SIRONGWA 8
Morwasinke ga pulisilira Karunga udona noruhepo?
1. Ngapi wa tamekere udona?
Karunga kwa pulisira vantu va pangere siruwo sosire mokulikida asi awo kapi tava vhuru kukohonona po maudigu govantu
Udona kwa tamekere pevhu paapa ga tente Satana yimpempa yokuhova. Pomuhowo age kwa kere muengeli gokusikilira mo, nye ‘kapi ga kere mousili.’ (Johanesa 8:44) Age kwa here va mu karere ngwendi Karunga. Satana kwa kumbagerere mukadi gokuhova Eva pokumuzeda a mu limburukwe mevango lyokulimburukwa Karunga. Adamu ga kwatesere ko Eva mokudira kulimburukwa Karunga. Etokoro lyaAdamu kwa reta ruhepo nonomfa.—Resa Genesis 3:1-6, 19.
Apa Satana ga tanterere Eva a dire kulimburukwa Karunga, age kwa rwanesere upangeli waKarunga. Vantu wovanzi kwa kwatesa ko Satana pokunyoka Karunga ngoMupangeli gwawo. Satana kwa ya kara “mupangeli gouzuni” ou.—Resa Johanesa 14:30; 1 Johanesa 5:19.
2. Unsitwe waKarunga kapi wa wepe ndi?
Nayinye eyi a rugana Karunga kwa wapa. Karunga kwa sitire vantu novaengeli nevhuliko lyokumulimburukwa. (Deuteronomium 32:4, 5) Karunga kwa tu sita nemanguruko lyokutokora kurugana uwa ndi udona. Umanguruki owo kutupa mpito tu likide eharo lyetu kwaKarunga.—Resa Jakopo 1:13-15; 1 Johanesa 5:3.
3. Morwasinke ga pulisilira Karunga ruhepo?
Jehova kwa sigilira erwaneso lyoupangeli wendi. Morwasinke? Mokulikida asi pwa hana Karunga, kwato gokuvhura kupangera yipo vantu va gwanene mo mauwa. (Muudisi 7:29; 8:9) Nomvhura 6 000 depangero lyovantu kwa yi likida asi yosili vantu nokuvhura si kulipangera vene. Vapangeli womouzuni ya va sumpira kugusa po yita noukorokotji noudona ntani mauvera.—Resa Jeremiya 10:23; Varoma 9:17.
Mokulisiga, ava ava tambura upangeli waKarunga kugwanena mo uwa. (Jesaya 48:17, 18) Ntaantani, Jehova nga ka zonagure po mapangero nagenye govantu. Vantu ava ava horowora Karunga a kare mupangeli gwawo yiwo velike ngava ka tunga apa pevhu.—Jesaya 11:9; Resa Ndaniyera 2:44.
Tarera vidiyo Morwasinke ga pulisilira Karunga ruhepo?
4. Mpito musinke ali gava elididimikiro lyaKarunga?
Satana kwa tente asi vantu ngava limburukwa Jehova morwa kuhara tupu kugwanena mo uwa. Kuvhura o nyokere po yimpempa oyo. Elididimikiro lyaKarunga kuna kugava mpito kwanatuvenye tu likide nsene asi twa tambura upangeli waKarunga ndi wovantu. Ose kulikida etokoro lyetu momparukiso zetu.—Resa Joba 1:8-12; Yisewe 27:11.
5. Ngapi natu horowora Karunga ngoMupangeli gwetu?
Matokoro getu kulikida nsene asi ose twa hara Karunga ngoMupangeli gwetu
Ose kuhorowora Karunga ngoMupangeli pokulironga Nonkango dendi Bibeli, nokuhama koukareli wousili. (Johanesa 4:23) Ngwendi Jesus, ose hena kapi atu lihameke moupolitika nomoyita.—Resa Johanesa 17:14.
Satana kuruganesa nonkondo dendi a korangede yirugana yokunyata. Apa atu nyokere po yirugana yangoso, vamwe wovakaume vetu nekoro lyetu kuvhura kutuswaura nokuturwanesa. (1 Peturusa 4:3, 4) Yipo nye, twa hepa kutura po etokoro. Ngatu likwatakana novantu ava va hara Karunga ndi? Ngatu limburukwa noveta dendi donongwa ndi? Nsene tu yi rugana, ose ngoso kuna kulikida asi Satana munayimpempa apa ga tente asi kwato ogu nga rugana eyi a tanta Karunga nsene moudigu ana kara.—Resa 1 Vakolinte 6:9, 10; 15:33.
Morwa eharo lyendi lyokuhara vantu, Karunga nga hagekesa po udona noruhepo. Ava va kara nepuro ngava ka hafera mwenyo gwanarunye pevhu.—Resa Johanesa 3:16.
Kuvhura o hafere hena
RUHUNGU
Ruhepo ntaantani ngaru hage po!
Karunga ga tumbwidira mokukagusa po eyi ayi retesa po ruhepo. Ngapi ntani siruwoke nga yi rugana oyo?
