1. Kupi oku natu vhura kulirongera kuhamena meho?

WA PURAKENA mbudi koradio ndi kotivi nokulipura asi: ‘Ou uzuni kupi una vyuka?’ Yimpagwa kuhoroka hararasi ya hana kuyindindira, kwato muntu na vhura kupumba eyi ngayi horoka mungura. (Jakopo 4:14) Nye Jehova ga diva eyi ngayi horoka komeho. (Jesaya 46:10) Nare-nare Nonkango dendi, Bibeli, kapi da pumbire tupu yininke yoyidona eyi ya kuhoroka momazuva getu nye hena yininke yoyiwa eyi nayi ka moneka komeho.

2, 3. Epuro musinke va mu pulire Jesus varongwa vendi, ntani ngapi omu ga limbwilire?

² Jesus Kristusa ga uyungire kuhamena Uhompa waKarunga, ou ngau ka reta uhura koudinikarunga nokukaninka evhu paradisa. (Rukasa 4:43) Vantu kwa here kudiva apa ngano ngau wiza Uhompa. Mousili, varongwa vaJesus va mu pulire asi: “Sidiviso sewizo lyoge nesi souhura wouzuni sipi so?” (Mateusa 24:3) Melimbururo Jesus kwa va tanterere asi Jehova Karunga gelike ga divire nawa-nawa apa ngau wiza uhura wouzuni ou. (Marukusa 13:32) Nampili ngoso, Jesus ga pumba yininke eyi ngano nayi horoka pevhu komeho  tupu Uhompa u ka rete mbili nompora zosili kovantu. Eyi ga pumbire kuna kuhoroka ngesi!

³ Komeho zokukona-kona silikido asi ose kuna kuparuka ‘kouhura wouzuni,’ tu tarurureni tanko yita eyi ga dilire kumona nkenye muntu. Ayo kwa horokere meguru, ntani yitundwamo yamo ya tu kundama.

4, 5. (a) Yinke ya horokere meguru konyima tupu apa ga varekere Jesus kupangera ngoHompa? (b) Kuliza nEhororo 12:12, yinke ngano ya tunda mo moyita yemeguru?

⁴ Egaununo lya ka pita mobuke ezi kwa faturura asi Jesus Kristusa ga varekere kupangera ngoHompa meguru momvhura 1914. (Ndaniyera 7:13, 14) Jesus makura ga rugene ko yuma. Bibeli kuuyunga asi: “Meguru tamu sikama yita: Mikayera [edina limwe lyaJesus] novaengeli vendi va rwise emukongoro [Satana Muzonaguli] novaengeli valyo. Emukongoro nalyo tali va rwisa novaengeli valyo.” * Satana novaengeli ndi nompepo dendi donondona va va fundire moyita oyo ntani awo kwa va zuguminine pevhu. Vaengeli vaKarunga wokulimburukwa kwa hefe asi Satana novaengeli vendi wovadona va va zuguma mo. Nye, vantu kapi ngano nava ligwanekere noruhafo rwangoso. Mokulisiga, Bibeli kwa pumbire asi: “Nye nane vakwetu ava mwa kara pevhu . . . yeeyi Muzonaguli ana hegumukire kweni nehandu lyenene, morwa ana diva asi siruwo sendi esi sina hupu ko, sisupi!”—Ehororo 12:7, 9, 12.

⁵ Tarurura nawa eyi ngano nayi tunda mo moyita eyi yemeguru. Mehandu lyendi lyenene, Satana ngano ta reta ehudi kwava va kara pevhu. Ngomu no ka yi mona, ose kuna kuparuka ngesi mosiruwo oso sehudi. Nye aso ngasi kara ‘siruwo sosisupi’ tupu. Nampili Satana ga yi diva. Bibeli  kutumbura siruwo esi asi ‘mazuva gopouhura.’ (2 Timoteusa 3:1) Eh, ruhafo musi natu vhura kukara naro asi Karunga ntaantani nga ka guse po epukiso lyoMuzonaguli pevhu! Tu zeni tu tarurure yininke yimwe va pumbire moBibeli eyi yina kuhoroka ngesi. Eyi kulikida asi ose kuna kuparuka momazuva gopouhura ntani Uhompa waKarunga ntaantani ngau ka rete matungiko ganarunye kowo va hara Jehova. Pomuhowo, tu zeni tu kona-kone yikara yine yosidiviso esi ga uyungire Jesus ngano ngasi nongwenesa siruwo esi tuna kuparuka.

