1. Morwasinke natu harera kulironga kuhamena vaengeli?

MOKUDIVA muntu kwa kwaterera mo mokulironga ko yuma kuhamena epata lyendi. Kuna lifana, mokudiva Jehova Karunga kwa kwatera mokudiva nawa epata lyendi lyovaengeli. Situmbukiro musinke va kara naso vaengeli mositambo saKarunga? Awo va kere noruha moyihorokwa yovantu vanare ndi? Vaengeli kukundama eparu lyoge ndi? Nsene yimo, ngapi?

2. Kupi va tundilira vaengeli, ntani vangapi va kara po?

² Bibeli kwa tumbura vaengeli yikando mafere. Tu zeni tu tarurure matumburo aga gamwe mokulironga yuma kuhamena vaengeli. Kupi va tundilire vaengeli? Vakorosi 1:16 kutanta asi: “Mwendi [Jesus Kristusa] yimo ga sitira Karunga yininke nayinye yemeguru neyi yepevhu.” Kupitira moMbeli zendi Jehova Karunga kwa sitire nkenye gumwe goyisitwa yopampepo eyi ava tumbura asi vaengeli. Vaengeli vangapi va kara po? Bibeli kulikida asi mamiliyona gomanzi govaengeli kwa ga sitire, ntani navenye vanankondo.—Episarome 103:20; Ehororo 5:11.

3. Yinke azi tu tantere Joba 38:4-7 kuhamena vaengeli?

³ Nonkango daKarunga, Bibeli, kututantera asi apa va liwapaikire  evhu, ‘yisitwa yekeguru ya zigilire koruhafo.’ (Joba 38:4-7) Kutanta asi vaengeli kwa kere po nare komeho apa va sitire vantu, nampili komeho zesito lyevhu. Etjango eli lyoBibeli kulikida hena asi vaengeli kwa kara nomalizuvho, morwa alyo kuuyunga asi awo va ‘zigilire koruhafo.’ Posiruwo sina, vaengeli navenye kwa kere ruha rwepata limwe mokukarera Jehova Karunga.

4. Ngapi omu azi yi likida Bibeli asi vaengeli wokulimburukwa kuna kulitura mo moyirugana yovantu?

⁴ Kutundilira tupu apa va mwene esito lyovantu wokuhova, yisitwa yopampepo yoyilimburukwi kwa kara neharo mokumona omu epata lyovantu lina kukura ntani nomu sina kusika mo sitambo saKarunga. (Yisewe 8:30, 31; 1 Peturusa 1:11, 12) Nye, mokupita siruwo, vaengeli va mwene asi hambara epata nalinye lyovantu va hagekere kukarera Musiti gwawo geharo. Eyi sili ya guvisire vaengeli wokulimburukwa. Nye, nsene nampili muntu gumwe a tengura kwaJehova, ‘vaengeli nawo kuhafa.’ (Rukasa 15:10) Mokumona asi vaengeli va kara nosinka sosinene koukalinawa wowo ava kerere Karunga, kuvhura tu yi kwate egano eyi Jehova ga ruguruka kuruganesa vaengeli mokunkondopeka nokupopera vakereli vendi wokulimburukwa pevhu. (Vahebeli 1:7, 14) Tarurura yihonena yimwe.

5. Yihonena musinke yevatero lyokutunda kovaengeli atu gwana moBibeli?

⁵ Vaengeli vavali kwa vaterere mugara gomulimburukwi Roto novana vendi wovakadi mokuparuka mezonauko lyoyitata yoyidona yaSodoma naGomora mokuvapwagesa mo mevega olyo. (Genesis 19:15, 16) Konyima zomauye gomanzi, muporofete Ndaniyera kwa mu zugumine mekero lyovanyime, nye kapi va mu rugene yuma ntani ga uyungire asi: “Karunga gwange kuna tumu muengeli a ya kumateke tuna tovanyime.” (Ndaniyera 6:22) Mouye wokuhova S.N., muengeli ga mangwilire mupositoli  Peturusa modorongo. (Yirugana 12:6-11) Mokugwederera ko, vaengeli va nkondopekere Jesus petameko lyoyirugana yendi yepevhu. (Marukusa 1:13) Ano komeho tupu zonomfa daJesus, muengeli kwa monekerere Jesus “ta mu koreke.” (Rukasa 22:43) Ehengagwido musi eli ngano lya kere kwaJesus poyiruwo oyo yomulyo meparu lyendi!

