1, 2. Epuro musinke wa hepa kulipura nyamoge konyima zokusiga ukereli woyimpempa, ntani morwasinke ono kugazarera asi eyi mulyo?

TU NINKE nye asi ono diva gumwe ga nyateka etope lyeni pokutura uhungu momema mokahore-hore, ntani ngesi ukaro wovantu una kara mosiponga. Yisinke ngano no rugana? Yosili, ove ngano no rugana ko yuma mokugwana mema gomawa. Nye konyima zokurugana oyo, ove ngano simpe to ligwanekere nepuro eli lyenene: ‘Kapi na gwana uhungu ndi?’

² Epuro lyokulifana kuwiza po kombinga zoukereli woyimpempa. Bibeli kuronga asi ukereli wangoso kwa u nyateka kumwe nomarongo nomaruganeso gokunyata. (2 Vakolinte 6:17) Yiyo nye ya karera nomulyo koge mokupwaga mo ‘moBabironi zonene,’ ukerelikarunga woyimpempa womouzuni naunye. (Ehororo 18:2, 4) Ove wa yi rugana eyi ndi? Nsene yimo, ove ngano va yi ku pandadekere. Nye yinzi ya hamena mo kupitakana kuligusa ko tupu nyamoge koukereli woyimpempa. Konyima, wa kona kulipura nyamoge asi: ‘Ame simpe kuhamena nakauke koukereli woyimpempa ndi?’ Tarurura yihonena yimwe.

3. (a) Yinke azi uyunga Bibeli kuhamena eruganeso lyomafano, ntani morwasinke udigu kwavamwe mokutambura mutaro gwaKarunga? (b) Yinke no vhura kurugana kwankenye yininke eyi wa weka eyi ya likwatakana kumwe noukereli woyimpempa?

³ Vamwe kwa kere nomafano ndi noyinako momambo gawo monomvhura dononzi. Nove wa kara nayo ndi? Nsene yimo, kuvhura o lizuvhe asi udigu ndi epuko mokukanderera kwaKarunga pwa hana evatero lyokumoneka lyangoso. Kuvhura o kare neharo koyininke eyi yimwe. Nye Karunga yige a uyunga asi ngapi ngano omu nava mu karera, ntani Bibeli kuronga asi age kapi ana hara tu ruganese mafano. (Exodus 20:4, 5; Episarome 115:4-8; Jesaya 42:8; 1 Johanesa 5:21) Yimo ove kuvhura o kwaterere koukereli wousili mokuzonagura po nkenye yininke wa weka eyi ya likwatakana kumwe noukereli woyimpempa. Wa kona kuyitara ngamoomu a yi tara Jehova—age kwa yi “nyenga.”—Deuteronomium 27:15.

4. (a) Ngapi omu twa yi diva asi kukerera vadimu kwato sikwafo? (b) Morwasinke ga nyokeserere Jehova vantu vendi mokudira kulihameka mwankenye rupe roumpure?

⁴ Kukarera vadimu kuna divikwa hena momaukereli  goyimpempa gomanzi. Komeho zokulironga usili woBibeli, vamwe kwa pulire asi vafe awo kuna kuparuka mosirongo sonompepo sokudira kumoneka ntani awo kuvhura kuvatera ndi kukoresa vanamwenyo. Pamwe ove wa litulire mo unene mokuhafesa vadimu woge. Nye moomu wa yi lirongere mEgaununo 6 mobuke ezi, vafe kapi vana kuparuka nkenye oku. Yipo nye, kuhetekera kuuyunga kumwe nawo kuna kara mawoko-woko. Nkenye mbudi ezi azi moneka ngwendi kuna kutunda kovafe azo sili kutundilira konompepo donondona. Yipo nye, Jehova ga nyokeserere Vaisraeli mokudira kuhetekera kuuyunga kumwe novadimu ndi kulihameka mwankenye rupe roumpure.—Deuteronomium 18:10-12.

5. Yinke no vhura kurugana nsene ngo ruganesa mafano ndi kukarera vadimu nare moukereli woge?

⁵ Nsene ngo ruganesa mafano ndi kukarera vadimu nare moukereli woge, yinke no vhura kurugana? Resa nokuteda matjangwa gomoBibeli aga aga likida omu a tara Karunga yininke eyi. Kanderera kwaJehova nkenye apa kuhamena eharo lyoge lyokukwaterera koukereli wousili, ntani mu pura a ku vatere mokugazara ngwendi moomu a gazara.—Jesaya 55:9.

