SIRONGWA 5
Yisinke sitambo saKarunga kevhu?
1. Morwasinke Karunga ga sitilire evhu?
Jehova kwa pere evhu kovantu. Alyo embo lyetu. Adamu naEva kapi va va sitilire va tunge meguru, Karunga kwa sitire vaengeli va tunge meguru. (Joba 38:4, 7) Nye Karunga kwa tulire muntu gokuhova moparadisa zongwa ngava tumbura asi sikunino saEdeni. (Genesis 2:15-17) Jehova kwa harerere Adamu novana vendi va paruke narunye pevhu moruhafo.—Resa Episarome 37:29; 115:16.
Paradisa kwa kere tupu mosikunino saEdeni. Adamu naEva va hepere kulivhara va zwide evhu. Awo ngano va pakerere mbili evhu nalinye nokulininka paradisa. (Genesis 1:28) Evhu kapi ngava li zonagura po. Alyo embo va pa vantu.—Resa Episarome 104:5.
Tarera vidiyo Morwasinke Karunga ga sitira evhu?
2. Morwasinke evhu lina dilire kukara ngesi paradisa?
Adamu naEva kapi va limburukwire Karunga, yiyo ga va tjidire mo moEdeni. Paradisa kapi za kere po hena, ano kwato muntu gokuvhura kuzitengwidira po. Bibeli kutanta asi: “Karunga kwa gava uzuni kovadinikarunga.”—Joba 9:24.—Resa Genesis 3:23, 24.
Jehova ga divara sitambo sendi kovantu ndi? Hawe! Age munankondo nadinye. Kapi ngayi mu sumpira yokusisikisa mo. (Jesaya 45:18) Age nga ka tengwidira po paradisa ngamoomu ga yi harera.—Resa Episarome 37:11, 34.
3. Ngapi ngava ka tengwidira po Paradisa pevhu?
NgaHompa ogu ga tura po Karunga, Jesus nga ka tengwidira Paradisa pevhu. Poyita yaHarumagedoni, Jesus nga ka pitisira vaengeli vaKarunga va ka zonagure po navenye ava ava rwanesa Karunga. Makura Jesus nga ka tura Satana monomango nomumvho 1 000. Vantu vaKarunga ngava ka paruka morwa Jesus nga ka va popera poyita oyo. Awo ngava ka hafera mwenyo gwanaruye moParadisa pevhu.—Resa Ehororo 20:1-3; 21:3, 4.
4. Siruwoke ngaru ka haga po ruhepo?
Siruwoke nga ka hagekesa po Karunga udona pevhu? Jesus kwa geve “sidiviso” souhura wouzuni. Yihorokwa yomouzuni kuna kutjilisa vantu ntani ayo kuna kulikida asi ose kuna kuparuka mosiruwo “souhura wouzuni.”—Resa Mateusa 24:3, 7-14, 21, 22.
Mosiruwo sonomumvho 1 000, Jesus nga ka pangera evhu kutundilira meguru nokukagusa po ruhepo. (Jesaya 9:6, 7; 11:9) Jesus kapi tupu nga ka kara Hompa, nye hena Mupristeli goMunene ogu nga ka dongonona po nonzo dava va hara Karunga. Kupitira mwaJesus, Karunga nga ka gusa po mauvera noukurupe nonomfa.—Resa Jesaya 25:8; 33:24.
5. Wolye ngava ka paruka moParadisa?
KoSinyanga soUhompa, ove ngo ka gwana vantu wokuhara Karunga ava va hara kulironga kumuhafesa
Vantu ava ava limburukwa Karunga yiwo ngava ka paruka moParadisa. (1 Johanesa 2:17) Jesus kwa tumine vasikuli vendi va papare vantu wokulinunupika nokuvaronga eyi ga hara Karunga. Mouzuni mudima, Jehova kuna kuronga mamiliyona govantu yipo nga va ka gwane eparu moParadisa pevhu. (Sefaniya 2:3) KoYinyanga yoUhompa yoNombangi daJehova, vantu kulironga omu nava kara vanturagumbo novaguhya novagolikadi ntani novazinya wovawa. Vanona novakurona kulironga kumwe omu nava gwanena mo uwa mombudi zongwa.—Resa Mika 4:1-4.
