SIRONGWA 6
Ehuguvaro musinke twa kara nalyo kovafe?
1. Mbudi musinke zongwa kuhamena vafe?
Jesus kwa zire koBetani pepi naJerusarema, apa ga ka sikire kaume kendi Rasarusa ana kara montoko mazuva gane. Jesus kwa zire kontoko naMalita naMariya, vampanza vanakufa. Mbunga zovantu nazo tazi ya pongo. Gazara tupu omu Malita naMariya va hefe apa Jesus ga vhumbwire Rasarusa.—Resa Johanesa 11:21-24, 38-44.
Malita ga yi divire asi vafe ngava va vhumbura. Age ga yi divire asi komeho Jehova nga ka vhumbura vafe va ka paruke hena pevhu.—Resa Joba 14:14, 15.
2. Yisinke ukaro wovafe?
Karunga kwa tanterere Adamu asi: “Ove kwa tunda mevhu, makura ngo kara hena evhu.”—GENESIS 3:19.
Ose kwa tu unga kombundu zevhu. (Genesis 2:7; 3:19) Kwato sininke esi sa kara mwetu asi paruka apa a fu muntu. Apa au fu uruvi wetu, magazaro getu kuhaga. Apa Rasarusa va mu vhumbwire, age kwato eyi ga uyungire kuhamena nomfa dendi morwa vafe kutupu eyi va diva.—Resa Episarome 146:4; Muudisi 9:5, 6, 10.
Karunga kuhwika vantu momundiro gwanarunye ndi? Bibeli kulikida asi vafe kutupu eyi va diva, yipo nye erongo lyomundiro gwanarunye kuswaukisa Karunga. Age ga tonda egano lyokuhwika vantu momundiro.—Resa Jeremiya 7:31.
Tarera vidiyo Yisinke ukaro wovafe?
3. Kuvhura vafe va tu uyungise ndi?
Vafe kapi ava tu zuvhu ndi va tu uyungise. (Episarome 115:17) Nye vaengeli wovadona yiwo ava likisaukire mosihwi sava va fa yipo va uyungise vanamwenyo. (2 Peturusa 2:4) Jehova ga silika kuuyunga novafe.—Resa Deuteronomium 18:10, 11.
4. Wolye ngava ka vhumbura?
Mamiliyona govantu ava vana kara monontoko ngava ka va vhumbwira keparu pevhu. Nampili vamwe ava va rugana yininke yoyidona morwa kudira kudiva Jehova ngava ka va vhumbura.—Resa Rukasa 23:43; Yirugana 24:15.
Ava ngava ka vhumbura ngava ka va pa mpito zokukalironga usili kuhamena Karunga nokukalikida epuro mwaJesus pokumulimburukwa. (Ehororo 20:11-13) Nsene ngava ka rugana yoyiwa ngava ka hafera mwenyo gwanarunye pevhu.—Resa Johanesa 5:28, 29.
5. Yisinke ali tu rongo evhumbuko kuhamena Jehova?
Evhumbuko yiko ngali ka kara morwa Karunga ga tumine Munwendi a ya tu fire. Alyo kuturonga asi Jehova ga tu hara ntani kutufira nkenda. Apa vafe ngava ka va vhumbura, yilye ogu ono kundindira nononkondo kukamona?—Resa Johanesa 3:16; Varoma 6:23.
