SIRONGWA 2
Rebeka kwa here kuhafesa Jehova
Rebeka kwa kere mukadi ogu ga here Jehova. Edina lyamugara gwendi Isaka. Isaka nage kwa here Jehova. Ngapi omu Rebeka ga ligwene naIsaka? Ngapi Rebeka ga yi likidire asi ga here kuhafesa Jehova? Ngesi tatu ka lironga kuhamena Rebeka.
Vakondi vaIsaka kwa kere Abirahamu naSara. Awo kwa kere mosirongo saKanani, ano vantu vamo kapi ngava karere Jehova. Abirahamu kwa here munwendi Isaka a kware mukadi ogu a karere Jehova. Makura yipo ga tumine mukareli gwendi Eliasera kosirongo saHarani, a ka gwanene Isaka mukadi, oku lya kere ekoro lyaAbirahamu.
Rebeka kwa rugene unene a vhetagwire mema nongameru
Eliasera kwa zire novakareli vamwe vaAbirahamu. Awo kwa gendere nzira zonde unene. Awo kwa zire nonongameru murongo edi da simbire nondya nomauhwi. Ngapi omu Eliasera ga divire asi mukadi musinke na horowera Isaka? Apa Eliasera novakareli vakwawo va ka sikire koHarani, awo kwa sikeme petope morwa va divire asi vantu nava wiza va ya vhete mema. Eliasera makura ta kanderere kwaJehova asi: ‘Ano mukadona ogu nani hundira mema makura a pe nge ntani a vhetagwira hena nongameru dange, nani diva asi yige ono horowere mukareli goge Isaka.’
Rebeka yipo ga wizire ketope. Bibeli kuuyunga asi age kwa kere gomuwa unene. Eliasera ta mu hundire mema, makura Rebeka ta tanta asi: ‘Nwa mo. Nonongameru doge nado nani di vhetagwira.’ Gazara tupu! Nongameru kunwa mema gomanzi, ano Rebeka kwa tengwilire ko rorunzi ketope. To mono Rebeka mefano omu ana kurugana unene ndi?— Eliasera kwa tetukire omu Jehova ga limbwilire ekanderero lyendi.
Eliasera kwa pere Rebeka mauhwi gomawa gomanzi. Makura Rebeka ta zigida Eliasera novakareli vakwawo va ze kembo lyawo. Eliasera kwa sansekere eyi ga mu tuminine Abirahamu nomu Jehova ga limbwilire ekanderero lyendi. Vakondi vaRebeka va hefe mokumugava a ka kare mukadaIsaka.
Rebeka ta zi koKanani naEliasera nokukakara mukadaIsaka
Rebeka ga here kukara mukadaIsaka ndi?— Rebeka ga divire asi Jehova yige ga tumine Eliasera. Apa vakondi vaRebeka va mu pulire nsene ana hara kuza koKanani a ka kare mukadaIsaka, age kwa tente asi: ‘Nhi, na hara.’ Poopo makura ta zi naEliasera. Apa va ka sikire moKanani, makura ta ka kara mukadaIsaka.
Morwa Rebeka kwa rugene eyi ga mu harerere Jehova, makura Jehova ta mu tungike. Konyima zonomvhura dononzi, Jesus kwa ya mu hampurukire mezimo lyaRebeka. Nsene o honena Rebeka nokuhafesa Jehova, age nga ku tungika.
