1, 2. (a) Mokudiva muntu gefumano, morwasinke kapi ayi tanta asi wa mu diva nawa-nawa? (b) Epiyagano musinke lya kara po kuhamena Jesus?

MOUZUNI kwa kara mo vantu wovanzi wokufumana. Vamwe kwa divikwa momukunda ndi mositata ndi mosirongo sawo. Ano vapeke kwa va diva mouzuni mudima. Nampili ngoso, kudiva edina lyagumwe ga fumana kapi ayi tanta asi wa mu diva nawa-nawa. Kapi ayi tanta asi wa diva yuma kuhamena ntundiliro zendi ntani ngapi omu ga kara sili.

² Mouzuni naunye vantu va zuvha ko yokuhamena Jesus Kristusa, nampili moomu ga parukire pevhu nomvhura 2 000 da ka pita. Nye simpe, wovanzi va kara nepiyagano kuhamena Jesus asi yilye ga kere. Vamwe kuuyunga asi age kwa kere tupu mugara gomuwa. Vapeke asi age kwa kere tupu muporofete. Ano vamwe va pura asi Jesus yige Karunga ntani twa hepa kumukerera. Kuvhura ndi?

3. Morwasinke ya karera mulyo koge o dive usili kuhamena Jesus?

³ Ya kara mulyo koge o dive usili kuhamena Jesus. Morwasinke? Morwa Bibeli kwa tanta asi: ‘Mwenyo gwanarunye yigo ogu asi va ku dive asi nyovelike Karunga gosili, nogu wa tuma, Jesus Kristusa.’ (Johanesa 17:3) Yosili, kudiva usili kuhamena Jehova Karunga naJesus Kristusa kuvhura kutwara komwenyo gwanarunye pevhu moparadisa. (Johanesa 14:6) Kugwederera ko, Jesus kwa tura po sihonena sosiwa po asi ngapi omu natu paruka nokutekura vapeke. (Johanesa  13:34, 35) Megaununo lyokuhova mobuke ezi, twa zogerere ko kousili kuhamena Karunga. Tu zeni ngesi tu tarurure ko kweyi azi rongo Bibeli sili kuhamena Jesus Kristusa.

4. Yitumbwisiso “Mesiyasa” ntani “Kristusa,” yisinke ayi tanta?

⁴ Nare komeho Jesus va mu hampuruke, Bibeli za pumbire ewizo lyogu nga tuma Karunga ngoMesiyasa ndi Kristusa. Yitumbwisiso “Mesiyasa” (konkango zoRuhebeli) ntani “Kristusa” (konkango zoRugereka) kutanta asi “Mugwavekwa.” Getumbwidiro ogu Karunga ngano nga mu gwaveka ndi kumuhorowora pomukaro gokulikerera. Momagaununo gokomeho mobuke ezi, ngatu ka lironga yoyinzi  kuhamena evango lyomulyo lyaMesiyasa mokukasikisa mo sitambo saKarunga. Ngatu ka lironga hena kuhamena matungiko aga na vhura kuturetera Jesus nampili ngesi. Nye, komeho zokumuhampuruka Jesus, vanzi nampo va gazarere asi: ‘Yilye nga kara Mesiyasa?’

5. Yisinke ya va dimbwilisire nawa-nawa varongwa vaJesus kumuhamena?

⁵ Mouye wokuhova S.N., varongwa vaJesus Munasareta va yi divire nawa-nawa asi yige Mesiyasa ogu va pumbire. (Johanesa 1:41) Murongwa gumwe, gedina Simoni Peturusa, kwa tanterere Jesus asi: “Nyove Mesiyasa.” (Mateusa 16:16) Ngapi ngano va vhulire varongwa vena, ntani nose, kudimburura asi Jesus sili Mesiyasa getumbwidiro?

6. Yi fanekesa asi ngapi Jehova ga vatera valimburukwi mokudimburura Mesiyasa.

⁶ Vaporofete vaKarunga ava va parukire komeho zaJesus, va pumbire yuma yoyinzi kuhamena Mesiyasa. Yuma eyi ngano ngayi vhura kuvatera vapeke mokumudimburura. Kuvhura tu yi fanekese monkedi ezi: Tu ninkeni nye asi vana ku pura o ze kevango lyoyiviauka lyokundindilira nombesa ndi mahina gorutenda ndi kokapare o ka simbe muntu ogu wa dira kuligwanekera nage rumwe. Ngano kapi tayi vatere nsene gumwe ga ku tanterere ko yuma yokumuhamena ndi? Mokulifana, kupitira movaporofete woBibeli, Jehova ga geve yuma yoyinzi yokufaturura eyi nga rugana Mesiyasa neyi ngayi mu horokera. Masikiliromo gomauporofete aga gomanzi ngano taga vatere valimburukwi mokumudimburura nawa-nawa.

