Jehova nga ninka udona naunye ou ga sangumuna Satana, u dire kurugana nampili kanunu. Jehova kwa ninka Jesus a kare Hompa pevhu nalinye. Mepangero lyendi evhu ngava li pirwira moparadisa.—Ndaniyera 7:13, 14; Rukasa 23:43, NW.

Jehova ta tumbwidire yininke eyi:

• NONDYA DONONZI: “Mapya gana tundu muzangu gwago; Karunga, Karunga gwetu a tu tungike.” “Ewogo lyoyisima ngano tali kara mosirongo; nondundu ngano tadi zura muzangu.”—Mapisarome 67:6; 72:16.

• KUTUPU HENA YITA: “Wizeni yo mu tare eyi ga rungana HOMPA! Tareni yitetu eyi ga rugana konauzuni! Age kwa hageka yita mouzuni mudima.”—Mapisarome 46:8, 9.

• KUTUPU VANTU WOVADONA: “Yeeyi vadinikarunga ngava va mana po . . . Karuwogona tupu ko, mudinikarunga ta dongonoka po; ngo mu papara, nye kapi ngo mu gwana.”—Mapisarome 37:9, 10.

•  KUTUPU MAUVERA, EGUWO NDI NOMFA: “Vatwiku ngava vhura kumona ko noyipurupuru ngayi zuvha ko. Yirema yomondambo ngayi lidinkura tayi dana, ano yipurupuru ngayi dimba unene.”—Jesaya 35:5, 6.

  “Karunga mwene nga kara pwawo, a kare Karunga gwawo. Ano Karunga nga kokota mahodi nagenye komeho gawo. Nomfa kapi hena ngadi kara ko, neguwo si nomalirankali nokukora kapi ngayi kara ko hena, yeeyi yininke yomuhowo yina dimi po.”—Ehororo 21:3, 4.

Melilimbo naSatana novademone, Jehova narumwe si a simwitire yimpempa. Nayinye eyi a tumbwidire, ya hepa kukara mousili ntani. (Rukasa 1:36, 37) Jehova ga ku hara yiyo ana hara asi ove wa hepa ku ka tunga moParadisa ezi nga ka reta. Gwanekera nye noNombangi daJehova mokulironga yoyinzi kuhamena mausili gokutetura aga ava gwana moNonkango daKarunga. Nsene o sikisa mo usili meparu lyoge ngano ngava ka ku mangurura mo moupika woyimpempa, mapuro goyimpempa nomoupofu. Moruhura ngano ngava ku mangurura nomoupika wononzo nonomfa deedi. Ngamoomu ga tente Jesus: “Makura ngomu kwata egano usili, awo ngau mu zowora.”—Johanesa 8:32.