NGAPI omu o ligazara Ezuva lyoMpanguro? Wovanzi kugazara asi vantu mayovi gomamiliyona gumwe-gumwe ngava va reta komeho zosipundi saKarunga. Makura, nkenye gumwe ngava ka mu pangura. Vamwe ngava ka va tungika nerago lyemeguru, ano vapeke ngava va pangwira kehepeko lyanarunye. Nye, Bibeli azo kufaturura siruwo oso ponkedi zapeke. Nonkango daKarunga kusisingonona asi, aso kapisi siruwo sokutjilisa, nye siruwo sehuguvaro ntani newapukururo.

MEhororo 20:11, 12, tatu resa esingonono lyomupositoli Johanesa lyEzuva lyoMpanguro: “Ame makura tani mono sipundi souhompa sosinene sosizera nogu ana hingire po. Age yige gosipara esi lya duka evhu neguru, ayo kapi hena ya moneka. Ame makura tani mono vafe wovakurona nava wovanona, awo kuna sikama komeho zosipundi souhompa. Makura tava penuna nobuke, pomuhowo buke zomwenyo. Vafe makura tava va pangwisisa koyirugana yawo, moomu va yi tjanga monobuke.” Yilye Mupanguli ogu va singonona mo?

Jehova Karunga yige Mupanguli gomunene govantu. Nye, age ga gava sirugana esi sokupangura kwagumwe gwapeke. Kuliza noYirugana 17:31, mupositoli Paurusa kwa uyungire asi Karunga “ga tokora ezuva eli nga pangwisisa uzuni mouhungami koMugara ogu ga horowora.” Mupanguli ogu ga horowora yige Jesus Kristusa gomuvhumbuki. (Johanesa 5:22) Siruwoke ngali tameka Ezuva lyoMpanguro? Ntani siruwo sokuhura kupi ngali kara?

Buke zEhororo kulikida asi Ezuva lyoMpanguro ngali tameka konyima zoyita yaHarumagedoni, apa ngendeseso zaSatana  pevhu ngava zi zonagura po. * (Ehororo 16:14, 16; 19:19–20:3) Konyima zaHarumagedoni, Satana novaengeli vendi ngava va manga monomango nomvhura eyovi. Posiruwo oso, vapingwa vemeguru 144 000 ngava kara vapanguli nokukapangera “kumwe naKristusa nomumvho eyovi limwe.” (Ehororo 14:1-3; 20:1-4; Varoma 8:17) Ezuva lyoMpanguro kapisi sihorokwa sokugenderera sonovili 24 tupu. Nye aso nomvhura eyovi limwe.

Mosiruwo oso sonomvhura eyovi, Jesus Kristusa nga ka “pangura vanamwenyo novafe.” (2 Timoteusa 4:1) “Vanamwenyo” ngava ka kara “emukurumbunga” lyava ngava ka paruka Harumagedoni. (Ehororo 7:9-17) Mupositoli Johanesa kwa mwene hena “vafe . . . komeho zosipundi souhompa” sompanguro. Moomu ga yi tumbwidire Jesus, “ngava zuvha ezwi [lyaKristusa] navenye ava va kara monontoko, makura tava pwaga mo” kupitira mevhumbuko. (Johanesa 5:28, 29; Yirugana 24:15) Nye kuliza nosinke ngava va pangwira navenye?

Kuliza nemoneko lyamupositoli Johanesa, “tava penuna nobuke,” makura vafe “tava va pangwisisa koyirugana yawo, moomu va yi tjanga monobuke.” Monobuke edi kwa tjanga mo yirugana yovantu yanare ndi? Hawe, kapi ngava pangura vantu mokuliza neyi va rugene nare komeho zokufa. Ngapi omu twa yi diva oyo? Bibeli kuuyunga asi: “Yeeyi muntu nsene asi ana fu, makura ana manguruka mo nye mononkondo dononzo.” (Varoma 6:7) Vavhumbuki ngava ka tengwira keparu awo vana manguruka kononzo dawo danare. Yipo nye nobuke ado da hepa kukarera po nompango dimwe daKarunga. Mokuparuka narunye, vaparuki woHarumagedoni ntani novavhumbuki ngava ka hepa ku ka limburukwa koyipango yaKarunga, kukwatera mo nompango donompe edi nga ka vhura ku ka horora Jehova mosiruwo sonomvhura eyovi. Kutanta asi nkenye gumwe ngava ka mu pangura kuliza neyi nga ka rugana mosiruwo sEzuva lyoMpanguro.

Mosiruwo sEzuva lyoMpanguro mayovi gomamiliyona govantu ngaga ka gwana mpito zawo zokuhova mokukalironga kuhamena  mpango zaKarunga ntani nokuzisikisa mo. Eyi kutanta asi ngaku ka kara sirugana sosinene serongo. Yosili, “navenye ngava lirongera mo asi uhungami yinke.” (Jesaya 26:9) Nampili ngoso, kapisi navenye ngava ka hara ku ka sikisa mo mpango zaKarunga. Jesaya 26:10 kuuyunga asi: “Vadinikarunga nampili o va fire nkenda, kapi ava lirongo eyi ya hungama. Nomosirongo si esi sovahungami, awo kurugana udona; awo kunyoka kudimburura unene woge.” Vadinikarunga ava ngava ka va zonagura po narunye mosiruwo sEzuva lyoMpanguro.—Jesaya 65:20.

Pehagero lyEzuva lyoMpanguro, vantu ngava ka paruka hena ngovantu wokusikilira mo. Mosiruwo sEzuva lyoMpanguro vantu ngava ka va tengwidira koukaro wanare wokusikilira mo. (1 Vakolinte 15:24-28) Makura eheteko lyokuhulilira ngali ka horoka. Satana ngava ka mu mangurura monomango dendi ntani nokukamupulisira mokukaheteka ku ka pukisa vantu sikando sokuhulilira. (Ehororo 20:3, 7-10) Owo ngava mu nyokera ngava ka hafera esikiliromo lyene-lyene lyetumbwidiro lyoBibeli asi: “Muhungami nga gusa sirongo nga tunge mo narunye-narunye.” (Episarome 37:29) Yosili, Ezuva lyoMpanguro ngali ka kara etungiko kovantu navenye wovalimburukwi!