7. Mauporofete musinke gavali ga ya sikilire mo mwaJesus?

⁷ Tarurura yihonena yivali tupu. Somuhowo, nomvhura 700 komeho yi ka horoke, muporofete Mika kwa pumbire asi Getumbwidiro ngano ngava mu hampurukira moBeterehema, kadoropagona mosirongo saJuda. (Mika 5:2) Kupi va mu hampurukilire Jesus? Modoropa zoozo! (Mateusa 2:1, 3-9) Sauvali, komeho zomauye gomanzi, uporofete va tjangera  mwaNdaniyera 9:25 kwa likidire komvhura ezi ngano nga ya monekere Mesiyasa—29 S.N. * Esikiliromo lyomauporofete aga nagamwe kwa likida asi Jesus kwa kere Mesiyasa getumbwidiro.

8, 9. Pekuhwo lyaJesus, yisinke ya likidire asi age sili Mesiyasa?

⁸ Elikido limwe hena asi Jesus kwa kere Mesiyasa kwa ya monekere pepi nehagero lyo-29 S.N. Ozo yizo mvhura Jesus ga zire kwaJohanesa Mukuhwi va ka mu kuhwe momukuro gwaJorodana. Jehova ga tumbwidilire Johanesa silikido yipo ga vhulire kudimburura Mesiyasa. Johanesa ga mwene silikido sina pekuhwo lyaJesus. Kuliza noBibeli eyi yiyo ya horokere: “Jesus kwa pwa tupu kumukuhwa, makura ta zauka mo momema. Va tara ko, eguru lina mu zegurukire, makura ta mono Mpepo zaKarunga tazi mu hegumukire peguru lyendi ngwendi nkutji. Meguru tamu tundu ezwi lina kutanta asi: ‘Ogu yige Munwange ogu na hara, ga za nge komutjima.’” (Mateusa 3:16, 17) Konyima zokumona nokuzuvha eyi ya horokere, Johanesa ga divire nawa-nawa asi Jesus kwa mu tumine Karunga. (Johanesa 1:32-34) Poopo tupu, apa va mu gwavekere nompepo zaKarunga ndi nonkondorugano dendi ezuva lyoolyo, makura Jesus ta kara Mesiyasa ndi Kristusa, ogu va horowere a kare Mupangeli ntani Hompa.—Jesaya 55:4.

⁹ Esikiliromo lyomauporofete goBibeli ntani umbangi waJehova Karunga mwene kwa likida sili asi Jesus yige Mesiyasa getumbwidiro. Nye Bibeli za limburura mapuro gavali gomulyo gapeke kuhamena Jesus Kristusa: Ntundiliro zendi kupi, ntani ngapi omu ga kere ngomuntu?

10. Yinke azi rongo Bibeli kuhamena ekaropo lyaJesus komeho a wize pevhu?

¹⁰ Bibeli kuronga asi Jesus kwa parukire meguru komeho  zokuwiza pevhu. Mika kwa pumbire asi Mesiyasa ngano ngava mu hampurukira moBeterehema ntani ga uyungire hena asi ntundiliro zendi ‘zokutunda kwanare.’ (Mika 5:2) Rorunzi, Jesus mwene nga uyunga asi age kwa parukire meguru komeho zokumuhampuruka ngomuntu. (Johanesa 3:13; 6:38, 62; 17:4, 5) Ngosisitwa sopampepo meguru, Jesus ga kere nelikwatakano lyokulikerera naJehova.

11. Ngapi omu azi yi likida Bibeli asi Jesus yige MunwaJehova gomuwa po unene?

¹¹ Jesus yige MunwaJehova gomuwa po unene morwa konda zomulyo. Age kumutumbura asi “mbeli, muhoverera goyisitwa nayinye,” morwa yige sisitwa sokuhova saKarunga. * (Vakorosi 1:15) Posili sininke simwe hena asi ninkisa ogu Munwa a likerere. Age “Munwendi gelike a huru.” (Johanesa 3:16) Eyi kutanta asi Jesus yige gelike ga sitire Karunga pwagelike. Jesus yige gelike hena ogu ga ruganesere Karunga apa ga sitire yininke nayinye yapeke. (Vakorosi 1:16) Jesus kumutumbura hena asi “Nkango.” (Johanesa 1:14) Eyi kututantera asi nga uyungire po Karunga, pamwe mokutwara nombudi nomapukururo kovana vaGuhwe vapeke wopampepo nava wopanyama.

