1. Ekanderero musinke lya divikwa natu ka kona-kona?

MAMILIYONA govantu mouzuni mudima ga diva ekanderero eli ava tumbura wovanzi asi Guhyetu gemeguru ndi Ekanderero lyaHompa. Matumburo nagenye kwa kulikida kekanderero lya divikwa eli ga geve mwene Jesus Kristusa ngosihonena. Alyo ekanderero lyomagano gomulyo, ntani ekonakono lyomahundiro galyo gatatu gopomuhowo ngali ku vatera mokulironga ko kweyi azi rongo Bibeli sili.

2. Yininke musinke yitatu yokukanderera eyi ga rongere Jesus varongwa vendi?

² Ketameko lyekanderero eli lyosihonena, Jesus kwa pangerere vapurakeni vendi asi: “Nsene tomu kanderere, omu kanderere ngesi asi: ‘Guhyetu gemeguru. Edina lyoge ava li pongore. Uhompa woge au wize. Mpango zoge ava zi [sikise] mo pevhu ngwendi meguru.’” (Mateusa 6:9-13) Yisinke aga tanta mahundiro aga gatatu?

3. Yinke twa hepa kudiva kuhamena Uhompa waKarunga?

³ Twa lirongere ko nare yoyinzi kuhamena edina lyaKarunga, Jehova. Ano twa zogera ko nakauke kuhamena mpango zaKarunga—eyi ga rugene ntani neyi nga ka ruganena simpe vantu. Nampili ngoso, kosinke ga tembe Jesus apa ga tu tanterere tu kanderere asi: “Uhompa woge au wize”? Yisinke Uhompa waKarunga? Ngapi omu ngali pongora ewizo lyawo edina  lyaKarunga? Ntani ngapi omu ngali ka sikisa mo ewizo lyoUhompa mpango zaKarunga?

4. Yisinke Uhompa waKarunga, ntani yilye Hompa gwawo?

⁴ Uhompa waKarunga awo epangero eli ga tulisire po Jehova Karunga kumwe naHompa ogu ga horowere. Yilye Hompa goUhompa waKarunga? Jesus Kristusa. Jesus ngoHompa age ga pitakana vapangeli navenye wovantu ntani age kumutumbura asi: “Hompa gohompa noHamba gonohamba.” (1 Timoteusa 6:15) Age ga kara nononkondo dokurugana uwa kupitakana nkenye mupangeli govantu, nampili wovawa po pokatji kawo.

5. Kutundilira kupi ngau pangera Uhompa waKarunga, ntani kupi ngau pangera?

⁵ Uhompa waKarunga kutundilira kupi ngau pangera? Mokugwana elimbururo, gazara tanko asi: Kupi ana kara Jesus? Yosili to diworoka wa lirongere asi age kwa mu dipagere kositji sokukoresa, ntani hena va mu vhumbwire. Konyima tupu, ga rondere meguru. (Yirugana 2:33) Oko yiko wa kara Uhompa waKarunga—meguru. Morwa yeeyi Bibeli kuutumbura asi “untungi weguru.” (2 Timoteusa 4:18) Nampili ngomu wa kara Untungi ndi Uhompa waKarunga meguru, awo ngau pangera pevhu.—Ehororo 11:15.

6, 7. Yisinke ayi ninkisa Jesus a kare Hompa gokulikerera?

⁶ Yinke ayi ninkisa Jesus a kare Hompa gokulikerera? Konda zimwe zezi asi: Age narumwe si nga fe. Mokuhetakanesa Jesus kumwe novahompa wovantu, Bibeli kumutumbura asi “gelike thi a dili kufa. Age kwa kara mouzera wa ha si kuvhura kuhedera muntu.” (1 Timoteusa 6:16) Eyi kutanta asi yininke nayinye yoyiwa eyi a rugana Jesus ngayi karerera. Ano age nga ka rugana yininke yoyinzi yoyiwa.

⁷ Tarurura uporofete ou woBibeli kuhamena Jesus: “Mpepo zaHOMPA ngazi mu pa unongo nediwo nomayere gokupangera mbunga zendi. Age nga diva eharo lyaHOMPA oku ta mu  fumadeke, age nga hafera kumulimburukwa. Age kapi nga pangera moomu gana kumona meho gendi ndi yonguwire; nohepwe nga di pangura pauhunga ano valinunupiki vepevhu nga va tokwera nawa.” (Jesaya 11:2-4) Nonkango odo kulikida asi Jesus nga kara Hompa gouhunga gonkenda kovantu vepevhu. Ono hara kukara nomupangeli gwangoso?

