Jehova, Karunga goruhafo kuna hara mapata ga kare noruhafo. Age yige mutoti gononkwara. Kukwara paveta mulyo morwa ayo kugamena elikwatakano lyovalikwali ntani kuvatera mokurera nawa vanona. Vakriste va hepa kufumadeka noveta dosirongo pokutjangesa nonkwara dawo paveta.—Resa Rukasa 2:1, 4, 5.

Ngapi Karunga a tara nonkwara? Age kwa hara asi nonkwara di kare malikwatakano gokukarerera. Jehova kwa hara asi mugara nomukadi va fumadeke nonkwara. (Vahebeli 13:4) Age ga nyenga elizumbo. (Marakiya 2:16) Kuhondera yizo zelike konda ga pulisira Jehova Vakriste va lizumbe nokukakwara hena.—Resa Mateusa 19:3-6, 9.

Jehova kwa ungire mugara nomukadi va ruganene kumwe. (Genesis 2:18) Ngomupangeli gepata, mugara ga hepa kupakera mbili epata lyendi nokuvaronga kuhamena Karunga. Ga hepa kuhara unene mukadendi. Mugara nomukadi ava va likwara va hepa kulihara nokulifumadeka. Mokumona asi awo kapi va sikilira mo, va hepa nye kulironga kuligusira po morwa ayo kureta ruhafo mononkwara.—Resa Vaefeso 4:31, 32; 5:22-25, 33; 1 Peturusa 3:7.

Nsene nove nomulikwali goge kuna kuligwanekera nomaudigu, kondjeni mu litekure neharo. (1 Vakolinte 13:4, 5)  Nonkango daKarunga kapi da uyunga asi eligaunuko yizo nkedi zokukohonona po maudigu gomononkwara.—Resa 1 Vakolinte 7:10-13.

Jehova kuna mu harere mu hafe. Age kugava mavyukiso gomawa omu nomu hafera udinkantu weni. Age kuna hara mu gwanene mo uwa mounongo noudivi wovakondi veni. (Vakorosi 3:20) Jehova kumuhafesa apa omu limburukwa vakondi veni.—Resa Muudisi 11:9–12:1; Mateusa 19:13-15; 21:15, 16.

Mwa hepa kurugana unene mu randere vana veni nondya noyidwara. (1 Timoteusa 5:8) Nye mokuninka asi va hafe, mwa hepa hena kuvaronga va hare Karunga nokumuhonena. (Vaefeso 6:4) Sihonena seni sokuhara Karunga ngasi kundama vana veni. Nsene mu va ronga kuliza noNonkango daKarunga, erongo olyo ngali vatera vana veni monkedi zongwa.—Resa Deuteronomium 6:4-7; Yisewe 22:6.

Vanona kugwanena mo uwa nsene mu va korangeda nokuvapandadeka. Va hepa hena kuvapisura nokuvavyukisa. Erongo lyangoso kupopera munona konkareso zondona. (Yisewe 22:15) Nye, mwa ha va pisura monkedi zonyanya.—Resa Vakorosi 3:21.

Nombangi daJehova kwa tjanga nobuke edi nadi vatera vakurona novanona. Magano gomonobuke odo kwa tunda moBibeli.—Resa Episarome 19:7, 11.