Vantu wompepo navenye ava ga sitire Jehova, kwa kere vawa. Makura muengeli gumwe ta zonauka. Age yige Satana Mudiyaboli. Satana kwa here asi vantu kontunda zevhu va mu kanderere age mevega lyaJehova. Eyi yiyo ya horokere:

Mosikunino saEden kwa kere mo yitji yoyinzi eyi ya yimine enyango lyouyerere. Jehova kwa tanterere Adamu namukadendi Eva, asi va vhure kulya ko nemanguruko. Nye mwa kere sitji simwe esi ga tente Karunga asi va ha vhura kulya ko. Age kwa tente asi nsene va lya ko, ngano ngava fa lyoolyo ezuva.—Genesis 2:9, 16, 17.

Ezuva limwe Eva kwa kere gelike apa lya mu uyungisire ezoka. Mousili eli lya uyungire kapisi kwa kere ezoka nawa-nawa; ogu kwa kere Satana Mudiyaboli ogu ga yi ninkisire yi moneke ngwendi ezoka lina kuuyunga. Satana kwa tanterere Eva asi age nga kara nonondunge ngwendi Karunga nsene a lya kosiyimwa sokusilika. Age kwa tente hena asi age kapi nga fa. Maruuyungo nagenye aga kwa kere goyimpempa. Eva ga pulire simpe Satana makura ta li siyimwa. Konyima ta pe ko Adam, makura nage ta li.—Genesis 3:1-6.

Mesanseko eli lyousili tatu lirongere mo asi Satana kwa kara murwanesi nomunayimpempa. Age kwa tanterere Eva asi kapi nga fa nsene a dira kulimburukwa kwaKarunga. Eyi kwa kere yimpempa. Age ga fire nye ano Adamu nage ga fire. Satana kapi ga fire poopena, nampili ngomu nga fa moruhura morwa ga zonene. Nye komeho zeyi kuparuka ana kuparuka simpe oku age ta zi komeho mokupukisa vantu navenye. Age kuna kara simpe munayimpempa, oku ta kambadara kutwara vantu koure mokuteza noveta daKarunga.—Johanesa 8:44.

Konyima vaengeli vamwe tava zonauka. Vaengeli ava kwa mwene vakadi wovawa pevhu makura yiyo va here kurara nawo yiyo nye va wizililire pevhu nokugusa marutu gopasintu va kare ngovagara. Yipo va gusire vakadi va kare vawo. Eyi kwa lilimbire netokoro lyaKarunga.—Genesis 6:1, 2; Juda 6.

Eyi kwa reterere hena vantu navenye maudigu gomanzi. Vakadi wovaengeli ava kwa hampurukire vanona, nye awo kapi va kere vanona-nona. Awo kwa kere mamuturungu geruganeno kononkondo nonyanya. Moruhura evhu kwa kere lina zura eruganeno kononkondo makura Jehova yipo ga tokwere kuzonagura po vadinikarunga norukuruhanzo. Vantu ava huru ava va parukire koRuhanzo, kwa kere Nowa gomuhungami nepata lyendi.—Genesis 6:4, 11; 7:23.

Nye vaengeli wovadona kwa tengwire kosirongo sonompepo; awo kapi va fire. Nye awo kwa va futisire. Awo kapi va va pulisilire mokutengura kepata lyaKarunga lyovaengeli wovahungami. Simpe hena Jehova kapi ga va pulisilire kutambura marutu gopasintu. Ano awo moruhura ngava fa mompanguro zonene.—2 Peturusa 2:4; Juda 6.

Moruha romuhowo ronomumvho efere dosiruwo setu, meguru  kwa kere mo yita yoyinene. BukeBibeli zEhororo tazi singonona eyi ya horokere: “Nye meguru tamu sikama yita: Mikayera [Jesus Kristusa ogu va vhumbura] novaengeli vendi [wovawa] va rwise emukongoro [Satana] novaengeli valyo [wovadona]. Emukongoro nalyo tali va rwisa novaengeli valyo, makura tava lifundu novaengeli valyo, nevega lyalyo makura tali pili mo meguru. Emukongoro lyenene makura tava li zuguma mo, ezoka lyanare eli ava tumbura asi Muzonaguli ndi Satana, eli ngali pukisa uzuni naunye. Alyo kuna li zugumine pevhu, kuna li zugumine po kumwe novaengeli valyo [wovadona].”

Yinke ya kweme ko? Mbudi tazi twikire kusanseka: “Yipo nye asi, hafa ove eguru nava va kara mo!” Vaengeli wovawa kuvhura va hafe morwa Satana novaengeli wovadona, ndi nompepo donondona, kapi vana kara hena meguru. Nye ngapi nye kovantu apa pevhu? Bibeli tazi tanta asi: “Nye nane vakwetu ava mwa kara pevhu nemefuta, yeeyi Muzonaguli ana hegumukire kweni nehandu lyenene, morwa ana diva asi siruwo sendi esi sina hupu ko, sisupi!”—Ehororo 12:7-9, 12.

Nhi, Satana novaengeli vendi wovadona kuna kupukisa vantu kontunda zevhu nokuvaretera mahudi gomanzi. Ava vaengeli wovadona kuvatumbura asi vademone. Awo nonkore daKarunga. Awo navenye vadona.