Nye morwasinke a kambaderere Satana novademone vendi nononkondo ngesi mokupempura vantu? Morwa awo kwa hara asi ose ngano tu hamene kwawo merwaneso lyawo. Awo kwa hara asi ose ngano tu va kanderere ntani. Awo kwa hara asi ose ngano tu pure yimpempa yawo nokuliyomberesa yininke eyi ga dira kupulisira Jehova. Yoyinzi po poyininke eyi kuna kara mo ndunganeso ezi za kara momalikwatakano novafe.

Nomfa dogu wa hara kwa kara sihorokwa sokukora mokulizuva, ano yokulikida eguwo ya wapa tupu ayo ya zira mo. Apa ga fire mukwawo Rasaru, Jesus kwa ‘lilire.’—Johanesa 11:35.

Kwa kara po nondunganeso dononzi edi da kara melikwatakano nonomfa, ano ado kwa lisiga-siga unene mwaza uzuni naunye. Dononzi po kapi da lilimba nonoveta doBibeli. Nye nondunganeso dimwe kwa korera pegano eli asi vafe kutwikira kuparuka na asi awo kuvhura kumona vazuni. Kurarera simpu, eguwo lya hana elipangero noyilika yoyinzi-yoyinzi pomahoreko nayinye kwa korera poutjirwe wokuhandukisa nompepo dovafe. Ano morwa vafe “kutupu eyi va diva,” ava vana kuliyomberesa yininke yangesi kuna kukulika tupu yimpempa yaSatana.—Muudisi 9:5.

 Nondunganeso dimwe ndi yilika kwa tunda kepuro lyokuninka asi vafe kwa hepa ekwafo lyokutunda kovazuni na asi awo kuruganena vazuni maupyakadi nsene kapi vana kuzamba kwawo. Moyirongo yimwe kudana sipito nokureta nonzambo mazuva 40 ndi mumvho konyima zonomfa domuntu. Eyi kwa yi gazarera mokukwafa ogu ana fu ‘mokuhwilira’ mosirongo sonompepo. Ndunganeso zanavenye zimwe zeezi zokuzamba nondya noyikunwa kovafe.

Yininke eyi epuko, yeeyi ayo kukulika yimpempa yaSatana kuhamena vafe. Jehova ngayi tambura nsene tu rugana sininke sa hamena kondunganeso ezi za korera pomarongo govademone? Narumwe si!—2 Vakolinte 6:14-18.

Vapika vaKarunga gosili kapi ava hamene nampili kanunu konondunganeso edi adi kwatesa ko yimpempa yaSatana. Awo hasa kulitura mo neharo va kwafe vazuni nokuvahengangwida. Awo va diva asi Jehova gelike tupu gokuvhura kukwafa muntu nsene asi ana ya fu.—Joba 14:14, 15.

Vantu vamwe kugwanekera novademone pavyukiliro ndi kupitira moumpumbi. Eyi kuyitumbura asi umpure. Kukerera vadimu, rurogeso, mafeno, ezanekedo neuyungo novafe nayinye yigo marupe goumpure.

Bibeli kupangura yininke eyi nokutanta asi: “Nokuswakerera si vana veni . . . ndi asi mu sigilire vantu veni va hame koyininke eyi yoyirogesa neyi yomaunganga neyi yomazanekedo ndi yomaupure. Walye omu va tarerere va pure kovadimu. HOMPA Karunga gweni kwa nyenga vantu navenye ava ava rugana yininke yoyidona ngesi.”—Deuteronomium 18:10-12.

Morwasinke ana kuturondwera Jehova kondunganeso ezi nerondoro lyononkondo ngesi?

Morwa ndjewa-ndjewa zetu Jehova kuturondora komarupe nagenye goumpure. Age kwa kara neharo kovantu nokuvafirambili, ano ga diva asi ava vana  kulirunga-runga novademone yosili ngava nyanda.

Gumwe govantu ava kwa kere Nilda, ogu ga kere mpumbi moBrasiliya. Vademone kwa rurupikire eparu lyendi. Age ta simwitire: “Nompepo . . . kwa hwililire mwange nokupangera nge ni rugane neyi-neyi. Siruwo simwe kwa kere nina diva yuma ano siruwo sokukwama ko tani pwilire makura tava tambura nge mosipangero sovatanauki komaudigu gopanandunge. Vademone kwa kwama-kweme nge sili dogoro tani karere mo ngwendi kuna zaruka. Tani nu mutji gokuninka ni liture makura tani vareke kunwa unene nokukoka. Ayo kwa twikilire ure wonomumvho.”

Nekwafo lyaJehova noNombangi dendi pevhu, Nilda moruhura gaya kakutukire mo mepangero lyovademone ano ntaantani kuna kara nye neparu lyomulyo, alyo lyakuhuka. Age ta tanta asi: “Ame tani rondora navenye asi narumwe si, nampili karuwogona kamwe asi mu lirunga-runge nonompepo [donondona].”