SIRONGWA 10
Ngapi no dimburura ukarelikarunga wousili?
1. Pwa kara ukarelikarunga umwe tupu wousili ndi?
“Omu tjire vaporofete woyimpempa.”—MATEUSA 7:15.
Jesus kwa rongere varongwa vendi ukareli umwe tupu wousili. Awo kwa fana ngwendi nzira zokutwara komwenyo gwanarunye. Kuhamena nzira ozo Jesus kwa tente asi: “Ava ava zi gendi vasesu.” (Mateusa 7:14) Karunga kutambura tupu ukareli ou au rongo usili womoNonkango dendi. Vakareli navenye wousili kwa kara mepuro limwe.—Resa Johanesa 4:23, 24; 14:6; Vaefeso 4:4, 5.
2. Yisinke ga uyungire Jesus kuhamena Vakriste woyimpempa?
“Awo kulikoreka asi va diva Karunga, nye awo kumupatana moyirugana yawo.”—TITUSA 1:16.
Jesus ga rondwere asi vaporofete woyimpempa ngava zonagwisa Ukriste. Awo kumoneka ngwendi vakareli wousili. Awo kutumbura nongereka dawo asi doVakriste. Nye kuvhura o dimburure Vakriste woyimpempa. Monkedi musinke? Pokutara koyikara yawo, ya lisiga neyi yoVakriste wousili.—Resa Mateusa 7:13-23.
3. Ngapi no dimburura Vakriste wousili?
Koneka yidimbwiliso yitano eyi:
-
Vakriste wousili kufumadeka Bibeli asi Nonkango daKarunga. Awo kukondja kuparuka kuliza nonompango damo. Yipo nye ukareli wousili wa lisiga komaukarelikarunga aga aga kwama noveta dosintu. (Mateusa 15:7-9) Vakareli wousili kapi ava udisa yininke yimwe nokurugana nayopeke.—Resa Johanesa 17:17; 2 Timoteusa 3:16, 17.
-
Vakriste wousili kufumadeka edina lyaKarunga, Jehova. Jesus kwa divisire edina lyaKarunga. Age kwa vaterere vantu va dive Karunga nokuvaronga va kanderere asi edina lyaKarunga va li pongore. (Mateusa 6:9) Momukunda gweni, ukareli musinke au tumangeda vantu va ruganese edina lyaKarunga?—Resa Johanesa 17:26; Varoma 10:13, 14.
-
Vakriste wousili kuzuvhisa kuhamena Uhompa waKarunga. Karunga kwa tumine Jesus a ya udise mbudi zongwa zoUhompa. Uhompa waKarunga yiwo welike wokukohonona po maudigu govantu. Jesus nga uyunga kuhamena Uhompa dogoro kezuva lyonomfa dendi. (Rukasa 4:43; 8:1; 23:42, 43) Age kwa rongere vasikuli vendi va zuvhise kuhamena Uhompa waKarunga. Nsene gumwe a ku hedera nokuuyunga nove kuhamena Uhompa waKarunga, koukareli musinke ga hamena?—Resa Mateusa 24:14.
-
Vasikuli vaJesus awo kapisi wouzuni ou woudona. Awo kapi ava lihameke moupolitika ndi monomutangu donomuhoko. (Johanesa 17:16; 18:36) Awo hena kapi ava honene nonkareso noyirugana yoyidona youzuni ou.—Resa Jakopo 4:4.
-
Vakriste wousili kwa lihara-hara. Awo kwa lironga moNonkango daKarunga mokufumadeka vantu womarudi nagenye. Nampili ngomu maukarelikarunga goyimpempa aga kwatesa ko yita, vakareli wousili kapi ava yi rugana. (Mika 4:1-4) Nye, vakareli wousili kuruganesa siruwo noyiweka yawo mokuvatera nokukorangeda wopeke.—Resa Johanesa 13:34, 35; 1 Johanesa 4:20.
4. Upi po ukarelikarunga wousili?
Ukarelikarunga musinke au rongo usili womoNonkango daKarunga, nokufumadeka edina lyaKarunga, nokuudisa asi Uhompa waKarunga yiwo welike wokukohonona po maudigu govantu? Mbunga musinke zovantu azi likida eharo ntani kapi azi lihameke moyita?—Resa 1 Johanesa 3:10-12.
