Nompepo yipo da kara! Mosirongo sonompepo sahamoneka kwa kara mo nompepo donongwa nedi donondona. Ado yiwo vantu ava va parukire pevhu yiyo va fa?

Hawe, kapisi yiwo. Apa a fu muntu, mugara ndi mukadi, kapi a zi mosirongo sonompepo ngamomu ava gazara vantu wovanzi. Ngapi omu twa yi diva? Morwa Bibeli yimo za tanta. Bibeli yizo buke zousili ezi za tunda kwaKarunga ahuru gousili, gedina Jehova. Jehova kwa sita vantu; age ga diva nawa eyi ayi va horokere apa ava fu.—Mapisarome 83:18, NW; 2 Timoteusa 3:16.

Bibeli kutanta asi Karunga kwa ‘gusire evhu’ a unge Adamu, muntu gokuhova. (Genesis 2:7) Karunga ta mu tura moParadisa, sikunino saEden. Asi Adamu ndi kwa limburukwire koveta zaJehova, ngano kapi ga fire; nalyeeli ezuva ngano simpe ta paruka kontunda zevhu. Nye Adamu apa ga tezere veta zaKarunga mowina, yipo ga mu tanterere Karunga asi: “Ngo tengwira mevhu omu va ku gusa. Yeeyi ove kwa tunda mevhu, makura ngo kara hena evhu.”—Genesis 3:19.

Yinke yina kutanta eyi? Yimo, kupi ga kere Adamu komeho zokumusita Jehova a tunde mevhu? Nakumwesi ga kere. Age kapi ga kere mpepo ezi va dilire simpe kuhampuruka meguru. Age kapi ga kere po. Apa nye ga tente Jehova asi Adamu ‘nga tengwira mevhu,’ age kwa gazarere asi Adamu nga fa. Kapi ga zire kosirongo sonompepo. Ponomfa dendi Adamu kwa kere hena ga hana  mwenyo nokudira kukara po hena. Nomfa yido epiropo lyomwenyo.

Nye ngapi nye kwavamwe ava va fa? Kapi vana kara po hena nawo? Bibeli tazi limburura:

• “Nayinye [vantu noyikorama] kuvyuka kevega limwe tupu—mbundu. Nayinye yimo ya tunda, nayinye yimo ngayi tengwira.”—Muudisi 3:20.

• “Vafe kutupu eyi va diva.”—Muudisi 9:5.

• “Eharo lyawo nonyengo zawo nomupampi gawo, nayinye kufa kumwe nawo.”—Muudisi 9:6.

• “Mosirongo sovafe [ntoko] omu ngo za, mutupu magazaro ndi unongo ndi ediwo.”—Muudisi 9:10.

• “[Vantu] kusitunuka evhu; ezuva olyo yigazo yawo nayinye tayi va pu.”—Mapisarome 146:4.

Kuna kara koge udigu mokutambura novelise edi? Nsene asi yimo, gazara ko kweyi: Momapata  gomanzi mugara kutambura yimaliva a rerese ko epata lyendi. Apa a fu mugara, rorunzi epata lyendi kugwana maudigu. Mpamwe mukadendi novana vendi kapi vana kara nampili noyimaliva yokugwana yokuranda nondya. Mpamwe nonkore domugara tadi va hepeke. Lipura nye ntaantani: ‘Nsene asi gwina mugara kuna kutwikira kuparuka mosirongo sonompepo, morwasinke ana kudira kutwikira kutekura epata lyendi? Morwasinke ana kudira kupopera epata lyendi kovantu wovadona?’ Eyi morwa matjangwa mouhunga ga kara. Gwina mugara kuna kara ga hana mwenyo; age nayimwesi na vhura kurugana.—Mapisarome 115:17.

Eyi tayi tanta nye asi vafe narumwe si ngava paruka hena? Hawe, eyi kapisi yiyo. Konyima natu uyunga yokuhamena kevhumbuko. Nye ayo ko tayi tanta asi vafe kapi vana kudiva eyi ono kurugana. Awo kapi tava vhuru kukumona, kukuzuva ndi va uyunge noge. Ove kwato hepero zokuvatjira. Awo kapi tava ku kwafa, na kapi tava ku zonagura.—Muudisi 9:4; Jesaja 26:14.