6, 7. (a) Tava tanta asi Krismesa sipito sosinke, ntani vasikuli womouye wokuhova vaJesus ngava zi dana ndi? (b) Madano gehampuruko, nosinke va ga kwatakanesere posiruwo sovarongwa vaJesus vanare?

⁶ Ukereli womuntu kuvhura kuunyateka mapwizumuko aga ga divikwa aga ga tunda koukereli woyimpempa. Pasihonena, tarurura Krismesa. Tava tanta asi Krismesa sipito sokudiworoka ehampuruko lyaJesus Kristusa, ntani hambara nkenye ukereli wokulitumbura asi Vakriste kuzidana. Nye, kapi pwa kara umbangi asi varongwa vaJesus womouye wokuhova ngava dana epwizumuko lyangoso. Buke zoSacred Origins of Profound Things kwa tanta asi: “Momauye gavali konyima zehampuruko lyaKristusa, kwato ga divire asi ezuvake va mu hampurukire, ntani vantu wovasesu va yi pakerere mbili.”

 ⁷ Nampili ngano varongwa vaJesus va divire ezuva lyehampuruko lyendi, ngano kapi ngava li dana. Morwasinke? Morwa, moomu tupu za tanta The World Book Encyclopedia, Vakriste vanare “kwa tere edano lyehampuruko lyankenye gumwe asi mpo zovapagani.” Madano gehampuruko aga va tumbura moBibeli govapangeli vavali tupu owo ngava dili kukerera Jehova. (Genesis 40:20; Marukusa 6:21) Madano gehampuruko ngava ga rugana hena mokufumadeka vakarunga wovapagani. Pasihonena, Varoma ngava dana ehampuruko lyosikarunga sawo sosikadi Diana mwaKudumonkuru 24. Ezuva lyokukwama ko, ngava dana ehampuruko lyaAporo, sikarunga sawo sezuva. Yipo nye, madano gehampuruko kwa likwatakanene kumwe noupagani, kapisi noUkriste.

8. Faturura malikwatakano pokatji komadano gehampuruko noumpure.

⁸ Pwa kara konda zimwe eyi Vakriste womouye wokuhova ngano ngava dilire kudana ehampuruko lyaJesus. Varongwa vendi nampo va divire asi madano gehampuruko kwa ga kwatakanesere kumwe noumpure. Pasihonena, sinzi soVagereka noVaroma vanare kwa pulire asi mpepo kwa kere kwankenye ehampuruko lyomuntu ntani nokumupopera eparu lyendi nalinye. Buke zoThe Lore of Birthdays kutanta asi: “Mpepo ezi kwa kere nelikwatakano lyomafeno kumwe nosikarunga esi va hampurukire mezuva eli va hampurukire ogu muntu.” Jehova ngano yosili kapi nayi mu hafesa nkenye edano eli ngano nali kwatakanesa Jesus kumwe noumpure. (Jesaya 65:11, 12) Morwasinke nye vantu wovanzi ava danene Krismesa?

9. Ngapi omu Sindimba 25 va zi horowere asi ezuva lyokudana ehampuruko lyaJesus?

⁹ Konyima zonomvhura mafere konyima apa ga kere Jesus pevhu, yipo vantu va tamekere kudana ehampuruko lyendi moSindimba 25. Nye olyo kapi lya kere ezuva  lyehampuruko lyaJesus, morwa kwa mu hampurukire ngwendi mwaSikukutu. * Morwasinke nye va horowere Sindimba 25? Vamwe ava va litumbwire vene asi Vakriste awo “kwa here ezuva eli li lize kumwe nosipito soupagani soVaroma” sokuhamberera ehampuruko lyezuva. (The New Encyclopædia Britannica) Pokufu, apa ngali moneka ezuva asi nonkondo nonsesu, vapagani ngava rugana sipito mokukoka ezuva li tengure korugendo rwalyo rokoure li retese po upyu nouzera. Awo kwa gazarere asi ezuva kwa tamekere kutengura korugendo rwalyo mwaSindimba 25. Mokukambadara mokukoka vapagani, vapitisili womaukereli kwa tambwire sipito esi nokuheteka kusininka si moneke ngwendi asi soVakriste. *

