SIRONGWA 4
Yilye Jesus Kristusa?
1. Ngapi Jesus va mu sitire?
Yisinke ya ninkisire Jesus a kare ureru kumuhedera?—MATEUSA 11:29; MARUKUSA 10:13-16.
Jesus kwa parukire meguru ngosisitwa sopampepo komeho va ya mu hampuruke pevhu. (Johanesa 8:23) Age yige muhoverera koyisitwa yaKarunga ntani ga vaterere mokusita yininke nayinye yapeke. Age yige gelike ga sitire Jehova pwagelike yiyo ava mu tumbwire asi MunwaKarunga “a huru.” (Johanesa 1:14) Kumutumbura hena asi “Nkango,” morwa kwa kere Muuyungilipo gwaKarunga.—Resa Yisewe 8:22, 23, 30; Vakorosi 1:15, 16.
2. Morwasinke ga wizililire Jesus pevhu?
Karunga kwa tumine Munwendi pevhu pokurundwilira eparu lyendi momukoga gomukadona goMujuda gedina Mariya. Yipo nye, Jesus kapi ga kere noguhwe wopanyama. (Rukasa 1:30-35) Jesus kwa wizire pevhu (1) mokuyaronga usili kuhamena Karunga (2) mokuyatupa sihonena omu natu sikisa mo mpango zaKarunga nampili momaudigu (3) mokuyagava mwenyo gwendi gokusikilira mo gu kare “sizoweseso.”—Resa Mateusa 20:28.
3. Morwasinke twa hepera sizoweseso?
Sizoweseso kuna kara mfeto zokufuta mokuzowora muntu konomfa. (Exodus 21:29, 30) Nomfa noukurupe kapi ya kere sitambo saKarunga kovantu. Ngapi omu tuna yi diva oyo? Karunga kwa tanterere mugara gokuhova Adamu asi nsene a tura “nzo,” nga fa. Ngano Adamu kapi ga zonene, ngano kapi ga fire. (Genesis 2:16, 17; 5:5). Bibeli kwa tanta asi Adamu kwa “reta” nomfa mouzuni. Ruvharo rwendi narunye yiyo rwa pinga nzo noyitundwamo yazo nomfa. Yiyo nye twa hepera sizoweseso.—Resa Varoma 5:12; 6:23.
Yilye ga vhulire kufuta sizoweseso mokutuzowora mo monomfa? Nsene muntu ana fu, age kufuta mfeto zononzo dendi. Kwato muntu gokudira kusikilira mo na vhura kufutira po vakwawo nonzo dawo.—Resa Episarome 49:7-9.
4. Morwasinke ga fililire Jesus?
Jesus kapi ga hepere kufa yipo a fute nonzo dendi, morwa age kwa sikilire mo. Age kwa fililire morwa nonzo detu. Morwa eharo lyendi lyokuhara vantu, Karunga kwa tumine Munwendi a ya tu fire. Jesus nage kwa tu likidire eharo pokulimburukwa koGuhwe pokugava eparu lyendi morwa nonzo detu.—Resa Johanesa 3:16; Varoma 5:18, 19.
Tarera vidiyo Morwasinke ga fililire Jesus?
5. Yisinke ana kurugana ngesi Jesus?
Apa ga kere pevhu, Jesus nga verura vaveli, nokupindura vafe ntani kupopera vantu moyiponga. Age kwa likidire eyi nga ka ruganena komeho vantu navenye wovalimburukwi. (Mateusa 15:30, 31; Johanesa 5:28, 29) Konyima zapa ga fire Jesus, Karunga kwa mu vhumbwilire keparu ngosisitwa sopampepo. (1 Peturusa 3:18) Makura Jesus kwa ndindilire korulyo rwaKarunga dogoro noku Jehova ga mu pere nonkondo dokupangera ngaHompa evhu nalinye. (Vahebeli 10:12, 13) Ngesi Jesus kuna kupangera ngaHompa meguru, ano vasikuli vendi vepevhu kuna kudivisa mbudi zongwa ozo uzuni mudima.—Resa Ndaniyera 7:13, 14; Mateusa 24:14.
Ntaantani tupu Jesus nga ka ruganese nonkondo dendi ngaHompa mokugusa po ruhepo narunye ntani nava ava ru retesa po. Mamiliyona govantu ava vana kutura epuro mwaJesus ntani kumulimburukwa ngava ka hafera eparu moparadisa pevhu.—Resa Episarome 37:9-11.