8. Wolye ngava pangera kumwe naJesus?

⁸ Usili umwe hena wokuhamena Uhompa waKarunga wou: Jesus kapi nga pangera gelike. Vamwe ngava pangera kumwe nendi. Pasihonena, mupositoli Paurusa ga tanterere Timoteusa asi: “Nsene tu didimika ngorooro, ngatu ka pangera kumwe nendi.” (2 Timoteusa 2:12) Yimo, Paurusa naTimoteusa, ntani navamwe wokulimburukwa ava ga horowora Karunga ngava ka pangera kumwe naJesus moUhompa wemeguru. Vangapi ngava gwana situmbukiro oso?

9. Vangapi ngava ka pangera kumwe naJesus, ntani siruwoke ga tameka Karunga kuvahorowora?

⁹ Moomu va yi didilika mEgaununo 7 mobuke ezi, mupositoli Johanesa kwa mu pere emoneko omu ga mwene “Nzwigona [Jesus Kristusa] zina sikama pondundu zaSiyoni [evango lyendi lyosiuhompa meguru] kumwe novantu mayovi efere nonomurongo ne nane, ava va tjangera edina lyendi neli lyoGuhwe poyipara yawo.” Wolye owo 144 000? Johanesa mwene kututantera asi: “Awo kukwama Nzwigona nkenye oku zina vyuka. Awo yiwo va zowora mo movantu va kare wokuhoverera vaKarunga noNzwigona.” (Ehororo 14:1, 4) Yimo, awo vasikuli wovalimburukwi vaJesus Kristusa ava va horowora mokulikerera mokukapangera kumwe nendi meguru. Konyima zokuvapindura monomfa keparu lyemeguru, “ngava pangera ngohompa evhu nalinye” kumwe naJesus. (Ehororo 5:10) Kutundilira momazuva govapositoli, Karunga kwa horowora Vakriste wokulimburukwa mokusikisa mo sivaro 144 000.

10. Morwasinke alyo ewapaiko lyeharo asi Jesus nava 144 000 va ya pangere vantu?

¹⁰ Alyo ewapaiko lyeharo mokumona asi va horowora Jesus  nava 144 000 mokupangera vantu. Konda zimwe zeezi: Jesus ga diva asi ngapi omu ya fana mokukara muntu nokuhepa. Paurusa ga tente asi Jesus kapisi gumwe “ogu a dili kupakera mbili maupirankondo getu, yeeyi nage kwa mu hetekere moomu ose, nye kapi ga paka nzo.” (Vahebeli 4:15; 5:8) Ano ava ngava pangera kumwe nendi nawo va kere vantu wokuhepa nokulididimikira. Mokugwederera ko, nawo va kondjere nokupira kusikilira mo ntani nokulididimikira mauvera gokulisiga-siga. Yosili, awo ngava kwata egano maudigu aga ava ligwanekere nago vantu!

11. Morwasinke ga uyungire Jesus asi varongwa vendi va hepa kukanderera asi mpango zaKarunga zi sike mo meguru?

¹¹ Jesus apa ga tente asi varongwa vendi va kanderere asi Uhompa waKarunga u wize, age hena ga tente asi va hepa kukanderera asi mpango zaKarunga ava zi sikise mo “pevhu ngwendi meguru.” Karunga mweli meguru, ntani mpango zendi narunye kuzisikisa mo vaengeli wokulimburukwa. Nampili ngoso, mEgaununo 3 mobuke ezi, twa lirongere asi muengeli gomudona ga hagekere kurugana mpango zaKarunga ntani ga ninkisire oAdamu naEva va zone. Megaununo 10 ngatu ka lironga mo yoyinzi kweyi azi rongo Bibeli kuhamena muengeli ogu gomudona, ogu ava tumbura asi Satana Muzonaguli. Satana ntani novaengeli ava va horowora kumukwama—kuvatumbura asi nompepo donondona—kwa va pulisilire kukara meguru posiruwo songandi. Kutanta asi kapisi navenye meguru ngava rugana mpango zaKarunga. Nye eyi ngano ya rundurukire apa ngano wa vareka Uhompa waKarunga kupangera. Hompa gomupe ogu va tura po, Jesus Kristusa, ngano nga ya rwa yita naSatana.—Ehororo 12:7-9.

12. Yihorokwa musinke yivali yomulyo va singonona mEhororo 12:10?

¹² Nonkango douporofete edi dina kukwama ko kusingonona eyi ngano ngayi horoka: “Ame makura tani zuvhu ezwi lyenene meguru, lina kuzigira asi: ‘Ntaantani  eparu nononkondo noUntungi yaKarunga gwetu, nepangero lyaKristusa gwendi. Yeeyi muheti govakwetetu [Satana], ogu nga va heta mutenya nomasiku kwaKarunga gwetu, vana mu zuguma mo.’” (Ehororo 12:10) Ono nongonona yihorokwa yivali yomulyo eyi va singonona movelise zoBibeli ozo ndi? Somuhowo, mepangero lyaJesus Kristusa Uhompa waKarunga tau tameke kupangera. Sauvali, Satana va mu zugumina pevhu a tunde mo meguru.