10. Pwanare, morwasinke ngava dilire vantu vamwe kudana Krismesa?

¹⁰ Nare va zi nongonona asi Krismesa kwa tunda moupagani. Morwa kapi za tunda moMatjangwa, mouye wo-17 Krismesa va zi silikire moIngiranda nomonomukunda dimwe moAmelika. Nkenye ogu nga dili kuza koyirugana a kare kembo mezuva lyoKrismesa ga hepere kumufutisa. Nye konyima zosiruwogona, va varekere hena kurugana nompo dina danare, ntani nokugwederera po dimwe donompe. Krismesa za ya kere hena epwizumuko lyenene, ntani yimo ngorooro zina kara moyirongo yoyinzi. Morwa malikwatakano aga za kara nazo Kristmesa kumwe noukereli  woyimpempa, owo va hara kuhafesa Karunga kapi ava zi dana ndi nkenye epwizumuko lyapeke eli lya tundilira moukereli woupagani. *

11. Morwasinke ava danene vantu vamwe mapwizumuko, nye yinke ya kona kukara yomulyo po kwetu?

¹¹ Vamwe kukwatesa ko asi mapwizumuko gangoso ngwendi Krismesa kwa tundilira koupagani nye simpe awo kulizuvha asi kapi ya kara epuko kwawo kugadana. Mousili, sinzi sovantu kapi ava gazara kuhamena ukereli woyimpempa apa ava dana mapwizumuko. Yilika eyi kugava hena mpito komapata mokukara kumwe. Yimo o lizuvhu ngoso ndi? Nsene ngoso, alyo eharo lyepata, kapisi eharo lyoukereli woyimpempa, eli ali ninkisa yi moneke ngwendi udigu mokukwaterera koukereli wousili. Kara nousili asi Jehova, ntundiliro zepata, ana hara o kare nelikwatakano lyewa kumwe nekoro lyoge. (Vaefeso 3:14, 15) Nye kuvhura o nkondopeke malikwatakano gekoro mononkedi edi a tambura Karunga. Kombinga zeyi ya kona kukara yomulyo po kwetu, mupositoli Paurusa ga tjenge asi: “Omu kambadare kulironga eyi ya za Hompa komutjima.”—Vaefeso 5:10.

12. Fanekesa asi morwasinke natu nyokera nompo nomadano aga ga kara nonontundiliro dokunyata.

¹² Nampo kuvhura o lizuvhe asi nontundiliro domapwizumuko kapisi yizo konda vana kugadanena naina. Nontundiliro sili mulyo ndi? Yimo! Mokuyifanekesa: Tu ninke nye asi ono mono utovara moyindova. Ngano kuvhura nye o tore utovara nokuulya ndi? Hawe! Utovara una nyata. Ngwendi utovara wina, mapwizumuko kuvhura kumoneka utovara, nye kwa tundilira komavango gokunyata. Mokukwaterera koukereli wousili, twa hepa kukara negano ngwendi  lyomuporofete Jesaya, ogo ga tanterere vakareli wousili asi: “Mwa ha guma kweyi yokunyata.”—Jesaya 52:11.

13. Maudigu musinke naga vhura kuhoroka nsene o dira kulihameka mo momapwizumuko?

¹³ Maudigu kuvhura kuhoroka apa o tokora mokudira kulihameka mo momapwizumuko. Pasihonena, varugani vakweni kuvhura va lipure eyi o dili kulihameka moyihorokwa yimwe yepwizumuko koyirugana. Yinke ngano no rugana nsene va ku pa uhwi woKrismesa? Ngano nayi kara epuko kuutambura ndi? Ngapi nsene mulikwali goge kapi ga kara nepuro lyokulifana ngwendi lyoge? Ngapi omu no ninka vana woge va pire kulizuvha yoyidona morwa kupira kudana mapwizumuko?

14, 15. Yinke no vhura kurugana nsene va ku kunda asi “Krismesa zongwa,” ndi nsene gumwe ana hara kukupa uhwi?

¹⁴ Pwa hepa nondunge mokukohonona po nkenye sihorokwa. Nsene gumwe ta ku kundu asi “Krismesa zongwa,” kuvhura o mu pandure tupu. Nye ngapi nsene ove kurugana nendi ndi kulimona nendi nkenye apa? Kuvhura o uyunge ko yoyinzi. Nye nkenye apa, kara nombili. Bibeli kupukurura asi: “Nonkango deni adi kare nkenye apa donongwa donontovara domungwa, asi mu dive kulimburura nkenye ogu ana kumupura.” (Vakorosi 4:6) Takamesa yipo o dire kulikida ediro efumadeko kwava wopeke. Nye, faturura epuro lyoge monkedi zombili. Faturura nawa asi kapi ono kurwanesa yokukara koyipito nokulipaapa mauhwi, nove kwa hara kuyirugana, nye koyiruwo yapeke.