12. Ngapi omu twa yi diva asi Mbeli kapi za hetakana naKarunga?

¹² Moomu va yi pura vamwe, Mbeli ga hetakana naKarunga ndi? Kapisi yiyo azi rongo Bibeli. Moomu twa yi didilike moparagarafu zina piti, Munwa kwa mu sitire. Kwa kulikida asi ga kere netameko, nye Jehova Karunga kapi ga kara netameko ndi uhura. (Episarome 90:2) Munwa gelike a huru narumwe si ga hetekere ko kuhetakana noGuhwe. Bibeli kuronga nawa-nawa asi Guhya ga pitakana Munwa. (Johanesa 14:28; 1 Vakolinte 11:3) Jehova yige gelike “Karunga  Munankondo nadinye.” (Genesis 17:1) Yipo nye asi, kwato ga hetakana nendi. *

13. Yisinke azi tamba Bibeli apa azi likida asi Munwa “sihwi saKarunga ogu a dili kumoneka”?

¹³ Jehova noMbeli zendi kwa haferere malikwatakano gawo monomvhura mamiliyona gomayovi—nare komeho zokusita eguru lyonombungururu nevhu. Eh, ngapi omu va lihere-here! (Johanesa 3:35; 14:31) Munwa ogu geharo damu-damu Guhwe. Yiyo nye Bibeli azi likida asi Munwa “sihwi saKarunga ogu a dili kumoneka.” (Vakorosi 1:15) Ngamoomu a fana munwa oguhwe monomukaro dokulisiga-siga, Munwa ogu gemeguru nage kwa likidire yikara nountu woGuhwe.

14. Ngapi omu va ya mu hampurukire MunwaJehova gelike a huru ngomuntu?

¹⁴ Meharo MunwaJehova gelike a huru ga sigire eguru ntani nokuwiza pevhu a ya kare muntu. Kuvhura o gazare asi ‘Ngapi omu ya vhulikire asi sisitwa sopampepo va si hampuruke ngomuntu?’ Mokuyisikisa mo eyi, Jehova kwa rugene sitetu. Age ga rundwilire eparu lyoMbeli zendi kutunda meguru momukoga goMujuda Mariya ogu ga dira kulikundama rumwe nomugara. Kapi pwa kere guhwe gopanyama. Yipo nye Mariya ga hampurukire munwa gokusikilira mo ntani ta mu ruku Jesus.—Rukasa 1:30-35.

15. Morwasinke natu uyungira asi mwaJesus yimo twa ya divira nawa Jehova?

¹⁵ Eyi nga uyunga Jesus neyi nga rugana apa ga kere pevhu kutuvatera tu mu dive nawa. Mokugwederera ko, mwaJesus yimo twa ya divira nawa Jehova. Morwasinke yina karere ngesi? Diworoka asi ogu Munwa age damu-damu Guhwe. Yiyo nye Jesus ga tanterere murongwa gwendi gumwe asi: “Ogu ga mona nge, ga mona hena Tate.” (Johanesa 14:9) Nobuke ne domoBibeli edi da divikwa asi Mavangeli—Mateusa, Marukusa,  Rukasa ntani Johanesa—kututantera ko yoyinzi kuhamena eparu noyirugana ntani noyikara yaJesus Kristusa mwene.

16. Unene po, mbudi zaJesus zosinke za kere, ntani marongo gendi kwalye ga tundilire?

¹⁶ Jesus ga divikwire asi “Murongi.” (Johanesa 1:38; 13:13) Yinke nga rongo? Unene po, mbudi zendi kwa kere “Mbudi zoNgwa zoUntungi,” kutanta asi Untungi ndi Uhompa waKarunga, epangero lyemeguru eli ngali pangera evhu nalinye nokukareta po matungiko ganarunye kovantu wovalimburukwi. (Mateusa 4:23) Mbudi zalye za kere? Jesus mwene ga tente asi: “Erongo lyange kapisi lyanyamwange, nye lyogu ga tuma nge,” kutanta asi lyaJehova. (Johanesa 7:16) Jesus ga yi divire asi oGuhwe kwa hara vantu va zuvhe yokuhamena kombudi zongwa zoUhompa. Megaununo 8 ngatu ka lironga yoyinzi kuhamena Uhompa waKarunga ntani eyi ngau ka sikisa mo.