13. Yisinke ya horoka apa Satana va mu zuguma mo meguru?

¹³ Yitundwamo musinke moyo yihorokwa yivali? Kombinga zeyi ya horokere meguru, tatu resa asi: “Yipo nye asi, hafa ove eguru nava va kara mo!” (Ehororo 12:12) Yimo, vaengeli wokulimburukwa meguru kwa hafa morwa ngesi nkenye gumwe meguru mulimburukwi kwaJehova Karunga, Satana ntani novaengeli vendi mwato. Amo kwa kara mo mbili nouumwe wokukererera. Mpango zaKarunga ngesi va zi sikisa mo meguru.

14. Yisinke ya horoka morwa Satana va mu zugumina pevhu?

¹⁴ Ngapi nye kuhamena evhu? Bibeli kulimburura asi: “Nye nane vakwetu ava mwa kara pevhu nemefuta, yeeyi Muzonaguli ana hegumukire kweni nehandu lyenene, morwa ana diva asi siruwo sendi esi sina hupu ko, sisupi!” (Ehororo 12:12) Satana ana handuka morwa mokumuzuguma mo meguru ntani siruwo sendi sisupi sina hupu ko. Mehandu lyendi kwa kureta ehudi pevhu. Ngatu ka lironga ko yoyinzi kuhamena ehudi olyo megaununo lyokukwama ko. Nye mokugazara kweyi, kuvhura tu lipure asi: Ngapi omu ngau vhura Uhompa kusikisa mo mpango zaKarunga pevhu?

15. Yisinke mpango zaKaruga kevhu?

¹⁵ Gazara nokudiworoka mpango zaKarunga kevhu. Wa zi lirongere mEgaununo 3. MoEdeni, Karunga ga likidire asi mpango zendi kwa kara asi evhu li kare paradisa zokuzura vantu wovahungami wokupira kufa. Satana ga ninkisire oAdamu naEva va zone, nye eyi kapi ya rundwilire sitambo saKarunga kevhu, kwa si rangesere tupu. Sitambo saJehova simpe  asi: “Muhungami nga gusa sirongo nga tunge mo narunye-narunye.” (Episarome 37:29) Ano Uhompa waKarunga ngau ka yi sikisa mo oyo. Monkedi musinke?

16, 17. Yinke azi tu tantere Ndaniyera 2:44 kuhamena Uhompa waKarunga?

¹⁶ Tarurura uporofete womoNdaniyera 2:44 (Bibeli zoRutjadi). Tatu resa mo asi: “Komazuva govahompa owo Karunga gemeguru nga ka tura po uhompa umwe ou ngava dira kuzonagura konomvhura nadinye. Mpili epangero lyawo kapi ngava li gava kovantu nawopeke; nye awo ngau ka ndembagura po . . . mauhompa aga nagenye, awo ngau ka sikama narunye.” Yinke yina kututantera eyi kuhamena Uhompa waKarunga?

¹⁷ Muhowo, ayo kututantera asi Uhompa waKarunga kwa u tulire po “komazuva govahompa owo,” kutanta asi apa pwa kere simpe mauhompa gapeke. Rwauvali, kututantera asi Uhompa ngau kererera narunye. Kapi ngava u funda ntani nokuupinganena po si mapangero gapeke. Rwautatu, tatu mono asi ngapa kara yita pokatji koUhompa waKarunga ntani nomauhompa gouzuni ou. Uhompa waKarunga ngau ka funda. Moruhura, awo ngau ka kara epangero lyelike lyokupangera vantu. Makura vantu ngava ka hafera upangeli wouwa po ou va dira kuhafera rumwe.

18. Ngapi omu ava yi tumbura yita yokuhulilira pokatji koUhompa waKarunga ntani nomapangero gouzuni ou?

¹⁸ Bibeli kufaturura yoyinzi kuhamena yita yokuhulilira pokatji koUhompa waKarunga ntani nomapangero gouzuni ou. Pasihonena, azo kuturonga asi ngomu una kuhedera uhura, nompepo donondona ngadi hanesa yimpempa mokupukisa ‘ohompa wouzuni naunye.’ Nositambo musinke? Asi “di ka va pongaike [ohompa] va ya rwe yita mezuva olyo lyenene lyaKarunga Munankondo.” Ohompa vepevhu ngava va pongaika pevega “eli ava tumbura moRuhebeli asi Harumagedoni.” (Ehororo 16:14, 16) Eyi ava uyunga monovelise odo mbali kulikida asi yita yokuhulilira pokatji komapangero  govantu noUhompa waKarunga kuyitumbura asi Harumagedoni.

19, 20. Yisinke ya kondera mpango zaKarunga zi dire kusika mo ngesi pevhu?

