Kutunda unona wendi, Samwere kwa kere koNkongoronzugo, kevango oku ngava wiza vantu va ya karere Jehova. Ono diva omu Samwere ga ya kere koNkongoronzugo ndi? Pomuhowo tatu ka lironga kuhamena ozina vaSamwere, Hana.

Hana kwa here kukara nomuna, nye kapi nga reta. Age nga kanderere nkenye apa kwaJehova a mu vatere. Age kwa tumbwidilire Jehova asi nsene nga mu pa muna nga mu gava a ka kare koNkongoronzugo. Jehova ga limbwilire ekanderero lyaHana nokumupa muna. Munona ogo edina lyendi Samwere. Apa Samwere ga kere nonomvhura ntatu ndi ne ngoso, yipo Hana ga mu geve koNkongoronzugo a ka karere Karunga ngamoomu ga yi tumbwidilire.

Eli kwa kere mupristeli gomunene koNkongoronzugo. Vana vendi wovagara vavali nawo ngava rugana poNkongoronzugo. Diworoka asi Nkongoronzugo kwa kere nzugo zaKarunga oku ngava mu karere, ano vantu va hepere kurugana yoyiwa konzugo ezi. Nye vana wovagara vaEli ngava rugana yoyidona. Samwere nga mono eyi ngava rugana. Samwere ga honenene vana vaEli ava ngava rugana yoyidona ndi?— Hawe, age nkenye apa nga rugana yoyiwa, ngwendi moomu va mu rongere vakondi vendi.

Yisinke ngano Eli ga rugene ko kovana vendi vavali ava ngava rugana udona?— Ngano ga va tengekere nokuvagusa ko konzugo zaKarunga. Nye Eli kapi ga yi rugene oyo, Jehova yipo ga mu handukilire novana vendi vavali. Jehova yipo ga tokwere kuvatengeka.

Esiku limwe age Samwere kuna rara, ta zuvhu ezwi lina kumuzigida asi: ‘Samwere!’ Makura age ta dukire kwaEli, nye Eli ta tanta asi: ‘Kapisi nyame nina kuzigida.’ Eyi kwa horokere rutatu. Makura Eli ta tantere Samwere asi nsene  na zuvha hena ezwi, a tante asi: ‘Uyunga, Jehova, mukereli goge ta zuvhu.’ Ano oyo yiyo ga rugene Samwere. Makura Jehova ta tantere Samwere asi: ‘Tantera Eli asi ngani mu tengeka nepata lyendi morwa udona ou va rugana.’ Ya kere ureru kwaSamwere mokutantera mbudi ezi Eli ndi?— Hawe, kapi ya kere ureru. Nampili ngomu Samwere ga kere nowoma, age ga rugene eyi ga mu tanterere Jehova. Eyi ga uyungire Jehova ya ya sikire mo. Vana vavali vaEli kwa va dipagere, ano Eli nage kwa fire.

Samwere kuna kara sihonena sosiwa kwetu. Age kwa rugene yoyiwa nampili ngomu vantu wopeke ngava rugana yoyidona. Ove ngapi? Nove ngo honena Samwere nokurugana yoyiwa ndi? Nsene ngo yi rugana, ngo hafesa Jehova novakondi woge.