6. (a) Ngapi omu ava popere vaengeli vantu vaKarunga naina? (b) Mapuro musinke tuna ka tarurura ngesi?

⁶ Naina, vaengeli kapi vana kumoneka hena kovantu vaKarunga pevhu. Nampili vantu nokuvhura si kuvamona, vaengeli wononkondo vaKarunga simpe kupopera vantu vendi, unene po kwankenye eyi ayi zonagwisa pampepo. Bibeli kuuyunga asi: “Muengeli gwendi kupopera ava ava tjira HOMPA, makura ta va yowora mo mosimpagwa.” (Episarome 34:7) Morwasinke nadi karera nonkango odo ehengagwido lyenene kwetu? Morwa poyili yisitwa yopampepo yoyidona yosiponga eyi yina hara kutuzonagura po! Yiyo yilye? Kupi ya tundilira? Ngapi omu yina kuheteka kutuhepeka? Mokugwana malimbururo, tu zeni tu tarurure pausupi eyi ya horokere petameko lyohistoli zovantu.

7. Ngapi omu ya mu tompokere Satana mokugusa vantu kwaKarunga?

⁷ Moomu twa lirongere mEgaununo 3 mobuke ezi, muengeli gumwe ga kere neharo lyokupangera vapeke makura ga rwanesere Karunga. Konyima muengeli ogu kwa ya mu divire asi Satana Muzonaguli. (Ehororo 12:9) Monomvhura 1 600 konyima zokupukisa Eva, Satana ya mu tompokere mokugusa hambara vantu navenye kwaKarunga ntudi valimburukwi wovasesu, ngwendi Abeli naHenoka ntani naNowa.—Vahebeli 11:4, 5, 7.

8. (a) Ngapi omu va ya kere vaengeli vamwe nompepo donondona? (b) Yinke da rugene nompepo donondona mokuparuka Ruhanzo momazuva gaNowa?

⁸ Momazuva gaNowa, vaengeli wopeke kwa rwanesere Jehova. Awo va sigire evango lyawo mepata lyaKarunga lyemeguru,  tava wiza pevhu nokugusa marutu gopanyama. Morwasinke? Tatu resa mwaGenesis 6:2 asi: “Vagara vamwe vemeguru tava zi vakadi owo konomutjima, makura tava kwara mo ava va here mo.” Nye Jehova Karunga kapi ga pulisilire vaengeli va twikire mokurugana udona nokuyipika vantu. Kwa retere ekuruhanzo pevhu eli lya kombere po vantu wovadona navenye ntani nokutulira vakereli vendi wokulimburukwa ntere. (Genesis 7:17, 23) Vaengeli wovarwanesi, ndi nompepo donondona, ya va sininikire va zumbe marutu gawo gopanyama nokutengura meguru ngoyisitwa yopampepo. Awo va ya lipakerere noMuzonaguli, ogu ga ya kere ‘mupangeli gwawo.’—Mateusa 9:34.

9. (a) Yinke ya horokerere nompepo donondona apa da tengwire meguru? (b) Yisinke natu ka tarurura kombinga zonompepo donondona?

 ⁹ Apa vaengeli wokudira kulimburukwa va tengwire meguru, kapi va va tambwire, ngwendi mupangeli gwawo Satana. (2 Peturusa 2:4) Nampili kapi vana kuvhura hena kugusa marutu gopanyama, awo simpe kupukisa vantu. Mousili, nevatero lyonompepo donondona edi, Satana ‘kuna kupukisa uzuni naunye.’ (Ehororo 12:9; 1 Johanesa 5:19) Ngapi? Unene po, nompepo donondona kuruganesa nonkedi edi da wapaika mokupukisa vantu. (2 Vakolinte 2:11) Tu zeni tu ka tarurure nonkedi edi dimwe.

10. Yisinke umpure?

¹⁰ Mokupukisa vantu, nompepo donondona kuruganesa umpure. Umpure awo elikwatakano nonompepo donondona, yi kare asi kuvyukilira ndi kupitira monganga. Bibeli za silika umpure ntani kuturondora tu kare ure kwanayinye eyi ya likwatakana nawo. (Vagarata 5:19-21) Nompepo donondona kuruganesa umpure moomu a ruganesa muroveli ndjo. Muroveli kuruganesa nondjo dokulisiga-siga mokukwata nomfi dokulisiga-siga. Mokulifana, nompepo donondona kuruganesa umpure wokulisiga-siga mokureta vantu wokulisiga-siga mepangero lyawo.

