Karunga kwa harera vantu va hafere eparu pevhu. Age kwa sitire evhu nanayinye ya kara po morwa kwa hara vantu. Ntaantani nga ka rugane ko yuma yipo vantu navenye ngava ka paruke monaruwa. Nga ka gusa po maruhepo govantu.—Resa Jeremiya 29:11.

Mapangero ya ga sumpira kuhagekesa po ukorokotji nomauvera ntani nomfa. Nye pwa kara mbudi zongwa. Karunga ntaantani nga ka guse po mapangero nagenye nokukatura po epangero lyendi. Owo ngava ka kara mepangero lyendi ngava ka kara mombili ntani moukanguki wouwa.—Resa Jesaya 25:8; 33:24; Ndaniyera 2:44.

Ruhepo ngaru ka haga po apa Karunga nga ka gusa po vantu wovadona pevhu. (Sefaniya 2:3) Siruwoke ngayi ka horoka oyo? Nonkango daKarunga kwa pumba maukaro gomadona aga gana kuhoroka ngesi. Maukaro ogo kuna kulikida asi ntaantani Karunga nga ka hagekese po ruhepo.—Resa 2 Timoteusa 3:1-5.

Twa hepa kulironga kuhamena Karunga moNonkango dendi, Bibeli. Azo kwa fana ngwendi mbilive zokutunda kwaguhyetu ogu ga tu hara. Azo kututantera omu natu hafera eparu ngesi ntani nomu ngatu ka hafera mwenyo gwanarunye komeho. Vamwe kapi tava yi hafere kukumona kuna kulironga Bibeli. Nye wa ha va pulisira va ku hagekese kulironga kuhamena meho zongwa.—Resa Yisewe 29:25; Ehororo 14:6, 7.