6, 7. Nonkango daJesus kuhamena yita nerumbu, ngapi omu dina kusikilira mo naina?

⁶ ‘Nomuhoko ngadi lilimba-limba, ano yi kare yirongo, nayo ngayi lilimba-limba.’ (Mateusa 24:7) Mamiliyona govantu kwa ga dipaga moyita yomouye wa ka pita. Munahistoli gumwe gwaBritania kwa tjenge asi: “Uye wou-20 kwa kere wedipago lyenene po eli va tjanga momahistoli . . . Awo kwa kere uye woyita yokutwikida, moyiruwo tupu yoyisesu pwa hana kuliwapaikira yita.” Ediviso lyombunga zelirongo lyoyihorokwa youzuni kwa tanta asi: “Vantu ava va fire moyita mouye [20] kuvavhukisa poyikando yitatu kupitakana ava va fire moyita nayinye kutundilira mouye wokuhova  AD dogoro 1899.” Kutundilira 1914 vantu wokupitakana pomamiliyona 100 va fire morwa yita. Mamiliyona va diva eguwo lyokuzumbanesa vahali vawo moyita. Nampo nove gumwe gwawo.

⁷ ‘Ngapa kara marumbu.’ (Mateusa 24:7) Vakonakoni kuuyunga asi eretesopo lyonondya lya zeruka unene monomvhura 30 da ka pita. Nampili ngoso, marumbu kuna kutwikira morwa vantu wovanzi kapi va kara noyimaliwa yokugwanena po mokuranda nondya ndi epya omu nava lima. Mamiliyona gomanzi govantu kwa kara nonzara nkenye ezuva. Mbunga zoUhaku zomoUzuni kwa yereka asi epiro nondya donongwa kuretesa po nomfa dovanona wokupitakana pomamiliyona gatano nkenye mvhura.

8, 9. Yisinke yina kulikida asi mauporofete gaJesus kuhamena makankamo gevhu nehamba lyomukagu ga sika mo?

⁸ ‘Ngaku kara makankamo gomanene gevhu.’ (Rukasa 21:11) Kuliza nombunga zovadiviunsitwe, kutundilira mo-1990 makankamo gevhu gokusika ngwendi po-17 gokuvhura kuyipika matungo nokugagununa evhu kuhoroka nkenye mvhura. Ntani nkenye mvhura kuhoroka makankamo gevhu gononkondo unene gokuvhura kuzonagura po matungo. Ediviso limwe kwa tanta asi: “Makankamo gevhu kwa dipagere nomwenyo  domafere gomayovi monomvhura 100 da ka pita ntani ezokomeho lyoukonentu kwa gurumwisa tupu kamanunu sivaro sonomfa.”

⁹ ‘Ngaku kara ehamba lyomukagu.’ (Rukasa 21:11) Nampili ezokomeho lyouhaku, mauvera ganare naga gomape kuna kumana vantu. Ediviso limwe kwa uyunga asi mauvera 20 aga ga divikwa—kukwatera mo TB nomaralia nezimo lyokusinsana—kuna kuvhuka monomvhura dantani, ntani kwa kudigopa kugahakura nonomutji. Pausili, ngwendi mauvera 30 gomape ga moneka. Gamwe simpe kwato uhaku ntani ago kudipaga.

