Musiti gwetu nondunge kutupitakana. Age Guhya ogu ga tu hara nokutupakera mbili. Kapi ga tu ungire asi tu lipangere nyamwetu. (Jeremiya 10:23) Ngwendi moomu vanona va hepa mavyukiso govakurona, nose twa hepa mavyukiso gaKarunga. (Jesaya 48:17, 18) Nompango doBibeli kugava mavyukiso gokutunda kwaKarunga.—Resa 2 Timoteusa 3:16.

Nompango nonoveta daJehova kuturonga omu natu paruka monaruwa ngesi ntani nomu ngatu vhura kukagwana mwenyo gwanarunye komeho. Mokumona asi Karunga yige ga tu sita, ayo ya wapa tu tambure mavyukiso gendi.—Resa Episarome 19:7, 11; Ehororo 4:11.

Nompango dimwe doBibeli kutulikida eyi ana tu harere Karunga tu rugane momaukaro gokulisiga-siga. Ano dapeke kurugana tupu momaukaro gongandi. (Deuteronomium 22:8) Twa hepa kuruganesa nondunge mokukwata egano omu natu ruganesa nompango doBibeli momaukaro gokulisiga-siga. (Yisewe 2:10-12) Pasihonena, Bibeli kuturonga asi eparu uhwi wokutunda kwaKarunga. Mpango ozo kutuvatera koyirugana, nemembo ntani morugendo. Azo kutuvatera tu dire kutura eparu lyetu mosiponga.—Resa Yirugana 17:28.

Jesus ga tumbwire nompango mbali domulyo po. Zokuhova kwa tumbura sitambo seyi va va sitira vantu, mokudiva Karunga nokumuhara ntani kumukarera noulimburukwi. Twa hepa kugazadara mpango ozo  nsene tatu tura po matokoro. (Yisewe 3:6) Ava ava kwama mpango ezi kukara vakaume vaKarunga, kugwana ruhafo rwene-rwene ngesi ntani komeho mwenyo gwanarunye.—Resa Mateusa 22:36-38.

Mpango zauvali kutuvatera tu tulise po malikwatakano gomawa novakwetetu. (1 Vakolinte 13:4-7) Mokusikisa mo mpango ezi kwa kwatera mo kuhonena omu Karunga a tekura vantu.—Resa Mateusa 7:12; 22:39, 40.

Nompango doBibeli kuronga vemepata omu nava lihara-hara. (Vakorosi 3:12-14) Nonkango daKarunga kugamena hena mapata pokuronga asi nonkwara da hepa kukarerera.—Resa Genesis 2:24.

Kusikisa mo nompango doBibeli kutugamena meparu. Pasihonena, vahona kwa hara kukuta varugani ava ava paruka kuliza nonompango doBibeli kuhamena kuhungika ntani kurugana unene. (Yisewe 10:4, 26; Vahebeli 13:18) Nonkango daKarunga kuturonga hena asi yi tu gwanene po eyi twa kara nayo ntani asi elikwatakano lyetu naKarunga mulyo unene kupitakana yiweka.—Resa Mateusa 6:24, 25, 33; 1 Timoteusa 6:8-10.

Kusikisa mo nompango doBibeli kutuvatera tu kare tuna kanguka. (Yisewe 14:30; 22:24, 25) Pasihonena, kusikisa mo veta zaKarunga kuhamena unkorwe tayi tu gamene komauvera nokoyiponga. (Yisewe 23:20) Jehova kapi ga silika marovhu nye kapisi tu kare womakurunwa. (Episarome 104:15; 1 Vakolinte 6:10) Nompango doBibeli kuturonga tu takamese eyi atu rugana, ntani hena neyi atu gazara. (Episarome 119:97-100) Vakriste wousili kusikisa mo nompango daKarunga mokufumadekera po Jehova, kapisi mokugwanena mo tupu uwa wavene.—Resa Mateusa 5:14-16.