Gwana nombudi dousili. Magano aga no gava nkenye apa ga tundilire moNonkango daKarunga ntani resa moBibeli kuvyukilira nsene kuvhura. Nsene to ruganesa sihonena ndi nombudi ko zuvhire ndi sihorokwa mokukwatesa ko eyi ono kuuyunga, divilisa komeho zosiruwo asi ado nombudi dousili.

Ruganesa nawa nombudi. Pokufaturura etjangwa wa hepa kudiva eyi Jehova ga here kuronga metjangwa olyo. Ano pokutantera vantu omu nava li limburukwa, eyi tuna kuvatantera ya hepa kuliza neyi azi uyunga ko Bibeli nazinye kosirongwa oso ntani kuliza noyimbapiratjangwa yokutunda ‘komukareli gokulimburukwa.’ (Mat. 24:45) Nsene to ruganesa eyi ko zuvhire koradio, wa ha tjindja mbudi.

Vatera vantu va gazadare ko. Nsene ono resa etjangwa ndi ono tumbura sihorokwa songandi, pura nawa mapuro ndi ruganesa sihonena esi nasi vatera vantu va kwate egano sitwa.