11. Yisinke ezanekedo, ntani morwasinke natu vhulira kulinyokera?

¹¹ Ndjo zimwe ezi adi ruganesa nompepo donondona kwa kara ezanekedo. Yisinke ezanekedo? Alyo ekambadaro mokupapara kuhamena yokomeho ndi yokupira kudiva. Kwa kwaterera mo eruganeso lyokatemba ndi nonzimbu ndi nontarero mokuzanekeda, ntani nokuzagura nonzodi. Vantu wovanzi kugazara asi ezanekedo kwato siponga, nye Bibeli kulikida asi vazanekedi kurugana kumwe nonompepo donondona. Pasihonena, Yirugana 16:16-18 kwa tumbura ‘mpepo zokuyowora’ ezi za ninkisire mukadona mokurugana ‘eyoworo.’ Nye ga zumbanesere unankondo ou apa va tjidire mo mpepo zondona mwendi.

12. Morwasinke ya karera siponga mokuhetekera kuuyunga kumwe novafe?

 ¹² Nkedi zimwe hena ezi adi pukisisa nompepo donondona vantu mokuvakorangeda va uyunge novafe. Vantu wokulira nomfa domuhali pamwe kuvapukisa magano gepuko kuhamena owo vana fu. Nganga kuvhura a gave mbudi zokulikerera ndi kuvhura a uyunge mezwi lyokulifana ngwendi lyogwina muntu gokufa. Yitundwamo, sinzi sovantu kuyipura asi vafe sili kuna kuparuka ntani eligwanekero nawo kuvatera vanamwenyo mokulididimika ruguwo. Nye nkenye “ehengagwido” olyo alyo sili yimpempa ntani hena siponga. Morwasinke? Morwa nompepo donondona kuvhura kuhonena ezwi lyomuntu gokufa ntani nokupa nganga mbudi kuhamena ogo ana fu. (1 Samwere 28:3-19) Kugwederera ko, ngomu twa lirongere mEgaununo 6, vafe va hageka kukara po. (Episarome 115:17) Yipo nye ‘nkenye ogu a pura movadimu’ kwa mu pukisa nompepo donondona ntani kuna kurwanesa mpango zaKarunga. (Deuteronomium 18:10, 11;  Jesaya 8:19) Yipo nye asi, takamesa po kunyokera ndjo ezi zosiponga ezi adi ruganesa nompepo donondona.

13. Yinke va rugene wovanzi ava ngava tjira nare nompepo donondona?

¹³ Nompepo donondona kapisi kupukisa tupu vantu nye kuvatjilisa. Naina, Satana nonompepo dendi donondona va yi diva asi ‘siruwo sosisupi sina hupu ko’ komeho zemango lyawo, makura awo kuna kara ngesi nonyanya unene kupitakana pwanare. (Ehororo 12:12, 17) Nampili ngoso, mayovi govantu ava ngava tjira nompepo donondona, kwa gwana emanguruko kwado. Ngapi omu va yi rugana eyi? Yinke na vhura kurugana muntu nsene age kuna kulihameka moumpure?

14. Ngwendi Vakriste womoEfeso womouye wokuhova, ngapi omu natu vhura kuhageka kulikwatakana nonompepo donondona?

¹⁴ Bibeli kututantera omu natu rwanesa nompepo donondona nomu natu hageka kulikwatakana nado. Tarurura sihonena soVakriste womouye wokuhova mositata saEfeso. Vamwe mo ngava ruganesa umpure komeho zokuyakara Vakriste. Apa va tokwere kutunda koumpure, yinke va rugene? Bibeli kuuyunga asi: “Wovanzi hena ava ngava ruganesa youmpure, tava pongaike nobuke dawo, makura tava di hwike komeho zovantu navenye.” (Yirugana 19:19) Mokuzonagura nobuke dawo doumpure, Vakriste owo wovape kwa tura po sihonena kowo va hara kurwanesa nompepo donondona naina. Vantu owo va hara kukerera Jehova va hepa kuzonagura po nayinye eyi ya likwatakana noumpure. Ayo kwa kwatera mo yiranda nomarugodi gokugamena muntu ndi mukeke, ntani nomutji nonondandani dokugava erago asi muntu a gwane mugara ndi mukadi ndi yirugana ndi asi vantu va mu hare. Kwa kwaterera mo hena mema gemefuta aga ava ruganesa vantu mokulipopera kovarodi.—1 Vakolinte 10:21.

