SIRONGWA 14
Morwasinke ga karera Karunga nombunga zovakareli vendi pevhu?
1. Morwasinke ga pongaikilire Karunga Vaisraeli va kare vantu vendi?
Karunga kwa pongaikire ruvharo rwaAbirahamu ru kare muhoko ntani kwa gu pere noveta. Age kwa gu tumbwire asi “Israeli,” yigo gwelike muhoko ogu ga pere noveta dendi nokurugana ukareli wousili. (Episarome 147:19, 20) Yipo nye kupitira moVaisraeli nomuhoko dapeke da vhulire kugwana matungiko.—Resa Genesis 22:18.
Karunga kwa horowere Vaisraeli va kare nombangi dendi. Yihorokwa yomosiruwo sawo kulikida omu vantu ava gwanene mo uwa pokulimburukwa nompango daKarunga. (Deuteronomium 4:6) Kupitira moVaisraeli, wopeke va vhulire kuyadiva Karunga gosili.—Resa Jesaya 43:10, 12.
2. Morwasinke Karunga ga horowera vantu naina?
Konyima zosiruwo, muhoko goVaisraeli gwa nyokere Jehova Karunga, makura ta gu pinganesere po nombungakriste. (Mateusa 21:43; 23:37, 38) Ngesi mbunga zoVakriste wousili, kapisi Vaisraeli, kuna kara nombangi daJehova.—Resa Yirugana 15:14, 17.
Jesus kwa wapaikire vasikuli vendi yipo va zuvhise nokutulisa po varongwa monomuhoko nadinye. (Mateusa 10:7, 11; 24:14; 28:19, 20) Sirugana esi kuna kuligwederera unene momazuva aga gopouhura. Jehova kwa pongaika mamiliyona govantu wokonomuhoko nadinye mokuyalipakerera koukareli wendi wousili. (Ehororo 7:9, 10) Vakriste wousili kwa hamena kombunga ezi azi ruganene mouumwe mokulikorangeda-korangeda ntani kulivatera-vatera. Mouzuni mudima, awo kugwana marongo goBibeli gokulifana komapongo gawo.—Resa Vahebeli 10:24, 25.
3. Ngapi mbunga zoNombangi daJehova za tameka mosiruwo setu?
Koyiha yomvhura zo-1870, kambungagona kovalirongi woBibeli kwa tamekere kupapara usili womarongo goBibeli. Va yi divire asi Jesus ga tulisire po mbungakriste zi zuvhise, yipo nye nawo va tamekere kuzuvhisira nakunye. Momvhura 1931 yipo va gusire edina Nombangi daJehova.—Resa Yirugana 1:8; 2:1, 4; 5:42.
4. Ngapi ava gendesa yirugana yokuzuvhisa yoNombangi daJehova?
Posiruwo sovapositoli, mbungagendesi ezi za tambwire Jesus ngoMutwe gombungakriste, ngazi pakere mbili nombungakriste moyirongo yoyinzi. (Yirugana 16:4, 5) Mbungagendesi zokulifana kupakera mbili Nombangi daJehova mosiruwo setu. Azo kupakera mbili nomberewa doNombangi daJehova oku ava tjanga nokutoroka nokurugana yimbapiratjangwa yoBibeli momaraka gokupitakana po-600. Kupitira moyimbapiratjangwa oyo, Mbungagendesi kugava makorangedo nomavyukiso gomoBibeli konombungakriste dokupitakana po-100 000 uzuni mudima. Mwankenye mbungakriste kwa horowora mo vagara va kare vakuronambunga ndi vatareli. Vagara owo kupakera sinka siunda saKarunga.—Resa 1 Peturusa 5:2, 3.
Nombangi daJehova ado kuzuvhisa mbudi zongwa nokutura po varongwa. Ngwendi vapositoli vaJesus, nose kuza momambo tu ka zuvhise. (Yirugana 20:20) Ose kulironga hena Bibeli nava va hara kudiva usili. Nombangi daJehova kapisi mbunga tupu, nye epata eli lya kara naGuhya geharo. Ose twa lihara-hara ngwendi vantu namumbyendi. (2 Vatesaronika 1:3) Mokumona asi vantu vaJehova kwa kara nositambo sokumuhafesa nokuvatera wopeke, awo yiwo epata lyoruhafo po apa pevhu.—Resa Episarome 33:12; Yirugana 20:35.
