Tara mumatigona ogu mefano. Age kuna kulizuvha mukuma nowoma. Nove wa lizuvha rumwe mukuma nowoma ndi?— Poyiruwo yimwe nkenye gumwe kulizuvha monkedi zangoso. Bibeli kuuyunga kuhamena vakaume vaJehova ava va lizuvhire mukuma nowoma. Gumwe gwawo kwa kere Eliya. Ngesi tatu ka lironga kuhamena Eliya.

Eliya kwa kere moIsraeli, komeho Jesus va ya mu hampuruke. Ahaba, hompa gwaIsraeli, kapi nga karere Karunga gosili, Jehova. Ahaba namukadendi Jesebeli ngava karere karunga goyimpempa, Bara. Vantu wovanzi womoIsraeli yipo nawo va tamekere kukarera Bara. Hompakadi Jesebeli kwa kere gonyanya ntani kwa here kudipaga nkenye mukareli gwaJehova, kukwatera mo Eliya! Yisinke ga rugene Eliya?—

Eliya kwa dukire! Age kwa zire ure momburundu nokukavanda mekombombo.  Morwasinke ga dukilire a ka vande?— Morwa woma. Nye Eliya kapi ga hepere kukara nowoma, morwa ga divire asi Jehova kuvhura a mu vatere. Jehova ga likidire nare Eliya asi age ga kara nononkondo. Posiruwo simwe, Jehova kwa limbwilire ekanderero lyaEliya pokutuma mundiro gu tunde meguru. Yipo nye, Eliya kapi ga hepere ngano kukara nowoma.

Apa Eliya ga kere mekombombo, Jehova kwa mu uyungisire nokumupura asi: ‘Yinke ono kurugana po apa?’ Eliya ta limburura asi: ‘Ame nyamelike nina hupu po mukareli goge. Ntani nina kara nowoma asi tava dipaga nge.’ Eliya kwa gazarere asi vakareli navenye vaJehova kwa va dipagere. Nye Jehova ta tantere Eliya asi: ‘Kapisi usili. Pana kara vantu 7 000 ava simpe vana kukarera nge. Wa ha tjira. Nina kara noyirugana yoyinzi eyi no rugana!’ Eliya ya mu hafesere apa ga yi zuvhire eyi ndi?—

Yisinke no lirongera ko kweyi ya horokerere Eliya?— Ove kapi wa hepa kuzuvha mukuma nowoma. Ove wa kara novakaume ava va ku hara ntani va hara Jehova. Ntani hena, Jehova ga kara nononkondo dononene, age nga ku vatera. Ove ono hafa mokudiva asi kapisi nyovelike ono kara ndi?—