15. Mokurwanesa nompepo donondona, yisinke twa hepa kurugana?

 ¹⁵ Nomvhura dimwe konyima apa va zonagwire po Vakriste womoEfeso nobuke dawo doumpure, mupositoli Paurusa kwa va diworokesere ‘kerwaneso lyawo lyonompepo donondona.’ (Vaefeso 6:12) Nompepo donondona kapi da hagekere. Ado simpe kwa kondjere mokuvapukisa. Yinke hena va hepere kurugana Vakriste vena? Paurusa ga uyungire asi: “Unene po, damuneni silikandwiso sepuro sokudimisa yikutji yomundiro, eyi a ponyesa Mudona” Satana. (Vaefeso 6:16) Moomu sa kora silikandwiso setu sepuro, yimo ngatu rwanesa nononkondo nompepo donondona.—Mateusa 17:20.

16. Ngapi omu natu vhura kunkondopeka epuro lyetu?

¹⁶ Ngapi nye omu natu vhura kunkondopeka epuro lyetu? Mokulironga Bibeli. Epamo lyekuma kwa korera unene mounankondo wetateko lyalyo. Monkedi zokulifana, epamo lyepuro lyetu kwa korera unene mounankondo wetateko lyalyo, alyo ediwo lyene-lyene lyoNonkango daKarunga, Bibeli. Nsene tu resa nokulironga Bibeli nkenye ezuva, epuro lyetu ngali nkondopara. Ngwendi ekuma lyapama, epuro ngolyo ngali tu gamena kepukiso lyonompepo donondona.—1 Johanesa 5:5.

17. Ntambo musinke za hepa po mokurwanesa nompepo donondona?

¹⁷ Ntambo musinke zopeke va hepere kugusa Vakriste vena womoEfeso? Awo va hepere simpe egameno morwa awo kwa parukire mositata sa zulire nonompepo donondona. Yipo nye Paurusa ga va tanterere asi: “Omu kanderere nkenye apa oku tomu hundire . . . omu kanderere omu azi mu pitisire Mpepo.” (Vaefeso 6:18) Mokumona asi nose kuna kuparuka mouzuni wa zura nonompepo donondona, mulyo kukanderera nelituromo kwaJehova kegameno lyendi mokudirwanesa. Yosili, twa hepa kuruganesa edina lyaJehova momakanderero getu. (Yisewe 18:10) Yipo nye twa kona kutwikira mokukanderera kwaKarunga ‘a tu kunge koMudona,’ Satana Muzonaguli. (Johanesa 17:15) Jehova nga limburura makanderero gokulitura mo ngangoso.—Episarome 145:19.

18, 19. (a) Morwasinke natu vhulira kukara nousili asi kuvhura tu funde merwaneso lyetu lyoyisitwa yopampepo yoyidona? (b) Epuro musinke ngava ka limburura megaununo lyokukwama ko?

 ¹⁸ Nompepo donondona ado siponga, nye kapisi hepero kuditjira nsene ose tu nyokera Muzonaguli nokuhedera Karunga pepi mokurugana mpango Zendi. (Jakopo 4:7, 8) Nonkondo donompepo donondona kwa di yereka. Ado kwa di futisire momazuva gaNowa, ano ngadi ligwanekera nepanguro lyado lyokuhulilira. (Juda 6) Diworoka hena asi ose kwa kara negameno lyovaengeli wononkondo vaJehova. (2 Vahompa 6:15-17) Vaengeli owo va hara sili asi yi tu tompoke mokurwanesa nompepo donondona. Monkango zimwe, vaengeli wovahungami kutukorangeda. Yipo nye asi tu kare pepi naJehova nepata lyendi lyoyisitwa yopampepo yoyilimburukwi. Tu nyokere nkenye umpure ntani nokusikisa mo nkenye apa mapukururo gomoNonkango daKarunga. (1 Peturusa 5:6, 7; 2 Peturusa 2:9) Yipo nye sili kuvhura tu funde merwaneso lyetu lyoyisitwa yopampepo yoyidona.

¹⁹ Nye morwasinke ga pulisire Karunga nompepo donondona noudinikarunga ou wa retera vantu ruhepo rorunene? Epuro olyo ngava ka li limburura megaununo lyokukwama ko.