age kwa uyungire asi: “Nonkango doge yido usili.” (Johanesa 17:17) Jesus ga pulire Nonkango daKarunga, ntani nkenye eyi nga rongo kwa lizire kumwe noMatjangwa. Jesus rorunzi nga uyunga asi: “Kwa tjanga va tjanga asi.” (Mateusa 4:4, 7, 10) Makura Jesus nga tumbura etjangwa. Mokulifana, vantu vaKarunga naina kapi ava rongo magano gavene. Awo kwa pura asi Bibeli Nonkango daKarunga, ano marongo gawo kugapameka kweyi azi uyunga.

8. Yinke ya hamena mo mokukerera Jehova?

 ⁸ Owo ava rugana ukereli wousili kukarera tupu Jehova nokudivisa edina lyendi. Jesus kwa divisire asi: “Hompa Karunga goge gelike no tongamena no kerera a huru.” (Mateusa 4:10) Vakereli vaKarunga kukerera tupu Jehova. Kumukarera kukwatera mo kudivisira vantu edina lyaKarunga gosili noyikara yendi. Episarome 83:18 (Bibeli zoRutjadi) kutanta asi: “Ngava dive asi ove nyovelike, gedina Jehova, ove Karunga gekEguru-guru gouzuni mudima.” Jesus kwa tulire po sihonena sokuvatera vapeke mokudiva Karunga, ngamoomu ga uyungire mekanderero asi: “Edina lyoge na li horwera vantu ava wa pa nge mo mouzuni.” (Johanesa 17:6) Mokulifana, vakareli wousili naina kuronga vapeke kuhamena edina lyaKarunga nositambo sendi, ntani noyikara yendi.

9, 10. Mononkedi musinke ava lihara Vakriste wousili vene-navene?

⁹ Vantu vaKarunga kwa lihara-hara neharo lyousili. Jesus ga uyungire asi: “Nsene mu lihara-hara, yipo ngava divira vantu asi one sili varongwa vange.” (Johanesa 13:35) Vakriste wokuhova kwa lihere-here. Eharo lyosiukarunga kureta vantu kumwe melikwatakano lyene-lyene lyoumbya wousili, nampili va tunde komarudi ndi nonkarapamwe ndi nomuhoko dokulisiga-siga. (Vakorosi 3:14) Vahameni womaukereli goyimpempa kapi va kara neharo lyosiumbya lyangoso. Ngapi omu twa yi diva oyo? Awo kulidipaga vene-navene morwa malisigo monomuhoko ndi momarudi. Vakriste wousili kapi ava gusa yirwiso mokudipaga Vakriste vakwawo ndi nkenye ogu. Bibeli kutanta asi: “Apa yipo nye ava va dimbwilire vana vaKarunga nava woMuzonaguli: ogu a dili kurugana youhunga nogu ga dira kuhara mukwawo, kapisi munwaKarunga. . . . Atu lihara-hareni. Walye atu faneni Kaini, ogu ga hamenene koMuzonaguli, yiyo ga dipagere mumbyendi.”—1 Johanesa 3:10-12; 4:20, 21.

¹⁰ Nye eharo lyousili kwa kwatera mo yoyinzi kupitakana tupu kudira kudipaga wopeke. Va hana kuligazara pwavene, Vakriste wousili kuruganesa siruwo nononkondo noyiruganeso  yawo mokuvatera nomokulikorangeda vene-navene. (Vahebeli 10:24, 25) Awo kulivatera vene-navene moyiruwo yoyidigu, ntani kapi ava kumbagere wopeke. Mousili, meparu lyawo awo kusikisa mo epukururo lyomoBibeli ‘lyokuruganena navenye uwa.’—Vagarata 6:10.

11. Morwasinke ya karera mulyo mokutambura Jesus Kristusa ngagogu a ruganesa Karunga mokuparura?

¹¹ Vakriste wousili kutambura Jesus Kristusa ngagogu a ruganesa Karunga mokuvaparura. Bibeli kutanta asi: “Eparu kuligwana mwendi mwelike, yeeyi kutupu hena nampili muntu gumwe gwapeke mouzuni mudima, ogu ga pa Karunga edina lyokutuparura.” (Yirugana 4:12) Moomu twa yi mwene mEgaununo 5, Jesus ga geve eparu lyendi ngosizoweseso kovantu wovalimburukwi. (Mateusa 20:28) Mokugwederera ko, Jesus yige Hompa ogu ga tura po Karunga moUhompa wemeguru ou ngau ka pangera evhu nalinye. Ntani Karunga kuna hepa asi tu limburukwe Jesus nokusikisa mo marongo gendi nsene tuna hara mwenyo gwanarunye. Yiyo azi uyungire Bibeli asi: “Ogu a pura Muna, kukara nomwenyo gwanarunye. Nye ogu a dili kuzuvha Muna, kapi a kara nomwenyo.”—Johanesa 3:36.

