Ngwendi moomu wa yi lironga mosimbapira esi, Bibeli kwa kara nonompango dononzi edi nadi ku vatera nepata lyoge. Jehova kuna hara o hafe. Age ga tumbwidira asi nsene o hova tanko kumukarera, ‘yininke nayinye ngano ngava yi ku gwederera po.’ (Mateusa 6:33) Age ana hara o kare kaume kendi. Yipo nye, ruganesa nkenye mpito o tunge po ukaume naKarunga. Awo kuna kara ukaume wouwa po na vhura kutulisa po muntu.—Mateusa 22:37, 38.

EYI ZA UYUNGA BIBELI: “Ame ngani kare Guhyeni, one ngomu kare vana vange wovagara nava wovakadi, yimo ana kutanta Hompa.” (2 Vakolinte 6:18) Karunga ana hara o kare kaume kendi gomunene. Nkedi zimwe no yi rugana, pokukanderera. Jehova kuna kukutantera asi: ‘Kanderera narunye.’ (1 Vatesaronika 5:17) Age ana liwapaikire kuzuvha magano noyinka yoge. (Vafilipi 4:6) Apa o kanderere nepata lyoge, awo ngava yi dimburura asi Karunga mulyo koge.

Kugusa ko kuuyunga naKarunga, wa hepa hena kupurakena kwendi. Kuvhura o yi rugane oyo pokulironga Nonkango dendi noyimbapiratjangwa yoBibeli. (Episarome 1:1, 2) Teda ko kweyi ono lirongo. (Episarome 77:11, 12) Kupurakena kwaKarunga kwa kwatera mo hena kuza nkenye apa komapongo nagenye.—Episarome 122:1-4.

Kutantera ko wopeke kuhamena Jehova kuna kara nkedi zomulyo omu no nkondopeka elikwatakano lyoge nendi. Moomu ono kuyirugana oyo yimo hena ngo mu hedera pepi.—Mateusa 28:19, 20.

EYI NO RUGANA:

• Litulira po siruwo sokuresa Bibeli nokukanderera nkenye ezuva

• Ngepata, tureni muhowo kukarera Jehova kupitakana tupu kulihafesa

EYI ZA UYUNGA BIBELI: “Hedeni Karunga pepi, nage a mu hede pepi.” (Jakopo 4:8) Litulireni po elikwamo lyokurugana ukareli wepata nkenye sivike. (Genesis 18:19) Nye yinzi ya hamena mo. Mwankenye eyi nomu rugana mwa hepa kudiworoka Karunga. Nkondopekeni elikwatakano lyeni naKarunga pokuuyunga kumuhamena ‘nsene membo muna kara ndi morugendo ndi kuna pwizumuka ndi tomu rugana.’ (Deuteronomium 6:6, 7) Kara netokomeno ngwendi lyaJosuwa ogu ga tente asi: “Nye ame ko nepata lyange, ose kuna hara kuruganena Jehova.”—Josuwa 24:15, NW.

EYI NO RUGANA:

• Ruganesa yirongwa eyi nayi vhura kuvatera nkenye gumwe gemepata