¹⁹ Yinke ngau ka sikisa mo Uhompa waKarunga moyita yaHarumagedoni? Gazadara kompango zaKarunga kevhu. Jehova Karunga kwa here asi evhu va li zwide vantu wovahungami wokusikilira mo va mu kerere moParadisa. Yinke yina kuyikondera ngesi mokuhoroka? Muhowo, ose vananzo, ntani ose kuvera nokufa. Nampili ngoso, twa lirongere mEgaununo 5 asi Jesus ga tu fira yipo tu vhure kuparuka narunye. Nampo, to diworoka nonkango edi va tjanga mEvangeli lyaJohanesa: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.”—Johanesa 3:16.

²⁰ Udigu umwe wou asi sinzi sovantu kurugana yininke yoyidona. Awo kutanta yimpempa nokukumbagera ntani nokuhondera. Kapi vana hara kurugana mpango zaKarunga. Vantu ava ava rugana yininke yoyidona ngava ka va zonagura po moyita yaKarunga yaHarumagedoni. (Episarome 37:10) Simpe konda zimwe eyi mpango zaKarunga za dira kusika mo pevhu zeezi asi mapangero kapi aga korangeda vantu va zi rugane. Mapangero gomanzi kwa kara noupirankondo ndi nonyanya ndi nepiyagano. Bibeli za vyukilira mokuuyunga asi: “Mouzuni omu mwa kara vanankondo ava ava hepekere mo vakwaawo.”—Muudisi 8:9.

21. Ngapi ngau ka sikisa mo Uhompa mpango zaKarunga pevhu?

²¹ Konyima zaHarumagedoni, vantu ngava ka kara nepangero limwe tupu, Uhompa waKarunga. Uhompa owo ngau ka sikisa mo mpango zaKarunga nokukareta matungiko gokutetukisa. Pasihonena, ngau ka gusa po Satana novaengeli vendi. (Ehororo 20:1-3) Nonkondo donzambo zaJesus ngava di ruganesa yipo asi vantu wovalimburukwi kapi ngava ka vera nokufa. Nye, mepangero lyoUhompa awo ngava  ka vhura kukaparuka narunye. (Ehororo 22:1-3) Evhu ngava ka li ninka paradisa. Yipo nye, Uhompa ngau ka sikisa mo mpango zaKarunga pevhu nokupongora edina lyaKarunga. Yinke ayi tanta eyi? Ayo kutanta asi ezuva limwe nkenye gumwe ogu nga kara mepangero lyoUhompa waKarunga nga ka fumadeka edina lyaJehova.

22. Morwasinke twa yi divira asi Uhompa waKarunga kapi wa wiza apa ga kere Jesus pevhu ndi konyima tupu paapa va mu vhumbwire?

²² Apa ga tanterere Jesus vasikuli vendi mokukanderera asi: “Uhompa woge au wize,” ya zerere nawa asi Uhompa kapi wa wizire posiruwo sina. Awo nye wa wizire apa ga rondere Jesus meguru ndi? Hawe, morwa oPeturusa naPaurusa kwa tente asi konyima zokuvhumbura Jesus, uporofete wemEpisarome 110:1 kwa sikilire mo mwendi: “HOMPA [Jehova] kwa tanterere hompa gwange asi, ‘Yo hingire oku korulyo rwange, dogoro noku ngani tura nonkore doge konhi zonompadi doge.’” (Yirugana 2:32-35; Vahebeli 10:12, 13) Kwa kere po siruwo sendindiro.

23. (a) Siruwoke wa tamekere Uhompa waKarunga kupangera? (b) Yinke ngava ka zogera megaununo lyokukwama ko?

²³ Siruwo sokuhura kupi? Mouye wo-19, valirongi woBibeli wovawa kwa varwire asi siruwo sendindiro ngano ngasi haga mo-1914. (Kombinga zezuva eli, tara koMagwedereroko, pomapenuno 215-218.) Yihorokwa yomouzuni eyi ya varekere  mo-1914 kupameka usili wevaruro lyovalirongi woBibeli vena. Esikiliromo lyouporofete woBibeli kwa likida asi mo-1914 Kristusa ga ya kere Hompa ntani Uhompa waKarunga wemeguru wa tamekere kupangera. Ose kuna kuparuka ngesi ‘mosiruwo sosisupi’ esi sina mu hupire po Satana. (Ehororo 12:12; Episarome 110:2) Kuvhura tu uyunge nousili asi ntaantani tupu Uhompa waKarunga ngau ka rugana mokukasikisa mo mpango zaKarunga pevhu. Ove to gazara asi ezi mbudi zongwa ndi? Wa yi pura asi usili ndi? Egaununo lyokukwama ko ngali ka ku vatera mokukamona asi Bibeli sili kuronga yininke eyi.