12. Yisinke ya hamena mo mokukara kapisi wouzuni?

¹² Vakereli wousili kapisi wouzuni. Apa ga kere pombangwiro komeho zaPiratusa mupangeli gwaRoma, Jesus kwa uyungire asi: “Uhompa wange kapisi wouzuni ou.” (Johanesa 18:36) Va kare asi mosirongo musinke va tunga, vasikuli wousili vaJesus awo kwa hamena koUhompa wendi wemeguru yipo nye kapi ava hamene moyinka youpolitika yomouzuni nampili nakauke. Kapi ava lihameke mo moyirwananga yamo. Nampili ngoso, vakareli vaJehova kapi ava heteke kusilika wopeke mokulipakerera ndi kulitangaukira mbunga politika ndi va lihameke momahoroworo. Vakareli vaKarunga wousili, nampili kapi va hamena moupolitika, awo kusikisa mo veta zosirongo. Morwasinke? Morwa Nonkango daKarunga kuvapangera asi va “limburukwe kepangero.”  (Varoma 13:1) Oku aku kara malilimbo pokatji kweyi ga hepa ko Karunga ntani neyi za hepa ko nkareso zoupolitika, vakareli wousili kukwama sihonena sovapositoli, ava va uyungire asi: “Ose twa hepa po kulimburukwa unene Karunga, kupitakana vantu.”—Yirugana 5:29; Marukusa 12:17.

13. Ngapi omu ava tara vasikuli wousili vaJesus Uhompa waKarunga, makura yisinke ava rugana?

¹³ Vasikuli wousili vaJesus kuzuvhisa asi Uhompa waKarunga  yiwo welike ehuguvaro kovantu. Jesus kwa pumbire asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.” (Mateusa 24:14) Mevango lyokukorangeda vantu va huguvare momapangero govantu mokukohonona po maudigu gawo, vasikuli wousili vaJesus Kristusa kudivisa asi Uhompa waKarunga wemeguru yiwo welike ehuguvaro kovantu. (Episarome 146:3) Jesus kwa tu rongere mokukanderera kepangero eli lyokusikilira mo apa ga uyungire asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mateusa 6:10) Nonkango daKarunga da pumbire asi Uhompa ou wemeguru ‘ngau hanagura yirongo oyo [yantaantani] nayinye, makura tau kara dogoro narunye.’—Ndaniyera 2:44.

14. Ngapi ono kugazara, mbunga musinke zoukereli azi sikisa mo yihepwa youkereli wousil?

¹⁴ Kuliza neyi tuna tarurura ngesi, lipura nyamoge asi: ‘Mbunga zoukereli musinke azi gusa marongo gazo nagenye moBibeli nokudivisa edina lyaJehova? Mbunga musinke azi likida eharo lyosiukarunga, nokulikida epuro mwaJesus, nokudira kukara wouzuni, ntani nokudivisa asi Uhompa waKarunga yiwo welike ehuguvaro lyousili kovantu? Konombunga domaukereli nagenye pevhu, zipi po azi sikisa mo yihepwa eyi nayinye?’ Usili wou asi azo mbunga zoNombangi daJehova.—Jesaya 43:10-12.

15. Yinke ga hepa ko Karunga, kugwederera ko mokupura asi age pweli?

¹⁵ Mokupura tupu mwaKarunga kapi ya gwanena mo mokumuhafesa. Mousili, Bibeli kutanta asi nampili nompepo donondona kwa pura asi Karunga pweli. (Jakopo 2:19) Nampili ngoso, ado kapi adi rugana mpango zaKarunga ntani age kapi a di tambura. Mokututambura Karunga, kapisi tu pure tupu asi Karunga pweli nye twa hepa hena kurugana mpango zendi. Ntani twa hepa kuligusa ko koukereli woyimpempa nokutambura ukereli wousili.

