SIRONGWA 7
Yisinke Uhompa waKarunga?
1. Yisinke Uhompa waKarunga?
Yisinke ayi ninkisa Jesus a wapere kukara Hompa? —MARUKUSA 1:40-42.
Uhompa waKarunga kuna kara epangero lyemeguru. Awo ngau ya gusa po mapangero nagenye nokuyasikisa mo mpango zaKarunga meguru ntani pevhu. Azo mbudi zongwa asi Karunga nga ka ruganesa Uhompa wendi monkedi zangesi. Ntaantani Karunga nga ka ture po epangero eli ngava ka hafera vantu. Alyo ngali ka reta vantu navenye vepevhu mouumwe.—Resa Ndaniyera 2:44; Mateusa 6:9, 10; 24:14.
Jehova ga horowora Munwendi, Jesus Kristusa a kare Hompa goUhompa wendi.—Resa Ehororo 11:15.
Tarera vidiyo Yisinke Uhompa waKarunga?
2. Morwasinke Jesus ga wapera kukara Hompa?
Morwa age nkenda, kwa hara youhunga. (Mateusa 11:28-30) Ntani ga kara nononkondo dokuvatera vantu. NgaHompa meguru, Jesus nga pangera vantu pevhu. Konyima zevhumbuko lyendi, age kwa zire meguru nokukahingira korulyo rwaJehova a ndindire. (Vahebeli 10:12, 13) Konyima, Karunga kwa pere Jesus nonkondo dokupangera.—Resa Ndaniyera 7:13, 14.
3. Wolye ngava ka pangera naJesus?
Mbunga zava ava tumbura asi “vantu vaKarunga gemeguru-guru” ndi vapongoki yiwo ngava ka pangera kumwe naJesus meguru. (Ndaniyera 7:27) Vapositoli wovalimburukwi vaJesus yiwo va hovere kuhorowora ngovapongoki. Jehova kwa twikira kuhorowora vagara novakadi wovalimburukwi dogoro naina. Ngwendi Jesus, awo kuvavhumbura nomarutu gopampepo.—Resa Johanesa 14:1-3; 1 Vakolinte 15:42-44.
Vantu vangapi ngava za meguru? Jesus kwa va tumbura asi “mbungagona.” (Rukasa 12:32) Sivaro sawo ngasi sika po-144 000. Ngava ka pangera kumwe naJesus.—Resa Ehororo 14:1.
4. Yisinke ya horokere apa ga tamekere Jesus kupangera?
Uhompa waKarunga kwa tamekere kupangera mo-1914. * Apa Jesus va mu tumbire ngaHompa age kwa zugumine Satana novaengeli vendi wovadona pevhu. Satana kwa handukire unene nokureta maudigu pevhu. (Ehororo 12:7-10, 12) Kutunda opo, vantu kwa ligwanekera nomaudigu gomanzi. Yita nonzara nomauvera ntani nomakankamo gevhu kuna kara ruha ‘rosidiviso’ asi Uhompa ntaantani u ya hagekese po maudigu nagenye gepevhu.—Resa Rukasa 21:7, 10, 11, 31.
5. Yisinke una kurugana Uhompa waKarunga?
Kupitira mosirugana sokuzuvhisa, Uhompa waKarunga kuna kureta mouumwe vantu wonomuhoko nadinye. Mamiliyona govantu wokulinunupika kuna kutambura Jesus ngaHompa. Uhompa waKarunga ngau ka va popera apa ngau ka zonagura po uzuni ou woudona. Navenye ava vana hara kugwanena mo mauwa moUhompa waKarunga va hepa kulironga kulimburukwa Jesus.—Resa Ehororo 7:9, 14, 16, 17.
Monomvhura 1 000, Uhompa ngau ka sikisa mo sitambo saKarunga kovantu. Evhu nalinye ngali ka kara paradisa. Konyima Jesus nga ka gava Uhompa koGuhwe. (1 Vakolinte 15:24-26) Yilye ogu ono hara kutantera ko kuhamena Uhompa waKarunga?—Resa Episarome 37:10, 11, 29.
^ para. 6 Komauzera gomanzi omu uporofete woBibeli wa pumbire mvhura 1914, tara pepenuno 216-219 mobuke Yisinke azi rongo Bibeli?