10. Nkareso musinke ezi va pumbire mwa-2 Timoteusa 3:1-5 ono kumona movantu naina?

¹⁰ Kugusa ko mokufaturura yihorokwa yimwe yomouzuni, Bibeli za pumbire erunduruko monkareso zovantu wopomazuva gopouhura. Mupositoli Paurusa ga singwenene omu ngano ngava kara sinzi sovantu. Mwa-2 Timoteusa 3:1-5, tatu resa asi: “Pomazuva gopouhura ngapa kara yiruwo yoyidigu.” Mokusupipika, Paurusa kwa uyungire asi vantu ngava

• lihara tupu vene

• dowokera yimaliva

•  dira kuzuvha yovakurona vawo

• dira kupongoka

• dira kupaka nkenda

• kara woyikotjongana

• hara mahafo goparutu kupitakanesa omu va hara Karunga

• moneka ngwendi vakereliKarunga, nye nonkondo damo ngava di nyoka

11. Ngapi omu lya singonona Episarome 92:7 eyi ngayi horokera vadinikarunga?

¹¹ Vantu womomukunda goge kuna kara ngosina ndi? Yosili yimo. Nakunye kwa kara vantu ava va kara nonkareso zondona. Eyi kulikida asi Karunga ntaantani nga ka rugane ko yuma, yeeyi Bibeli kwa uyunga asi: “Mudinikarunga nampili a kure ngwendi wayi, vadona navenye va ragope, ngava hanagura po navenye nu.”—Episarome 92:7.

12, 13. Ngapi omu “ediwo lyousili” lya vhuka “pehagero lyouzuni”?

¹² Yosili mazuva gopouhura kuna zura ehudi, ngamoomu tupu za yi pumbire Bibeli. Nampili ngoso, mouzuni ou woudigu, mwa kara yihorokwa yoyiwa mokatji kovakareli vaJehova.

¹³ “Ediwo lyousili ngali vhuka,” yimo za pumbire buke zoBibeli zaNdaniyera. Siruwoke ngano ngayi horoka oyo? “Pehagero lyouzuni.” (Ndaniyera 12:4,  hetakanesa NW.) Unene po kutundilira mo-1914, Jehova kwa vatera owo va hara sili kumukerera mokukura mokukwata egano Bibeli. Awo va kwata egano nawa-nawa usili womulyo wokuhamena edina nositambo saKarunga, nonzambo zaJesus Kristusa zosizoweseso, noukaro wovafe ntani nevhumbuko. Kugwederera ko, vakareli vaJehova va lironga mokuparuka monkedi zokuvaretera uwa ntani nokuretera ehamberero kwaKarunga. Awo hena va ya kwata egano nawa-nawa sitambo soUhompa waKarunga ntani nomu ngau ka wapukurura ukaro pevhu. Yinke ava rugana nediwo eli? Epuro olyo kutureta kouporofete umwe hena ou una kusika mo momazuva aga gopouhura.

14. Ngapi omu ezuvhiso lyombudi zongwa zoUhompa lina lihana naina, ntani wolye vana kuzizuvhisa?

¹⁴ “Mbudi zoNgwa ezi zoUntungi waKarunga tanko ngava zi divisa mwa za uzuni mudima,” yimo ga uyungire Jesus Kristusa mouporofete wendi kuhamena ‘uhura wouzuni.’ (Mateusa 24:3, 14) Evhu nalinye, mbudi zongwa zoUhompa—asi yisinke Uhompa, neyi ngau ka rugana, nomu natu vhura kugwana matungiko gawo—kuna kuzizuvhisa moyirongo yokupitakana po-230 nomomaraka gokupitakana po-400. Mamiliyona goNombangi daJehova kuzuvhisa noupampi mbudi zongwa zoUhompa. Awo kwa tunda “momarudi nagenye nomomakoro nagenye nomonomuhoko nadinye nomaraka nagenye.” (Ehororo 7:9) Nombangi kurugana malirongo goBibeli gomawoko-woko kumwe nomamiliyona govantu ava va hara kudiva eyi azi rongo Bibeli sili. Eli sili esikiliromo lyokutetukisa lyouporofete, unene po ngomu tupu ga pumbire Jesus asi Vakriste wousili ‘navenye ngava va nyenga’!—Rukasa 21:17.

