RUHA 3
Kohonona po maudigu
“Kareni neharo lyenene . . . yeeyi eharo kudongwenesa po nonzo dononzi.”—1 Peturusa 4:8
Apa ngomu tameka nonkwara deni, ngomu ligwanekera nomaudigu gokulisiga-siga. Maudigu kuvhura ga horoke morwa monkedi omu o lizuvhu nomu o gazara ndi omu va ku rera. Ndi pamwe kuvhura ga wize po morwa yihorokwa yoharara si.
Kuvhura o kare neharo lyokuhenduka maudigu, nye Bibeli kutukorangeda tu ga kohonone po. (Mateusa 5:23, 24) Nkedi zongwa mokugakohonona po kuna kara pokutura pasirugana nompango doBibeli.
1 ZOGERENI MAUDIGU GENI
EYI ZA UYUNGA BIBELI: ‘Pwa kara siruwo sokuuyunga.’ (Muudisi 3:1, 7) Litulireni po siruwo sokuzogera maudigu geni. Tantera usili mulikwali goge omu ono kulizuvha. ‘Uyunga usili’ nkenye apa nomulikwali goge. (Vaefeso 4:25) Nampili ono handuka, wa ha tanguna. Nsene o uyunga nombili nzogera zeni kapi ngazi reta mutangu gomunene.—Yisewe 15:4; 26:20.
Nampili kapi ono kukwatesa ko eyi ana kuuyunga mulikwali goge, mu likida eharo nefumadeko. (Vakorosi 4:6) Kohononeni po udigu usimbu ntani mwa ha lifundukira.—Vaefeso 4:26.
EYI NO RUGANA:
-
Litulireni po siruwo sosiwa mu zogere udigu weni
-
Nsene mulikwali goge kuna kuuyunga kapisi o mu kwate meraka. Nove no gwana mpito zokuuyunga
2 PURAKENA NAWA
EYI ZA UYUNGA BIBELI: “Omu lihare-hare neharo lyosiumbya lyomwaKristusa. Omu gave sihonena sokulifumadeka-fumadeka.” (Varoma 12:10) Mulyo unene kupurakena. Heteka kukwata egano magano gomulikwali goge monkedi ‘zonkenda zelinunupiko.’ (1 Peturusa 3:8; Jakopo 1:19) Wa ha lininkisa asi kuna kupurakena. Nsene asi poyili ono kurugana hageka tanko o purakene mulikwali goge ndi kuvhura o mu pure mu ya yi zogere konyima. Tara mulikwali goge ngakaume koge. Nsene o tara mulikwali goge asi nkore zoge ngo ‘genderera kuhanduka.’—Muudisi 7:9.
EYI NO RUGANA:
-
Purakena nawa nampili kapi yina kukuhafesa eyi ana kuuyunga mukweni
-
Kwata egano eyi ana tamba mulikwali goge. Ntani koneka muhagaro gezwi lyendi ntani nomu ana fana kosipara
3 RUGANA KO YUMA
EYI ZA UYUNGA BIBELI: “Nsene to rugana ngo paruka, nye nsene to hingire tupu nokuuyunga makura, ngo kara hepere.” (Yisewe 14:23) Kapi ya gwanena po tupu kutokora omu nomu kohonona po udigu, nye mwa hepa kurugana ko yuma kuliza neyi muna tokora. Kuvhura yi kare udigu kuyirugana nye ayo kureta mauwa. (Yisewe 10:4) Nsene mu ruganena kumwe ngomu ‘gwana mfuto zongwa.’—Muudisi 4:9.
EYI NO RUGANA:
-
Tokoreni eyi nkenye gumwe gweni na vhura kurugana mokukohonona po udigu weni
-
Mwa za siruwo, konakonene eyi mwa rugana ko kweyi mwa tokora
