Ya kara ureru kulimburukwa kovakondi woge ndi?— Poyiruwo yimwe kapisi ureru. Jesus nga limburukwa kwaJehova nokovakondi vendi ndi?— Sihonena sendi kuvhura si ku vatere o limburukwe kovakondi woge nampili yi kare asi kapisi ureru. Ngesi tatu ka lironga ko yoyinzi.

Komeho Jesus a wize pevhu, age kwa kere meguru noGuhwe Jehova. Ga kere hena novakondi apa pevhu. Madina gawo, Josefa naMariya. Ngapi omu Josefa naMariya va ya kere vakondi vaJesus?—

Jehova kwa gusire eparu lyaJesus meguru nokulitura mezimo lyaMariya yipo Jesus va ya mu hampurukire pevhu. Esi kwa kere sitetu! Jesus kwa kulire mezimo lyaMariya ngwendi moomu vakeke navenye ava kuru momazimo govazinya vawo. Age kwa kere mezimo makwedi ntane, makura tava mu hampuruka. Yimo nye Mariya namugara gwendi, Josefa, va ya kere vakondi vaJesus apa pevhu.

Apa Jesus ga kere nonomvhura 12, age kwa rugene yininke eyi ya likidire asi age kwa hara oGuhwe, Jehova. Eyi kwa horokere apa Jesus nepata lyawo va zire koJerusarema posiruwo soPaska. Monzira zawo zokutengura, Josefa naMariya tava yi dimburura asi Jesus kapi ana kugenda nawo. Kupi ga kere Jesus?—

Josefa naMariya tava tengura koJerusarema va ka papare Jesus. Awo kwa kere nosinka unene apa va dilire kumugwana. Nye konyima zomazuva gatatu, tava mu gwana montembeli. Yisinke Jesus ga rugene montembeli?— Kwa lirongere kuhamena oGuhwe, Jehova. Age kwa hara Jehova ntani ga here kulironga omu na mu hafesa. Nampili paapa ga kulire, Jesus nkenye apa nga limburukwa Jehova. Jesus nga limburukwa nampili ngomu ya kere asi kapisi ureru. Jesus nga limburukwa nkenye apa Josefa naMariya ndi?— Nhi, Bibeli kutanta asi nga limburukwa.

Yisinke no lirongera ko kosihonena saJesus?— Wa hepa kulimburukwa vakondi woge, nampili yi kare asi kapisi ureru. Nove ngo limburukwa ndi?—