Kweli gumwe ogu ga ku tantera sihoramo ndi?— * Bibeli kuuyunga kuhamena ‘sihoramo’ sokulikarera sokupongoka. Aso kwa pongoka morwa kwa tunda kwaKarunga. Aso kusitumbura asi sihoramo morwa vantu kapi va si divire. Nampili vaengeli kwa here kusidiva. Ono hara kudiva sihoramo esi ndi?—

Nare, nare, Karunga kwa sitire mugara nomukadi wokuhova. Madina gawo, Adamu naEva. Karunga kwa va pere embo lyewa eli ngava tumbura asi sikunino saEdeni. Ngano Adamu naEva kwa limburukwire Karunga, awo novana vawo ngano va ninkire evhu nalinye li kare paradisa ngwendi sikunino sina. Ntani ngano va parukire narunye moParadisa. To diworoka eyi ga rugene Adamu naEva ndi?—

Adamu naEva kapi va limburukwire kwaKarunga, eyi yiyo tuna dilire kukara naina moparadisa. Nye Karunga kwa tente asi nga wapeka hena evhu nalinye li kare paradisa, omu vantu navenye ngava ka paruka narunye noruhafo. Ngapi omu nga ka yi rugana oyo? Nare, vantu kapi va yi divire. Morwa aso kwa kere sihoramo.

Apa ga wizire Jesus pevhu, age kwa rongere vantu kuhamena sihoramo esi. Age kwa tente asi aso sihoramo soUntungi ndi soUhompa waKarunga. Jesus kwa rongere vantu mokukanderera asi Uhompa waKarunga au wize. Awo ngau ya ninka evhu li kare paradisa.

Ono hafa mokudiva sihoramo esi ndi?— Diworoka asi vaava tupu ava limburukwa Jehova yiwo ngava ka kara moParadisa. Bibeli kututantera masimwititi gomanzi kuhamena vagara novakadi ava va limburukwire Jehova. Ono hara kuvadiva ndi?— Ngesi tatu ka resa masimwititi gawo nomu natu va honena.