17. Kupi nga rongere Jesus, ntani morwasinke ga litulilire mo unene mokuronga vapeke?

¹⁷ Kupi nga rongere Jesus? Nkenye oku nga gwana vantu—monomukunda nomoyitata nomonodoropa nopomarandesero ntani nomomambo gawo. Jesus kapi nga ndindire asi vantu va mu wizire. Age nga va zire. (Marukusa 6:56; Rukasa 19:5, 6) Morwasinke Jesus ga litulilire mo unene nomokuruganesa siruwo sosinzi mokuzuvhisa nokuronga? Morwa kwa kere mpango zaJehova kwendi. Jesus narunye nga rugana mpango zoGuhwe. (Johanesa 8:28, 29) Nye pwa kara konda zimwe hena eyi nga zuvhisilire. Age kwa fililire nkenda nombunga dovantu edi ngadi mu wizire. (Mateusa 9:35, 36) Awo kwa va sigilire vapitisili woukereli wawo, ava ngano va va rongere usili kuhamena Karunga noyitambo yendi. Jesus ga divire asi ngapi omu va hepere vantu kuzuvha ko kombudi zoUhompa.

18. Yikara musinke yaJesus ayi ku tetukisa unene?

¹⁸ Jesus kwa kere muntu gonkenda nomalizuvho. Vantu va mu mwene asi age munambili ntani ureru kumuhedera. Nampili vanona kapi va mu tjilire. (Marukusa 10:13-16) Jesus  kapi ga peke mpongo. Age kwa nyengere uyilipaki nouhahungami. (Mateusa 21:12, 13) Posiruwo sina apa ngava dili kugwana vakadi efumadeko noyitumbukira, age nga va tekura nefumano. (Johanesa 4:9, 27) Jesus ga linunupikire sili. Ezuva limwe, age ga kuhwire nompadi dovapositoli vendi, sirugana esi nga rugana mukereli gokulinunupika.

19. Sihonena musinke sa likida asi Jesus ga kere nelizuvho koyihepwa yovantu?

¹⁹ Jesus ga kere nelizuvho koyihepwa yovantu. Eyi ya monekere nawa-nawa apa nga rugana yitetu yokuverura mononkondo dompepo zaKarunga. (Mateusa 14:14) Pasihonena, mugara goyingondwe kwa wizire kwaJesus nokuuyunga asi: “Sinene o yi panga, kuvhura kuverura nge.” Jesus mwene ga zuvhire kukora noruhepo rogo mugara. Morwankenda, Jesus ga gonyonwene kuwoko kwendi nokuguma mugara, ta uyunga asi: “Nina yi panga, veruka.” Muveli makura ta veruka! (Marukusa 1:40-42) Kuvhura o gazare asi ngapi omu ga lizuvhire gwina mugara?

20, 21. Ngapi omu ga tulire po Jesus sihonena soulimburukwi kwaKarunga?

²⁰ Jesus ga tulire po sihonena sosiwa po soulimburukwi kwaKarunga. Age kwa limburukwire oGuhwe vemeguru momaukaro nagenye ntani nampili mwankenye makwama-kwamo nomahepeko. Jesus ga nyokere mazedo gaSatana nononkondo. (Mateusa 4:1-11) Nare, vamwe vekoro vaJesus kapi va tulire epuro mwendi, makura tava uyunga asi age “ana piyagana.” (Marukusa 3:21) Nye Jesus kapi ga va pulisilire va mu pukise; age ga twikilire ngorooro kurugana yirugana yaKarunga. Nampili ngava mu swaura nokumuhepeka, Jesus nga lipangere mwene, narumwe si ga hetekere kukoresa varwanesi vendi.—1 Peturusa 2:21-23.

²¹ Jesus kwa kere mulimburukwi dogoro konomfa—nomfa donyanya dokukora momawoko gononkore dendi. (Vafilipi 2:8) Gazadara ko kweyi ga lididimikilire mezuva lyokuhulilira ngomuntu. Va mu kwete, nokumurundira nombangi  doyimpempa, nokumupangura vapanguli wovadona, nokumuzora mbunga, ntani nokumuhepeka vakwayita. Kositji oku va mu pamparere, ga zigilire nomunku gwendi gokuhulilira asi: “Yina siki mo.” (Johanesa 19:30) Nampili ngoso, mezuva lyautatu konyima ga fire Jesus, oGuhwe vemeguru va mu vhumbwire keparu lyopampepo hena. (1 Peturusa 3:18) Konyima tupu zoyivike yoyisesu, age ga tengwire meguru. “Makura yiyo ga ka hingira korulyo rwaKarunga” ntani ga ndindilire a ya gwane nonkondo dokupangera.—Vahebeli 10:12, 13.

22. Yisinke ga sikisire mo Jesus mokukara mulimburukwi dogoro konomfa?

²² Yisinke ga sikisire mo Jesus mokukara mulimburukwi dogoro konomfa? Nomfa daJesus da gava mpito kwetu zokugwana mwenyo gwanarunye pevhu moparadisa, mokuliza nositambo saJehova sopomuhowo. Omu nomfa daJesus da ninka oyo yi wape ngava ka yizogera megaununo lyokukwama ko.