Karunga kuna hara vantu womarudi nagenye va mu hedere pepi mekanderero. (Episarome 65:2) Nye kapi a tambura makanderero nagenye. Pasihonena, mugara ogu a hepeke mukadendi, makanderero gendi nokugatambura si. (1 Peturusa 3:7) Apa Vaisraeli ngava rugana udona, Karunga ga nyokere kutambura makanderero gawo. Twa hepa kukwata mawoko gavali mpito ezi ga tu pa Karunga zokukanderera. Morwa age kutambura makanderero nampili govanzoni nsene tava litezurura.—Resa Jesaya 1:15; 55:7.

Mokumona asi kukanderera kuna kara ruha roukareli wetu, twa hepa kukanderera tupu koMusiti gwetu, Jehova. (Mateusa 4:10; 6:9) Morwa kudira kusikilira mo, twa hepa kukanderera kupitira medina lyaJesus ogu ga ya fira nonzo detu. (Johanesa 14:6) Jehova kapi ana hara tu kwate momutwe makanderero ndi tu ga rese. Age ana hara tu mu kanderere kutundilira komutjima.—Resa Mateusa 6:7; Vafilipi 4:6, 7.

Musiti gwetu kuzuvha nampili makanderero aga atu uyungire momutjima. (1 Samwere 1:12, 13) Age kwa hara tu kanderere nkenye apa, pasihonena pokukarara, pokupinduka, pokulya ntani apa atu kara nomaudigu.—Resa Episarome 55:22; Mateusa 15:36.

Kapisi ureru kuhedera pepi naKarunga morwa ose kwa kara mouzuni wovantu wokupira epuro mwaKarunga ntani awo kusensa etumbwidiro lyendi lyokureta mbili pevhu.  (2 Timoteusa 3:1, 4; 2 Peturusa 3:3, 13) Yiyo nye twa hepera kuponga kumwe novapuli vakwetetu tu likorangede-korangede.—Resa Vahebeli 10:24, 25.

Kukara kumwe novantu ava va hara Karunga kutuvatera tu hedere pepi nendi. Mapongo goNombangi daJehova kutupa mpito zokugwanena mo uwa mepuro lyowo va hara Karunga.—Resa Varoma 1:11, 12.

Ove kuvhura kuhedera Jehova pepi pokugazadara ko unene kweyi ono kulironga moNonkango dendi. Gazadara ko koyirugana nokomapukururo ntani komatumbwidiro gendi. Pokukanderera nokugazadara ko kutuvatera tu kwate egano eharo nounongo waKarunga.—Resa Josuwa 1:8; Episarome 1:1-3.

Mokuhedera Karunga pepi wa hepa kumuhuguvara nokutura epuro mwendi. Epuro kuna kara ngwendi sinamwenyo esi sa hepa nondya. Wa hepa kukulika epuro lyoge pokugazadara ko kweyi wa pulira mwaKarunga.—Resa Mateusa 4:4; Vahebeli 11:1, 6.

Jehova kupakera mbili owo va mu hara. Age kuvapopera kwankenye eyi nayi vhura kuzonagwisa epuro lyawo nehuguvaro lyawo lyomwenyo gwanarunye. (Episarome 91:1, 2, 7-10) Age kuturondora kononkareso edi nadi vhura kutuveresa nokutuguvisa. Jehova kuturonga omu natu hafera eparu.—Resa Episarome 73:27, 28; Jakopo 4:4, 8.