SIRONGWA 4
Mukadona kwa hafesere oguhwe naJehova
Yisinke Jefuta ga tumbwidilire Jehova?
Kapi ya kere ureru, nye munwaJefuta ga sikisire mo etumbwidiro lyoguhwe
To mono ogu mukadona mefano ndi?— Age munwaJefuta. Bibeli kapi za tumbura edina lyendi, nye twa diva asi age kwa hafesere oguhwe naJehova. Ngesi tatu ka lironga kuhamena mukadona ogu noguhwe, Jefuta.
Jefuta kwa kere mugara gomuwa ogu nga rongo munwendi kuhamena Jehova. Age hena kwa kere mugara gononkondo nomupitisili gomuwa. Makura yipo Vaisraeli va mu pulire a va pitisire mokukarwanesa nonkore dawo.
Jefuta kwa kanderere kwaKarunga a mu vatere yipo a ka funde. Jefuta kwa tumbwidilire asi nsene nga ka funda moyita nga pa Jehova muntu ogu nga hova kupwaga membo lyendi. Ogo muntu ngano nga ka kara koNkongoronzugo nokukaruganena Karunga eparu lyendi nalinye. Nkongoronzugo kwa kere evango oku ngava zi vantu va ka karere Karunga mosiruwo sina. Jefuta ga ka fundire moyita! Apa ga tengwire kembo, ono diva asi yilye ogu ga hovere kupwaga membo lyendi?—
MunwaJefuta! Age yige gelike munwendi ga kere, ano Jefuta ga hepere kumugava a ka kare koNkongoronzugo. Eyi kwa guvisire unene Jefuta. Diworoka asi age ga tumbwidilire Karunga. Yipo munwendi ga tente asi: ‘Tate, nsene kwa tumbwidira Jehova kurugana tupu eyi mwa tanta.’
Nkenye mvhura, vakaume vamunwaJefuta ngava zi va ka mu tarere po
MunwaJefuta nage kwa guvire. KoNkongoronzugo, munwaJefuta kapi ga vhulire kukakwara nokukakara novana. Nye age kwa here unene kusikisa mo etumbwidiro lyoguhwe nokuhafesa Jehova. Ano eyi kwa kere mulyo kwendi kupitakana kukwara nokukara novana. Yipo nye ga tundire membo lyoguhwe nokukakara koNkongoronzugo eparu lyendi nalinye.
Eyi ga rugene ya hafesere oguhwe naJehova ndi?— Nhi, ya va hafesere! Nsene ove kulimburukwa ntani wa hara Jehova, ngo kara ngwendi munwaJefuta. Nove ngo hafesa unene vakondi woge naJehova.
