SIRONGWA 8
Josiya kwa kere novakaume wovawa
Ayo udigu kurugana yoyiwa ndi?— Vantu wovanzi yimo ava gazara ngoso. Bibeli kututantera asi kwa kere udigu komunona gedina Josiya mokurugana yoyiwa. Nye ga kere novakaume wovawa ava va mu vaterere. Ngesi tatu ka lironga yoyinzi kuhamena Josiya novakaume vendi.
Oguhwe vaJosiya kwa kere Amoni, hompa gwaJuda. Amoni kwa kere muntu gomudona ntani nga karere mafano. Apa oguhwe vaJosiya va fire, Josiya ta kara hompa gwaJuda. Age nomvhura dendi ntantatu tupu! Age ga honenene udona woguhwe ndi?— Hawe!
Sefaniya kwa rondwere vantu asi kapisi va karere mafano
Nampili ngomu ga kere munona, Josiya kwa here kulimburukwa Jehova. Makura ta tulisa po ukaume novantu ava va here Jehova. Ano awo kwa vaterere Josiya a rugane yoyiwa. Wolye va kere vakaume vaJosiya?
Gumwe gwawo kwa kere Sefaniya. Sefaniya kwa kere muporofete ogu nga tantere Vajuda asi nsene va twikira kukarera mafano ngayi va horokera yininke yoyidona. Josiya kwa purakenene kwaSefaniya nokukarera Jehova, nye kapisi mafano.
Gumwe hena govakaume vaJosiya kwa kere Jeremiya. Age kwa kere epupi limwe tupu naJosiya ntani momukunda gumwe. Awo kwa kere vakaume wovawa makura apa ga fire Josiya, Jeremiya ta tjanga rusumo rokulikarera rokulira Josiya. Jeremiya naJosiya ngava livatere mokurugana yoyiwa nokulimburukwa Jehova.
Josiya naJeremiya ngava livatere mokurugana yoyiwa
Yisinke no lirongera ko kosihonena saJosiya?— Nampili apa Josiya ga kere munona, age kwa here kurugana yoyiwa. Age ga divire asi ga hepa kukara novakaume ava va hara Jehova. Yipo nye, horowora vakaume ava va hara Jehova ava nava ku vatera o rugane yoyiwa.
RESA MOBIBELI ZOGE
-
2 Histoli 33:21-25; 34:1, 2; 35:25