16. Yinke natu rugana kuhamena kulihameka moukereli woyimpempa?

 ¹⁶ Mupositoli Paurusa ga likidire asi kapisi tu lihameke mo moukereli woyimpempa. Age ga tjenge eyi ga tente Jehova asi: “Ano tundeni mo mokatji kawo, mu likerere. Mwa ha guma kweyi yokunyata, makura ame ngani mu tambure.” (2 Vakolinte 6:17; Jesaya 52:11) Yipo nye Vakriste wousili kunyokera nkenye eyi ya likwatakana kumwe noukereli woyimpempa.

17, 18. Yisinke “Babironi zonene,” ntani morwasinke ya karera ngenderera ‘mokupwaga mo mositata oso’?

¹⁷ Bibeli kulikida asi maukereli nagenye goyimpempa ago ruha ‘roBabironi zonene.’ * (Ehororo 17:5) Edina olyo kutudiworokesa kositata sanare saBabironi, oku ukereli woyimpempa wa tamekere konyima zoRuhanzo momazuva gaNowa. Marongo nomaruganeso gomanzi aga gana divikwa naina moukereli woyimpempa kwa tundilire nare-nare moBabironi. Pasihonena, Vababironi ngava karere yikarunga youtatu-umwe. Naina, erongo lyenene lyomaukereli gomanzi kuna kara Utatu-umwe. Nye Bibeli kuronga nawa-nawa asi pwa kara tupu Karunga gumwe gosili, Jehova, ntani asi Jesus Kristusa yige Munwendi. (Johanesa 17:3) Vababironi hena kwa pulire asi vantu kwa kara nomwenyo gwa ha fu ogu agu paruka ponomfa dorutu ntani kuvhura kuhepa mevango lyokuhepekera. Naina, epuliro lyomwenyo ndi mpepo za ha fu ezi azi vhuru kuhepa momundiro gwanarunye kuna kulironga momaukereli gomanzi.

¹⁸ Mokumona asi ukereli waBabironi zanare wa lihanena evhu nalinye, Babironi zonene zanaina kuvhura kuzidimburura nawa-nawa asi ukerelikarunga woyimpempa womouzuni naunye. Ntani Karunga ga pumbire asi ukereli ou woyimpempa naunye ngau wiza hararasi kehagero. (Ehororo 18:8) Ono mono nye asi morwasinke ya karera mulyo kuligusa ko nyamoge kwankenye ruha roBabironi zonene?  Jehova Karunga kuna hara o ‘pwage mo mositata oso’ usimbu paapa sina kara ko simpe siruwo.—Ehororo 18:4.

19. Yinke ngo ka gwana pokukerera Jehova?

¹⁹ Morwa etokoro lyoge lyokuhageka kurugana ukereli woyimpempa, vamwe kuvhura va horowore kuhageka kulikwatakana nove. Nye, pokukarera Jehova novantu vendi, ngo ka gwana yoyinzi kupitakana ngano eyi no zumbanesa. Ngwendi varongwa wokuhova vaJesus ava va sigire yininke yapeke mokumukwama, ngo ya kara novanavanzinyoge wovanzi wopampepo. Ngo ya kara gumwe gepata lyenene lyouzuni naunye lyomamiliyona goVakriste wousili ava ava ku likida eharo lyosili. Ntani ngo ya kara nehuguvaro lyewa lyomwenyo gwanarunye “mouzuni wokomeho.” (Marukusa 10:28-30) Nampo komeho, ava va ku nyokere morwa epuro lyoge ngava tarurura eyi azi rongo Bibeli nokukara vakareli vaJehova.

20. Meho musinke zina kundindira owo ava rugana ukereli wousili?

²⁰ Bibeli kuronga asi Karunga ntaantani nga ka retere uhura kouzuni ou woudona ntani nokukaupinganesera po nouzuni woupe wouhungami mepangero lyoUhompa wendi. (2 Peturusa 3:9, 13) Eh, uzuni musi wouwa ngau ka kara! Ano mouzuni owo woupe wouhungami, ngamu ka kara ukereli umwe tupu, ukereli wousili. Kapisi nzira zounongo koge mokugusa nontambo dohepero mokulipakerera kumwe novakareli wousili ngesi ndi?