15. (a) Ono yi pura asi ose kuna kuparuka pomazuva gopouhura, ntani morwasinke? (b) “Uhura,” yinke ngau ka tanta kowo ava rwanesa Jehova ntani kowo ava limburukwa kepangero lyoUhompa waKarunga?

¹⁵ Mokumona asi sinzi somauporofete goBibeli kuna  kusika mo naina, kapi ono kuyikwatesa ko asi ose kuna kuparuka pomazuva gopouhura ndi? Konyima zokuzuvhisa mbudi zongwa moomu ga yi harera Jehova, “uhura” sili tau ka wiza. (Mateusa 24:14) “Uhura” kutanta asi siruwo apa nga ka kugusa po Karunga udinikarunga pevhu. Jehova nga ka ruganesa Jesus novaengeli wononkondo mokuzonagura navenye ava ava mu rwanesa mowina. (2 Vatesaronika 1:6-9) Satana novaengeli vendi kapi ngava ka pukisa hena nomuhoko. Makura, Uhompa waKarunga ngau ka powomwena matungiko kwanavenye ava ava limburukwa kepangero lyawo lyouhunga.—Ehororo 20:1-3; 21:3-5.

16. Yinke ngano ya wapa koge yokurugana?

¹⁶ Mokumona asi uhura wouzuni waSatana pepi una kara, twa hepa kulipura nyamwetu asi: ‘Yinke ngano nani rugana?’ Ya wapa mokutwikira kulironga yoyinzi kuhamena Jehova neyi ga hepa ko kwetu. (Johanesa 17:3) Litura mo mokulironga Bibeli. Tura po ukaro wokulipakerera nkenye apa kumwe nawopeke ava ava hara kurugana mpango zaJehova. (Vahebeli 10:24, 25) Tambura ediwo eli ga gava Jehova Karunga kovantu mouzuni mudima, ntani nokutura po marunduruko gohepero meparu lyoge yipo o vhure kuhafera uwa waKarunga.—Jakopo 4:8.

17. Morwasinke ngali gwanena ezonauko lyovadona sinzi sovantu mohararasi?

¹⁷ Jesus ga pumbire asi sinzi sovantu ngava ncenuna silikido esi asi ose kuna kuparuka pomazuva gopouhura. Ezonaguro lyovadona ngali wiza mongenderera va hana kuyindindira. Ngwendi muwidi masiku, ngali gwana sinzi sovantu mohararasi. (1 Vatesaronika 5:2) Jesus ga rondwere asi: “Moomu tupu ya kere momazuva gaNowa, newizo lyaMunwaMuntu yimo ngali kara. Moomu tupu ngava li tava nu momazuva aga ga hovere ekuruhanzo, nomu tupu ngava likwara-kwara dogoro nekezuva eli ga peramene Nowa memuwato, nye awo va hana kuyikwata egano dogoro noku  rwa va gwanenene mo rukuruhanzo, ru va tware navenye, newizo lyaMunwaMuntu yimo ngorooro ngali kara.”—Mateusa 24:37-39.

18. Erondoro musinke lyaJesus twa hepa kupakera sinka?

¹⁸ Yipo nye ga tanterere Jesus vapurakeni vendi asi: “Omu litakamese nyamweni! Walye omu lizumbilire moyipito nomoyinwa yononkondo noyinka youzuni ou, ezuva olyo neisi ngali mu gwana hararasi. Yeeyi alyo ngali wizira navenye ava va kara pevhu hararasi, moomu aru mahuka rutenda. Ano omu takamese oku tomu kanderere nkenye apa, asi mu gwane nonkondo dokuyoworoka kwanayinye eyi ngayi wiza, nkumwe ngomu ka sikame [newapero] komeho zaMunwaMuntu.” (Rukasa 21:34-36) Ya wapa kupakera sinka nonkango daJesus. Morwasinke? Morwa ava va kara newapero lyaJehova Karunga neli lya ‘MunwaMuntu,’ Jesus Kristusa, va kara nendindiro lyokukaparuka uhura wouzuni waSatana ntani nokukaparuka narunye mouzuni woupe wouwa ou una kara pepi!—Johanesa 3:16; 2 Peturusa 3:13.