¹⁵ Ngapi nsene gumwe ana hara kukupa uhwi? Tara komaukaro. Mugavi kuvhura a uyunge asi: “Na diva asi ove kapi o dana epwizumuko. Nye, simpe na hara o yi tambure.” Ove kuvhura kutokora asi kutambura uhwi momaukaro ogo kapi ya lifana ngwendi kulihameka mo mepwizumuko. Yimo, nsene mugavi kapi ga diva mapuliro goge, ove kuvhura o mu tantere asi kapi o dana epwizumuko. Eyi kuvhura  kukuvatera mokufaturura eyi ono tambwire uhwi nye kapi to gava uhwi posilika oso. Nye pamwe, kapi nayi wapa mokutambura uhwi nsene kuna u gava negano lyokulikida asi ove kapi wa kwaterera kepuro lyoge ndi ove ngano o sige eyi wa pura mokugwana yuma.

16. Ngapi omu no vhura kukara nombili apa no kohonona po yininke yokuhamena komapwizumuko?

¹⁶ Ngapi nsene vekoro kapi ava lihameke mo momapuliro goge? Simpe, kara nombili. Wa ha tura po nompata kuhamena nkenye mpo ndi sipito esi va hara kurugana vekoro lyoge. Nye fumadeka magano gawo, ngamoomu tupu ono hara va fumadeke goge. (Mateusa 7:12) Nyokera kurugana nkenye eyi ngano nayi ku ninkisa o lihameke mo mepwizumuko. Kapi nye ayi tanta asi twa kona kunyokera nkenye eyi ngwendi yininke eyi ya dira kuhamena mo mosipito. Nye wa kona kurugana nkenye apa monkedi ezi nazi ku ninkisa o kare nezwi lyewa lyomomutjima.—1 Timoteusa 1:18, 19.

17. Ngapi omu no vhura kuvatera vana woge va pire kulizuvha yoyidona morwa awo kumona vapeke kuna kudana mapwizumuko?

¹⁷ Yinke no vhura kurugana yipo vana woge va pire kulizuvha yoyidona morwa kudira kudana mapwizumuko ga hana si gopatjangwa? Rugana ko yuma poyiruwo yapeke momvhura. Vakurona vamwe kulitulira po siruwo mokugava mauhwi kovana vawo. Uhwi umwe wouwa ou no vhura kupa vana woge kuna kara siruwo ntani neharo lyoge.

18. Kukara momapongo goSikriste, ngapi omu nayi ku vatera mokukwaterera koukereli wousili?

¹⁸ Mokuhafesa Karunga, wa hepa kunyokera ukereli woyimpempa ntani nokukwaterera koukereli wousili. Yinke ya kwatera mo? Bibeli kutanta asi: “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva  lyaHompa tali hedere pepi.” (Vahebeli 10:24, 25) Mapongo goSikriste ago yilika yoruhafo koge mokukerera Karunga monkedi ezi a tambura. (Episarome 22:22; 122:1) Komapongo ogo, Vakriste wokulimburukwa ‘kulikwafa-kwafa.’—Varoma 1:12.

19. Morwasinke ya karera mulyo kuuyunga nava wopeke kuhamena yininke eyi wa lironga moBibeli?

¹⁹ Nkedi zimwe hena omu no vhura kukwaterera koukereli wousili mokuuyunga nava wopeke kuhamena yininke eyi wa lironga mokulironga Bibeli kumwe noNombangi daJehova. Vantu wovanzi sili kuna kara “neguwo noudigu” koudinikarunga ou una kuhoroka mouzuni naina. (Hesekiyeli 9:4) Walye wa diva vantu vamwe owo ava lizuvhu ngoso. Morwasinke nye no dilira kuuyunga nawo kuhamena ehuguvaro lyoge lyokomeho lyokutunda moBibeli? Ngomu ono kulipakerera noVakriste wousili nokuuyunga nava wopeke kuhamena usili wokutetukisa woBibeli ou wa lironga, ngo mona asi nkenye eharo lyomomutjima goge lyokuhara nompo doukereli woyimpempa ngali dongonoka po. Kara nousili asi ngo ka hafa unene ntani ngo ka gwana matungiko gomanzi nsene o kwaterera koukereli wousili.—Marakiya 3:10.